1. Oki atura a Limihai e tona ra au tangata katoatoa ki te oire ra ko Niphai, e noo akaou iora ratou ki te enua ma te au.

2. E kia ope akera te au rā e manganui, kua tupu akaou te riri o te ngati Lamana ki te ngati Niphai ra, e kua akamata iora ratou i te aere mai ki te au kotinga o te enua ra.

3. No te taputou i taputouia e to ratou ariki kia Limihai ra, kua mataku ratou i te tamate ia ratou ra, kua moto mai ra ratou i to ratou paparinga, e kua rave ratou i te mana ki rungao ia ratou, e kua tuku akera ratou i te apinga teimaa ki runga i to ratou mokotua, e kua iā oki ia ratou mei ta ratou i iā i te asini murare ra.

4. E kua raveia taua au mea katoatoa ra kia akatupuia te tuatua a te Atu ra.

5. E au tumatetenga maata to te ngati Niphai ra, e kare akera e ravenga kia rauka ia ratou i te akaora ia ratou uaorai mei roto mai i to ratou rima, no te mea oki, kua takapiniia ratou e te ngati Lamana i te au ngai katoatoa.

6. No to ratou au tumatetenga i akamataʼi ratou i te koumuumu ki te ariki, kua inangaro oki ratou i te tamaki atu ia ratou. Kua akapekapeka maata mai ratou ki te ariki i ta ratou i anoano; kua akatika ua atu rai aia kia rave ratou i to ratou inangaro.

7. Kua akaputuputu akaou iora ratou, aao iora ratou i to ratou kakau tamaki, e aere atura oki ki te ngati Lamana e tuaru ia ratou ki vao i to ratou enua.

8. Kua akavi iora te ngati Lamana ia ratou, e kua akaoki ia ratou, e manganui ta ratou i tamate.

9. Tupu akera te aue e te mii maata i rotopu i te au tangata o Limihai ra; kua mii te au vaine takaua i ta ratou au tane; kua mii te au tamaine e te au tamaroa i to ratou au metua tane, e mii oki i to ratou au taeake.

10. Kua maata oki te au vaine takaua i te enua ra, e kua aue ratou i tera rā i tera rā no te mataku maata i te ngati Lamana.

11. No to ratou aue tuku kore, i tupu ei te riri o te toenga o te tangata o Limihai ki te ngati Lamana, e kua aere akaou atura ratou kia tamaki, kua akaoki akaouia mai ra ratou ma te mate maata.

12. I na, kua aere akaou atura ratou, ko te toru ïa o te aereanga, kua akapera akaouia; e te au tangata tei kore i mate, kua oki akaou maira ratou ki te oire ko Niphai.

13. E kua taakaaka iora ratou ia ratou uaorai ki raro i te one pueu, i te tukuanga atu ia ratou uaorai ki te tuikaaanga ra, i te akatikaanga atu kia rutuia e kia iāia ratou i tera enua e i tera enua, e kia tukuia oki te apainga ki runga ia ratou, mei te inangaro o to ratou ra au enemi.

14. E kua taakaaka iora ratou ia ratou uaorai i te tu akaaka tikai; e kua kapiki atura ratou ki te Atua ra; I na, kua kapiki atura ratou ki to ratou Atua, e pou te ra i to ratou kapikianga kia akaora mai aia ia ratou i to ratou au tumatetenga.

15. E no ta ratou au ara, kua marie te Atu i te akarongo i ta ratou kapikianga atu; kua akarongo akera te Atu i to ratou kapikianga, e kua akamata aia i te akamaru i te ngakau o te ngati Lamana, e kua akamama ratou i ta ratou apainga; Kare ra te Atu i akaora ia ratou i te tuikaaanga.

16. Manuia meangiti akera ratou i te enua ra, e kua akamata ratou i te akamaata i te akatupuanga i te sitona, e te puakatoro, e te au anana oki, kia kore ratou e mate i te pongi.

17. E manganui oki te vaine i reira, kua maata atu ratou i te tane; no reira, kua akaue atu te ariki ra ko Limihai kia akono te au tangata katoatoa ma te tauturu atu i te au vaine takaua ra, e ta ratou au tamariki kia kore ratou e mate i te pongi; no te maata oki o te tangata tei mate kua akapera ratou.

18. Taokotai iora te au tangata katoatoa o Limihai i te pupu okotai kia tiaki oki ratou i ta ratou sitona e ta ratou au anana.

19. E kare ra te ariki i aere ki vao i te aua o te oire ra, mari ra, kia aru tona au tiaki iaia, kua mataku oki ko te tupu aea te ravenga e riro atu ei aia ki te rima o te ngati Lamana ra.

20. E kua akaue atura aia ki tona ra au tangata e tiaki i te enua e pini ua ake, kia rauka ia ratou i te opu i te au taunga tei aere ki roto i te metepara ra, e tei keia oki i te au tamaine a te ngati Lamana, e tei akatupu oki i taua tumatetenga maata ra ki runga ia ratou ra.

21. Kua inangaro oki ratou i te papa ia ratou; no te mea, kua aere mai ratou i te po ki te enua ra ko Niphai, e kua apai atu i ta ratou sitona, e ta ratou au apinga e manganui; no reira kua tiaki ratou ia ratou ra.

22. E kare atura e pekapeka i tupu ki rotopu i te ngati Lamana e te au tangata o Limihai e tae roa mai ki te tuatau i tae mai ei a Amona e tona ra au taeake ki taua enua ra.

23. Te noo ra te ariki e tona au kāti katoa ki vao i te ngutupa o te oire ra, e kite akera ratou ia Amona e tona au taeake ra; e kua manako iora ratou e, ko te au taunga ïa o Noa ra, kua akaue aia kia mouria, e kia tapekaia e kia titiriia oki ratou ki roto i te ara tapekaanga. E naringa ko ratou te au tangata o Noa ra, kua akaue atura aia kia tamateia ratou.

24. E kite akera aia e, kare ko ratou, e au taeake ra nona, e i aere mai oki mei te enua maira, mei Zarahemela ra, ki iora aia i te rekareka maata.

25. I mua ake te taeanga mai o Amona, kua tono atu te ariki ra ko Limihai i tetai pupu tangata e kimi i te enua ra ko Zarahemela, kare ra i kiteaia e ratou, e kua ngaro roa ratou i roto i te metepara ra.

26. Ina ra, kua kite ratou i tetai enua i nooia e te tangata i muatangana, i na, e enua kua ki i te ivi maro ra; koia oki, e enua i nooia ana e te tangata, e kua akakoreia i reira; e te manako ra ratou e, ko te enua rai ïa o Zarahemela, kua oki maira ratou ki te enua ra, ki Niphai, e kua tae maira ratou ki te kotinga o te enua ra i mua ake i te taeanga mai o Amona ra.

27. E kua apai maira ratou i te papaanga tuatua o te iti tangata no ratou te au ivi i kiteaia e ratou ra; e kua tata kotikotiia oki ki runga i te au papa i maaniia ki te auri.

28. E kia kite akera a Limihai, na roto i te vaa o Amona, kua rauka ia Mosaia i te mana no ko mai i te Atua kia uri i taua au tuatua ra, rekareka akaou akera aia ma te rekareka maata, e kua rekareka katoa oki a Amona.

29. Mii iora a Amona e tona ra au taeake katoa no te maata o to ratou au taeake i mate.

30. E no te mea oki e, kua arataki te ariki ra a Noa e tona au taunga katoatoa i te au tangata kia rave i te au ara e te angaanga kino ki mua i te Atua ra; e kua mii katoa ratou i te matenga o Abinadaia, e no te aereanga atu oki o Alama e te au tangata oki i aru atu iaia ra, ko tei akatu i te akonoanga a te Atua na roto i te mana e te ririnui o te Atua, e te akarongo oki ki te tuatua i tuatuaia e Abinadaia ra.

31. I na, kua mii ratou, no te mea kua aere atu ratou, e kare ratou i kite i te ngai ta ratou e aere ra. Kua rekareka oki ratou naringa ratou i aere katoa, no te mea kua taputou katoa ratou i tetai taputouanga ki te Atua, kia akarongo kiaia, e kia akono i tana au akaueanga.

32. E i muri ake i te taeanga mai a Amona ra, kua taputou katoa te ariki ra ko Limihai e tona ra au tangata e manganui i tetai taputouanga ki te Atua, kia akarongo kiaia e kia akono oki i tana ra au akaueanga.

33. E kua inangaro iora a Limihai e tetai papaki o tona ra au tangata katoa kia bapetizoia; kare ra tetai tangata i taua enua ra e mana tona no ko mai i te Atua ra. E kare e rauka ia Amona kia rave i te reira, no te mea kua manako aia iaia uaorai e, e tavini tau kore aia.

34. No reira, kare ratou i akariro ia ratou ei akonoanga i reira, kua tiaki ra i te Vaerua o te Atu ra, e kua inangaro ratou kia riro katoa ratou mei ia Alama e tona ra au taeake tei aere ki roto i te metepara ra.

35. E kua inangaro oki ratou kia bapetizoia ei kite e ei akakite e, kua inangaro ratou kia akono ki te Atua ma to ratou ngakau katoa; kua taroroa ratou i te tuatau; e ka akakiteia te tuatua no to ratou bapetizoanga a muri atu.

36. Kua kimi anake a Amona e tona ra au tangata, e te ariki ra ko Limihai e tona ra au tangata, i te ravenga e akaoraʼi ratou ia ratou uaorai mei te rima o te ngati Lamana, e te tuikaaanga ra.