1. E teianei, e aku au taeake, e akarongo mai ana, ka tuatua akaou atu rai au kia kotou, i na oki, e au tuatua taku ka akakite atu kia kotou no te au mea te ka tupu a muri atu.

2. E kua akakite ua mai tetai angela no ko mai i te Atua i te au mea taku e akakite atu kia kotou. E kua karanga mai aia kiaku, Ka ara mai ana, ara iora au, e i na, te tu ua ra aia i mua iaku.

3. E kua tuatua maira aia kiaku, ka ara, e akarongo i te au tuatua taku ka akakite atu kia koe; i na oki, i tae mai au kia akakite atu kia koe i te tuatua meitaki e te mataora maata ra.

4. Kua akarongo oki te Atu i taau au pure, e kua kite i taau tuatua tika, e kua tono mai iaku kia tuatua kia koe, e kia mataora koe, e kia akakite atu oki koe ki toou iti tangata, kia akaki katoaia ratou ki te mataora.

5. I na oki, ka tae mai te tuatua e kua vaitata rava oki, ko te Atu Mana Katoatoa, tei iaia te au, ko tei vai ana, e te vai nei rai e ka vai e tuatau ua atu, ka aere mai ki raro nei mei runga mai i te rangi, ki rotopu i te tamariki a te tangata, ma te mana, e ka noo oki i te kopapa karakaraea, e ka aere atura aia i rotopu i te tangata nei i te rave anga i te au semeio mamaata; koia oki, i te akaora anga i te maki, e te akatu anga i tei mate, e ka ora te pirikoki iaia, e ka kite akaou te matapo, e akarongo te taringa turi, e e ora oki te au tu maki katoatoa iaia ra.

6. E e tuaru aia i te au tiaporo, koia oki i te au vaerua viivii e noo i roto i te ngakau o te tamariki a te tangata nei.

7. E i na, e tae mai te timataanga kiaia, e e rokoia aia e te mamae o te kopapa, e te matepongi, e te kaki vai, e te roiroi, e kare e rauka i te tangata ua kia akakoromaki i te reira, mari ra kia mate atu aia, i na oki, mei te pata ou rai e tae tona toto mei roto mai i te au ngai katoatoa o tona pakari no te maata o tona taitaia i te au angaanga kikino, e te viivii a tona iti tangata.

8. E e topaia tona ingoa, ko Iesu Mesia te Tamaiti a te Atua, te metua o te rangi e te enua, ko Tei Anga i te au mea katoatoa mei muatangana maira, e ka topaia tona metua vaine ki te ingoa ko Maria.

9. I na, e aere mai aia ki tona uaorai, kia rauka i te tamariki a te tangata nei te ora na roto i te akarongo ki tona ingoa, e i muri ake i taua au mea ra e manako ei ratou e, e tangata anake ua aia, e e tuatua e, e demoni tona, e ka papa ratou iaia, e ka akasatauro iaia.

10. E i te rā toru ra, e tu ei aia mei te mate maira, e i na, e tu aia e akava i to te ao nei, e i na, kua raveia teia au mea katoa nei kia tae te akavaanga tika ki runga i te au tamariki a te tangata nei.

11. I na oki, e riro katoa tona toto ei tarangaara na ratou tei inga no te ara a Adamu, ko tei mate ma te kite kore i to te Atua inangaro ia ratou, koia oki ko tei ara ma te kite kore.

12. Aue ra, Aue oki aia tei kite, e kua patoi aia i te Atua! Kare oki te ora e tae ki taua tangata ra, mari ra na roto i te tataraara e te akarongo i te Atu ra ia Iesu Mesia.

13. I tono mai ana oki te Atu ra te Atua i tona au peroveta tapu i rotopu i te au tamariki a te tangata nei, kia akakite atu i teianei au mea katoatoa ki te au kopu e ki te au basileia, e ki to te au reo katoatoa, e te au tangata e irinaki e, ka tae mai te Mesia, ka rauka ia ratou te mataraanga i ta ratou au ara, e ka rekareka ma te mataora maata, okotai rai tu, mei te mea e, kua tae takere mai ana aia ki rotopu ia rotou.

14. Kua kite ra te Atua e, e iti tangata marokiakia tona, e kua akono aia i tetai ture no ratou, koia oki te ture a Mose.

15. E kua akakite aia kia ratou i te au akairo, e te au angaanga umere, e te au akaraanga, e te au ata e manganui no tona taeanga mai, e kua tuatua katoa mai te au peroveta kia ratou no tona taeanga mai, kua akaketaketa ra ratou i to ratou ngakau, e kare ratou i kite e, e mea puapinga kore te ture a Mose, mari ra na roto i te tarangaara a tona ra toto.

16. E naringa ka rauka i te tamariki rikiriki te ara, kare e rauka ia ratou kia akaoraia; kareka ra, te tuatua atu nei au kia kotou e, e ao to ratou; no te mea, mei ia ratou i inga ia Adamu, e kare ra na ratou te kino, e riro katoa te toto o te Mesia ei tarangaara no ta ratou ara.

17. E teianei, te tuatua atu nei au kia kotou, kare e ingoa ke atu, kare oki e mataara ke, kare oki e ravenga ke e tae mai ei te ora ki te tamariki a te tangata nei, mari ra, na roto i te ingoa o te Mesia te Atu Mana Katoatoa.

18. I na oki, te akava nei aia, e e tika tana akavaanga, e kare rava te tamariki e akakoreia tei mate i te tamarikianga, ka inu ra te tangata i te mate i to ratou uaorai vaerua mari ra kia taakaaka ratou ia ratou uaorai, e e riro mei te tamariki rikiriki ra, e e irinaki ratou e, i vai ana te ora, e te vai nei, e e tae mai ïa, na roto oki i te toto tarangaara a te Mesia, te Atu Mana Katoatoa ra.

19. No te mea, ko te tangata tei inangaro i te au peu o teianei ao, e enemi ua rai aia i te Atua mei te ingaanga o Adamu, e tae mai ki teianei, e e tuatau ua atu, kia kore aia e kauraro i te tuatua a te Vaerua Tapu, e e akaruke i te au peu a te tangata kopapa nei, e e riro ei tangata tapu na roto i te tarangaara a te Mesia ra ko te Atu, e e riro oki mei te tamariki ra i te kauraro, te maru, te akaaka, e te akakoromaki, e te ki i te aroa, e ma te inangaro kia kauraro i te au mea katoatoa ta te Atu i inangaro kia tuku ki runga iaia, mei te tamaiti e kauraro oki i tona metua.

20. E teianei, te karanga atu nei au kia kotou, ka tae mai te tuatau ka totoa atu te kite o te Mesia ki roto i te au Basileia katoatoa, e te au kopu, e te au reo, e te au iti tangata.

21. E kia tae mai oki taua tuatua ra, kare tetai tangata e kitea ki mua i te Atua ma te apa kore, mari ra te au tamariki mearikiriki, e ko tei tataraara e tei akarongo i te ingoa o te Atu, te Atua Mana Katoatoa.

22. E i teia tuatau nei oki, kia oti taau apii anga atu i toou iti tangata i te au mea ta te Atu ta toou Atua i akaue kia koe na, kare atura ratou e kitea ma te apa kore i mua i te Atua, mari ra kia tau i te tuatua taku i akakite atu kia koe.

23. E teianei, kua tuatua atu au i te tuatua ta te Atua i akaue mai kiaku.

24. E te na ko maria te Atu, ka riro ïa ei kite no teianei iti tangata i te ra akavaanga; no reira, e akavaiaʼi ratou, te au tangata katoatoa, kia tau i ta ratou au angaanga, me e meitaki, me e kino ra.

25. E te au tangata kino ra, e vaooia ratou kia akara ma te rikarika i ta ratou au ara, e te angaanga viivii, e emi ei ratou mei mua i te aroaro o te Atu i te aue e te mamae mutu kore ra, kare e tika ia ratou kia oki mai, kua inu oki ratou i te mate i to ratou uaorai vaerua.

26. Kua inu ratou i te kapu o te riri o te Atua, kare i tika kia arai ia ratou kia kore e inu, kare katoa i tika kia arai ia Adamu kia kore e inga no tona rave anga i te kai raui ra; no reira kare e mana o te aroa ki runga ia ratou e tuatau ua atu.

27. E ko to ratou mamae ra, mei te roto ai e te teio ïa, kare roa tona ai e mate, e te kake ua atura tona auai ki runga e tuatau e tuatau ua atu. I pera mai te Atu i te akaue anga mai iaku nei. Amene.