1. E oti akera ia Mosaia te rave i ta tona metua tane i akaue mai kiaia ra, e i akakite atu oki i te reira ki to te enua katoatoa ra, kua putuputu maira te au tangata o te enua katoa kia aere ki te iero e akarongo i te tuatua ta te ariki ra ta Beniamina ka tuatua mai kia ratou ra.

2. E manganui ratou, e no te maata ia ratou kare e rauka i te tarē. Kua tupu ua atu rai ratou i te maata ra, e kua riro ei iti tangata maata i te enua.

3. Kua apai katoa mai ratou i te momua o ta ratou au anana, kia apai atu ratou i te atinga e te atinga karakaratio mei tei tau i te ture a Mose ra.

4. Kia akameitaki atura ratou i te Atu i to ratou Atua, tei arataki mai ia ratou mei te enua maira mei Ierusalema, tei akaora ia ratou i te rima o to ratou au enemi ra, tei iki oki i te au tangata tuatua tika ei au puapii no ratou, e tei iki oki i tetai tangata tuatua tika oki ei ariki no ratou, ko tei akatupu i te au i te enua ra i Zarahemela, e tei apii mai oki ia ratou kia akono i te au akaueanga a te Atua, kia mataora ratou e kia ki ratou i te aroa i te Atua e i te tangata katoatoa ra.

5. E tae akera ratou ki te iero, patia iora ratou i to ratou au puakapa ki reira, te au tangata katoatoa e tona kopu tangata, ko tana vaine, e tana au tamariki tamaroa, e tana au tamariki tamaine, e ta ratou au tamariki tamaroa, e ta ratou au tamariki tamaine, mei te mataiapo e tae ua atu ki te teinga openga, e kua taka ke tetai kopu tangata i tetai e ope ua ake.

6. E kua patia akera ratou i to ratou au puakapa i te ngai o te iero, te tangata katoa e tona puakapa ma te ngutupa i te pae iero ra, e raukaʼi ia ratou te noo ua ki roto i to ratou au puakapa, ka akarongo ei i te tuatua ta te ariki ra ta Beniamina ka tuatua atu kia ratou ra.

7. No te maata o te tangata i kore ei e rauka ia Beniamina kia apii atu ia ratou katoatoa i roto i te aua o te iero ra, no reira, kua akatuia tetai are teitei, kia rauka i te au tangata katoatoa te akarongo i te tuatua tana ka tuatua atu kia ratou.

8. E akamata iora aia i te tuatua atu ki tona ra iti tangata mei runga i tona patu, kare ra e rauka ia ratou katoatoa i te akarongo ki tana tuatua, no te maata o te urupu ra, no reira kua akaue aia kia tataia tana au tuatua, e kia apainaia atu te reira ki te au tangata kare e akarongo ki tona reo, kia rauka katoa ia ratou kia akarongo ki tana au tuatua.

9. Ko teia ïa te au tuatua tana i tuatua atu e tana i akaue oki kia tataia, ko te na ko atu e: E aku au taeake, tei akaputuputu mai nei, e tei rauka ia kotou kia akarongo i taku tuatua, taku ka tuatua atu kia kotou i teia ra nei, kare oki au i akaue ia kotou e aere mai ki konei e tuatua au i te au tuatua puapinga kore, kia akarongo ra kotou iaku, e kia akavaitata i to kotou taringa kia akarongo, e to kotou ngakau kia marama, kia akakiteia atu te au mea ngaro a te Atua kia kotou.

10. Kare oki au i akaue atu ia kotou e aere mai i ko nei kia mataku kotou iaku nei e kia manako oki kotou e, kare au i te tangata o te kopapa nei.

11. E tangata ua rai au mei ia kotou katoa rai te tu, e tika oki kia rokoia katoa oki au e te au tu paruparu o te kopapa nei e to te ngakau katoa oki, i ikiia ra au e teianei iti tangata, e i akatainuia au e toku metua ra, e i akatikaia oki au e te rima o te Atu ra, kia riro au ei tutara e, ei ariki ki runga i teianei iti tangata; kua akonoia e kua akaoraia oki au e tona mana aite kore, kia akono atu au ia kotou ma te maroiroi, e te inangaro, e te ririnui katoa oki ta te Atu i oronga mai kiaku.

12. E te tuatua atu nei au kia kotou e, kua akatikaia au kia riro au ei tavini no kotou e tae ua atu ki teianei rā, kare oki au i inangaro i te ario, e te auro, e tetai atu au apinga na kotou.

13. Kare oki au e akatika kia tukuia kotou ki roto i te pia tapekaanga, e kia riro tetai o kotou ei tuikaa na tetai, e kia ta kotou i te tangata, e kia rave ua, e kia keia, e kia akaturi, kare oki au i akatika kia rave kotou i tetai au mea tau kore, kua apii ra au ia kotou kia akono i te akaueanga a te Atu i te au mea katoatoa tana i akaue mai kia kotou.

14. E ko au uaorai, kua rave katoa au i te angaanga ma toku uaorai rima kia tauturu au ia kotou, e kia kore oki kotou e akateimaaia ki te tero, e kia tauturu au ia kotou, e kia kore te apainga teimaa e tae ki runga ia kotou; e kia riro oki kotou ei kite i teianei ra i te au mea taku e tuatua nei.

15. Ina ra, e aku au taeake, kare au i rave i teia au mea nei kia rauka iaku i te akateitei, kare oki au i akakite atu i teia au mea ei tapepeanga ia kotou; kua akakite ra au i te reira, kia kite kotou e, ka rauka iaku te tu ki mua i te Atua i teianei ra ma te ngakau tiama.

16. I na, i tuatua akenei au kia kotou e, kua ope toku puke rā i te riro anga ei itavini ia kotou, kare ra au e inangaro i te akatietie, e tavini ua ra oki au no te Atua ra.

17. E i na, te akakite atu nei au kia kotou i teia au mea nei kia kite kotou i te pakari; kia kite oki kotou e, me tavini kotou i to kotou au taeake nei, e tavini oki kotou no to kotou Atua ra.

18. I na, kua tuatua kotou iaku e, e ariki au no kotou, e mei te mea ko au ta kotou e karanga ei ariki no kotou, e kia riro ei tavini no kotou, kare ainei e tau kia riro kotou ei tavini tetai i tetai?

19. E i na oki, me kua tau ia kotou i te akameitaki mai iaku nei, i tei karangaia e kotou i te ariki no kotou, e tei akapou oki i ona puke ra ei tavini no kotou, e e tavini ua ra oki au no te Atua, kia maata rava atu ta kotou akameitakianga atu i to kotou Ariki i te rangi ra.

20. E tuatua atu au kia kotou, e aku au taeake, kia ope te ririnui katoatoa o to kotou au vaerua i te akameitaki anga e i te akapaapaa anga i te Atua ra tei anga ia kotou, e tei tiaki, e tei akaora oki ia kotou, e tei akatupu i te rekareka ia kotou, e tei akatika kia noo kotou ma te au tetai ki tetai.

21. E tuatua atu au kia kotou, mei te mea e akono kotou iaia i tei anga ia kotou i muatangana ra, e tei akaora ia kotou i tera rā i tera rā i te oronga anga mai i te aʼo no kotou kia ora, e kia aere, e kia rave oki i to kotou uaorai inangaro, e i te tauturu mai ia kotou i tera atianga, e tuatua atu au, kia akono kotou iaia ma to kotou ngakau katoa, e au tavini puapinga kore ua rai kotou i reira.

22. E i na, kua inangaro anake aia kia akono kotou i tana au akaueanga e kua taputou aia kia kotou e, me ka akono kotou i tana au akaueanga, ka puapingaia kotou i te enua nei; kare rava aia e akaruke i tana i tuatua maira; no reira, me akono kotou i tana ra akaueanga ka akameitaki e ka akamanuia aia ia kotou.

23. E teianei, kua anga aia ia kotou e kua oronga mai oki i to kotou ora kia kotou, e kua riro ia kotou ei kaiou nana. Te mea mua ïa.

24. Te rua ra, kua inangaro aia kia akono kotou i tana i akaue mai kia kotou na, e mei te mea e pera kotou, ka akameitaki oki aia ia kotou, no reira kua tutaki aia ia kotou i reira. Kua riro ra oki kotou ei kaiou nana e teia nei, e e tuatau ua atu e no reira, eaa tikai kotou e akateitei ei?

25. E teianei, e ui atu au, e tika ainei ia kotou kia akapaapaa ia kotou uaorai? Te tuatua atu nei au, kare. Kare e tika ia kotou kia tuatua e kua tau ia kotou i te one pueu o te enua nei; kua angaia ra kotou no te one pueu o te enua; ina ra, nona ïa, na tei anga ia kotou.

26. E kare oki au, ko tei karangaia e kotou e ariki no kotou, meitaki atu ia kotou; no te one pueu katoa oki au nei. E kua kite kotou e, kua pakari au, e kua vaitata oki au i te tuku atu i teianei kopapa ki te one pueu no reira mai aia ra.

27. E mei taku i tuatua akenei kia kotou, kua angaanga oki au na kotou, i te aere anga ma te ngakau apa kore ki mua i te Atua; e kua akaue au kia putuputu mai kotou i teia nei rā, kia kore au e akapaia, e kia kore oki to kotou toto e iri mai ki runga iaku, ka tu ei au kia akavaia e te Atua no te au mea tana i akaue mai kiaku no kotou.

28. E te tuatua atu nei au kia kotou, kua akaue au kia akaputuputu mai kotou kia ma toku kakau i to kotou toto i teianei, i te tuatau i vaitata au i te aere ki raro i toku mateanga, kia aere au ki reira ma te au, e kia kapitiia mai toku vaerua mate kore i te au urupu imene i runga ra, kia imene i te akapaapaaanga ki te Atua tuatua tika ra.

29. Kua tuatua atu oki au kia kotou na e, kua akaputuputu mai au ia kotou kia akakite atu au kia kotou e, kare e rauka akaou iaku kia riro akaou ei puapii e ei ariki no kotou.

30. I teianei rai oki, kua ruketekete ua toku nei kopapa kia tamata au i te tuatua atu kia kotou, te tauturu mai nei ra te Atu te Atua iaku nei, e kua akatika mai oki aia kia tuatua atu au kia kotou, kua akaue mai oki iaku kia akakite atu au kia kotou i teianei rā e, kua riro taku tamaiti ko Mosaia ei ariki, e ei tutara no kotou.

31. E teianei, e aku au taeake, kua inangaro au kia rave ua rai kotou mei ta kotou i rave i te tuatau i topa akenei. Mei ta kotou oki i akono i taku au akaueanga, e i te au akaueanga oki a toku metua, i akameitakiia kotou e i akaoraia oki i te rima o to kotou au enemi, kia pera katoa kotou i te akono i te au akaueanga a taku tamaiti, koia katoa oki, te au akaueanga a te Atua, tana ka oronga atu kia kotou na roto iaia, e ka puapinga oki kotou i te enua nei, e kare oki to kotou au enemi e mana ki runga ia kotou.

32. Ina ra, e aku au taeake, matakite ra, ko te tupu aea te pekapeka i rotopu ia kotou, e ko te akono aea kotou i te vaerua kino tei tuatuaia e toku metua ra e Mosaia.

33. I na oki, kua akapapaia te utunga no te aronga tei akono i taua vaerua ra, mei te mea, e akarongo aia iaia, e kia noo ua aia i roto i tana au ara e tae atu ki te taime e mate ei aia, kua inu aia i te mate no tona uaorai vaerua, e e rauka oki iaia te mate mutu kore ei tutaki nana, no te mea kua akaapa aia i te ture a te Atua mei tei kore e tau i tana i kite.

34. E tuatua atu au kia kotou, kare tetai i rotopu ia kotou tei kore i apiiia i taua au mea ra, mari ra ta kotou au tamariki mearikiriki, kua kite oki kotou e, kua riro ia kotou ei kaiou na to kotou Metua i te rangi ra e tuatau ua atu, e tau oki kia oronga atu kiaia i ta kotou au apinga katoatoa e kotou katoa; e kua apiiia oki kotou i te akapapaanga tuatua tei roto te reira te au totou i tuatuaia e te au peroveta tapu ra, e tae rava mai ki te tuatau i akaruke mai ei to totou metua ko Lihai ia Ierusalema ra.

35. E te au tuatua katoa oki i tuatuaia e to tatou au metua e tae rava mai ki teia ra nei. E i na oki, kua tuatua katoa ratou i ta te Atu i akaue mai kia ratou ra; e no reira e tuatua mou rai ïa e e tuatua tika oki.

36. E teianei, e tuatua atu au kia kotou, e aku au taeake, kia ope teia nei au mea katoa i te kiteaia e i te apiiia oki kia kotou, e mei te mea e ara kotou i reira, e e aere ke atu i tei tuatuaia ra, ka akaruke oki kotou i te Vaerua o te Atu ra, kia kore ona ngai i roto ia kotou kia arataki ia kotou na te arataa o te pakari ra e raukaʼi ia kotou i te meitaki e te manuia e te ora oki.

37. E tuatua atu au kia kotou e, ko te tangata ka akapera, te patoi ua atu ra aia i te Atua, no reira te akarongo ra aia i te vaerua kino e ka riro oki aia ei enemi i te au tuatua tika katoa ra, kare o te Atu ngai i roto iaia i reira, no te mea kare aia e noo i roto i te nao tapu kore ra.

38. E teianei, kia kore taua tangata ra e tataraara, e kia noo ua ra aia e mate ua atu ei enemi ki te Atua, na te tuatua tika tapu ra e akaaraara i roto i tona vaerua mate kore kia kite pu ua aia i tana uaorai au ara e emi atu ei aia mei mua atu i te aroaro o te Atu, e e akaki i tona umauma i te manako i tana au ara, e te mamae, e te aue, mei te ai mutu kore ra, ko tei ka ua atu tona mura ki runga e tuatau ua atu.

39. E teianei, e tuatua atu au kia kotou, kare o te aroa mana ki runga iaia, ko tona openga i reira, ko te mate mutu kore ïa.

40. E te au tangata pakari, e te au tangata mapu, e te au tamariki oki tei kite i taku nei tuatua, i tuatua pu ua oki au kia marama kotou, e te pure atu nei au kia maara i te turanga rikarika o te au tangata i topa ki roto i te ara ra.

41. Kua inangaro oki au kia akamaara katoa kotou i te turanga meitaki e te mataora o te au tangata e akono i te au akaueanga a te Atua ra. I na oki, e akameitakiia ratou i te au mea katoatoa, no te kopapa nei e no te Vaerua katoa oki; e mei te mea e akono ua atu rai ratou e tae ua atu ki te openga, e arikiia ratou ki runga i te rangi ra kia noo ratou ma te Atua katoa i roto i te mataora mutu kore ra. E akamaara, e akamaara e, e tuatua mou teia au tuatua nei, e no te Atu ra na te Atua te reira i tuatua maira.