1. Kua akaputuputu maira te ariki ra ko Mosaia i te au tangata katoatoa ra.

2. E teianei kare e maata te au tamariki a Niphai, koia oki te uanga a Niphai ra mei te au tangata o Zarahemela ra, koia oki te uanga o Muleke, e ko tei aru mai oki iaia ki te metepara ra.

3. Kua iti mai oki te au tangata o Niphai e to Zarahemela i to te ngati Lamana, e kare oki ratou e tae ki te apa o te maataanga.

4. Kua akaputuputu te au tangata katoatoa o Niphai ra e te au tangata katoatoa oki o Zarahemela ra, e kua akaputuputuia ratou ki roto i nga pupu e rua ra.

5. E kua tatau atura a Mosaia, e kua akaue katoa atu aia kia tatauia te papaanga tuatua o Zenipha ki tona ra au tangata; I na, kua tatau atura aia i te papaanga tuatua o te au tangata o Zenipha, mei te tuatau i akaruke ei ratou i te enua ra ko Zarahemela ra, e tae roa mai ki te tuatau i oki akaou mai ei ratou ra.

6. E kua tatau katoa atura aia i te tuatua o Alama e tona au taeake, e to ratou au tumatetenga katoatoa oki, mei te tuatau i akaruke ei ratou i te enua ra ko Zarahemela ra, e tae roa mai ki te tuatau i oki akaou mai ei ratou.

7. E oti akera ia Mosaia i te tatau anga i te papaanga tuatua, ki tona au tangata i noo ki taua enua ra, kua va ua ra ratou e kua ki i te umere.

8. No te mea kare ratou i kite e eaa ta ratou ka manako, e kia kite ratou i te iti tangata i akaoraia i te tuikaaanga, ki akera ratou i te rekareka.

9. E kia akamanako ratou i to ratou au taeake i tamateia e te ngati Lamana ra, mii akera ratou, e kua maringi akera te roimata ma te tumatetenga maata.

10. E kia akamanako oki ratou i te meitaki o te Atua e tona ra mana i te akaora anga ia Alama e tona au taeake mei roto mai te rima o te ngati Lamana ra, e i te tuikaaanga oki, kua akateitei atura ratou i to ratou reo, i te akameitaki atu i te Atua.

11. E kia akamanako ratou i te ngati Lamana ra, ko to ratou au taeake, e to ratou tu kino e te viivi ra, mamae iora ratou, e inangaro oki i te meitaki no to ratou au vaerua.

12. Ko te au tamariki a Amurona e tona au taeake katoa, tei rave i te au tamaine a te ngati Lamana ei vaine na ratou ra, kua riri ratou i te akonoanga a to ratou ai metua, e kare atura ratou i akatika kia tuatuaia ratou ki te ingoa o to ratou ai metua ra, kua rave mai ra ratou i te ingoa o Niphai, kia tuatuaia ratou ei au tamariki na Niphai, e kia tarē katoaia ratou ki rotopu i te tangata i tuatuaia ko te ngati Niphai.

13. E teianei, kua tarēia te au tangata katoatoa o Zarahemela ei ngati Niphai, e kua akaperaia no te mea kare te basileia i tukuia ki tetai tangata ke mari ra, ki te uanga a Niphai ra.

14. E oti akera a Mosaia i te tuatua e i te tatau i te tuatua ki te tangata, kua inangaro aia kia tuatua katoa a Alama ki te tangata.

15. E kia akaputuputu akera ratou ki roto i tetai au urupu mamaata, kua tuatua atura a Alama kia ratou; e kua aere atura aia ki tera pupu ki tera pupu i te ako anga atu i te tataraara e te akarongo ki te Atu ra.

16. E kua ako atura aia ki te au tangata o Limihai e tona au taeake, e te au tangata katoatoa i akaoraia i te tuikaaanga ra, kia akamaara ratou e, ko te Atu rai tei akaora ia ratou ra.

17. E oti akera ia Alama i te apii atu i te au tangata no runga i te au mea e manganui, e kia akaoti aia i tana tuatua anga atu kia ratou ra, kua inangaro iora te ariki ra ko Limihai kia bapetizoia aia; e kua inangaro oki tona au tangata katoatoa kia bapetizoia ratou.

18. E teianei, kua aere atura a Alama ki raro i te vai, e kua bapetizo iora aia ia ratou, i na, kua bapetizo aia ia ratou mei tana i bapetizo i tona au taeake ki roto i te vai ra i Momoni; e te au tangata katoatoa i bapetizoia ra, kua riro ratou e au tangata no te akonoanga a te Atua ra; e kua pera oki no to ratou akarongo i te au tuatua a Alama.

19. E kua akatika atura te ariki ra ko Mosaia kia akatupu a Alama i te au ekalesia e pini ua ake te enua ra ko Zarahemela; e kua oronga katoa atura aia i te mana kiaia, kia rauka iaia i te akamana i te au taunga, e te au puapii ki runga i te au ekalesia ra.

20. No te maata oki o te au tangata i akaperaiaʼi no te mea kare e rauka i te puapii okotai i te tiaki ia ratou katoatoa ra; e kare katoa e rauka ia ratou kia akarongo ki te tuatua a te Atua ki te akaputuputuanga okotai.

21. Kua akaputuputu ratou ki roto i tetai au akaputuputuanga i tuatuaia te au ekalesia; tei roto oki i te au ekalesia katoatoa te au taunga e te au puapii, e kua apii atu te au taunga katoatoa i te tuatua tei tukuia mai kia ratou e te vaa o Alama ra.

22. E manganui te ekalesia, okotai ra akonoanga; koia oki te Akonoanga a te Atua ra; e kare oki tetai mea i apiiia ki roto i te au ekalesia, mari ra, te tataraara e te akarongo i te Atua ra.

23. E itu oki ekalesia i te enua ra i Zarahemela. E ko ratou tei inangaro i te rave mai ki runga ia ratou i te ingoa o te Mesia me kore ra, te ingoa o te Atua, kua piri ratou ki te au ekalesia a te Atua ra.

24. E kua tuatuaia ratou, ko te iti tangata ratou o te Atua ra, e kua tuku mai oki te Atu i tona vaerua ki rungao ia ratou, e kua akameitakiia ia ratou e kua puapinga oki ratou i te enua ra.