1. I na, kua tataraara iora Alama, ko tei oro mei mua atu i te au tavini o te ariki ra ko Noa, i tana au ara e tana angaanga kino, e kua aere muna ua atura aia ki rotopu i te iti tangata, e kua apii atura i te tuatua a Abinadaia.

2. I na, no runga i te mea e tupu a muri atu, e i te tuakaouanga oki o tei mate, e i te akaoraanga i te tangata, ko tei akatupuia na roto i te mana, e te mamae, e te mate o te Mesia, e tona tuakaouanga, e tona kake anga atu ki runga i te rangi.

3. E kua apii aia ia ratou katoatoa i tei akarongo i tana tuatua. E kua apii muna aia ia ratou kia kore te reira e kiteaia e te ariki. E manganui oki tei irinaki i tana au tuatua.

4. E kua aere atura ratou katoatoa tei akarongo iaia, ki tetai ngai i tuatuaia ra, ko Momoni, no te ariki oki te ingoa, tei te kotinga o te enua ra i nooia e te au puaka taae ra i tera tuatau i tera tuatau.

5. E teianei, tei Momoni tetai vai puipui ma, e e pu ngangaere tetai tei vaitata ki te vai e kua aere a Alama ki reira e kua pipini aia ki reira i te ao i to te ariki ra kimianga iaia.

6. E ratou katoatoa tei irinaki iaia, kua aere ki reira e akarongo i tana au tuatua.

7. E ope akera nga rā e manganui, kua putuputu maira te au tangata e manganui ki te ngai i Momoni, kia akarongo ki te tuatua a Alama. I na, kua putuputu maira te aronga katoa tei irinaki i tana tuatua kia akarongo iaia. E kua apii atura aia ia ratou, e ako atura kia ratou i te tataraara, e te akaoraanga, e te akarongo oki ki te Atu.

8. E kua tuatua atura aia kia ratou, i na, teia te vai o Momoni; i tuatua akaperaia oki taua vai ra. E teianei, no te mea, kua inangaro kotou kia tomo ki roto i te anana a te Atua, e kia tuatuaia i tona iti tangata, e kua inangaro kotou i te tauturu tetai ki tetai i te apai anga i ta kotou au apainga, kia mama te reira;

9. Koia ia, e i te aue ma te aronga tumatetenga; e i te akapumaana ia ratou i tei tau kia akapumaanaia, e kia tu ki runga ei kite no te Atua i te au ngai e i te au tuatau, e i te au mea katoatoa, e nooia e kotou ra, e tae ua atu ki te mateanga, kia akaoraia kotou e te Atua, e kia tatauia ki roto i to te tuakaouanga mua, kia rauka te ora mutu kore ia kotou.

10. E teianei, te tuatua atu nei au kia kotou, mei te mea, ko teia te inangaro o to kotou ngakau, eaa e kore ei kotou e bapetizoia ki te ingoa o te Atu ei akakite ki mua iaia e, i papau ana kotou i tetai koreromotu kiaia ra, kia akono kotou iaia, e kia akono i tana au akaueanga, kia maata atu rai tona riringi anga mai i te vaerua ki runga ia kotou?

11. E kia akarongo akera te tangata i taua au tuatua nei, kua pokarakara ratou i to ratou rima i te mataora, e kua kapiki atura ratou, ko te inangaro te reira o to matou ngakau.

12. E teianei, kua rave atura Alama ia Hilama, ko te mua oki ïa, e kua aere atura e tu iora ki roto i te vai, e kua kapiki atura, na ko atura, E te Atu, e riringi mai koe i toou Vaerua ki runga i toou tavini, kia rave aia i teianei angaanga ma te ngakau tika.

13. E kia tuatua akera aia i teianei au tuatua, tei runga maira iaia te Vaerua o te Atu, e kua karanga atura aia: E Hilama, no te mana i orongaia mai no ko mai i te Atua Mana Katoatoa, te bapetizo atu nei au ia koe ei kite e, i papau ana koe i te koreromotu kia akono iaia e tae ua atu ki te mate o toou kopapa nei; e kia riringiia mai te Vaerua o te Atua ki runga ia koe, e kia oronga mai aia i te ora mutu kore noou na roto i te akaoraanga o te Mesia, tana i akateateamamao mei muatangana maira o te ao nei.

14. E akaoti akera Alama i teianei au tuatua, kua ngaromia iora Alama raua ko Hilama ki raro i te vai; tu akera raua, e kua aere maira mei roto mai i te vai ma te mataora, kua ki oki i te Vaerua.

15. E teianei, kua rave a Alama i tetai tangata ke, aere akaou atura ki roto i te vai, e kua bapetizo iaia mei tana i bapetizo i te tangata mua ra, kare ra aia i aere akaou ki raro i te vai.

16. E kua pera aia i te bapetizo anga ia ratou katoatoa i tei tae ki taua ngai ra ko Momoni: E e rua anere ma ā ïa tangata kia tatauia; koia ia, kua bapetizoia ratou ki roto i te vai i Momoni, e kua akakiia ratou ki te meitaki o te Atua.

17. E kua tuatuaia ratou e, ko te Akonoanga a te Atua, koia oki te Akonoanga a te Mesia, mei taua tuatau maira. E te aronga katoa i bapetizoia na roto i te tika e te mana o te Atua ra, kua kapitiia mai ratou ki tana akonoanga.

18. E no te mana o te Atua tei rauka ia Alama, kua akataoanga atu aia i tetai au tangata ei taunga, koia oki, okotai tangata i roto i te rima ngauru, ko tana ïa i akono ei taunga, kia ako ia ratou e kia apii ia ratou ki te au mea no te basileia o te Atua.

19. E kua akaue atura aia kia ratou, auraka e apii i tetai mea, mari ra ki te au mea tana i apii, e tei tuatuaia e te vaa o te au peroveta tapu ra.

20. Koia oki, kua akaue atu aia kia ratou, auraka e ako i tetai mea, mari ra, te tataraara e te akarongo i te Atu, ko tei akaora i tona ra iti tangata.

21. E kua akaue atu aia kia ratou, auraka e taumaro tetai ki tetai, kia akara ki mua ma te akakoroanga okotai e te bapetizo okotai, e kia taokotaiia to ratou ngakau i te aroa tetai ki tetai.

22. E kua pera aia i te akaue anga ia ratou kia ako. E kua pera oki ratou i te riro anga ei tamariki na te Atua.

23. E kua akaue atu aia ia ratou kia akono i te ra Sabati, kia akatapuia ïa, e kia akameitaki atu i te Atua i te au rā katoatoa.

24. E kua akaue atu oki aia i te au taunga tana i akataoonga, kia angaanga ma to ratou uaorai rima kia rauka to ratou puapinga.

25. E kua akatakaia e tai rā i roto i te au epetoma katoatoa kia akaputuputu mai ratou kia apii i te tangata, e kia akamori i te Atu i to ratou Atua, e pera katoa ki te au rā e rauka ia ratou kia akaputuputu mai ratou ia ratou uaorai ki te ngai okotai.

26. E auraka oki te au taunga e irinaki ki runga i te tangata no to ratou puapinga; kia rauka ra ia ratou te aroa o te Atua; kia maroiroi ratou i te Vaerua, i te kite o te Atua, kia apii ratou ma te mana e te ririnui no ko mai i te Atua.

27. E kua akaue katoa atura Alama kia oronga te tangata o te akonoanga i ta ratou apinga, te tangata katoatoa kia tau ki tana; me maata ta tetai, e maata tana ka oronga atu, e mea meangiti ta tetai, e meangiti ua oki tei inangaroia mai; e te tangata kare ana, ka orongaia atu kiaia.

28. E i pera ratou i te oronga anga atu i to ratou puapinga ma te ngakau tae, e kia tau ki to ratou inangaro ki te Atua, e ki te au taunga tei ngere, koia ia, e ki te au tangata ravarai i ngere e i taaka ua ra.

29. E kua tuatua atura aia i te reira, no te mea, kua akaueia aia e te Atua ra; e kua aere ratou ki mua i te Atua ma te tiratiratu, i te tauturuanga atu tetai ki tetai, i te pae kopapa e i te pae vaerua katoa oki, mei tei tau ki to ratou ngere e to ratou inangaro.

30. E teianei, kua raveia te reira au mea ki Momoni; koia oki, i vaitata ki te vai o Momoni, i te vaorakau oki i vaitata ki te vai o Momoni, aue, te manea i te ngai o Momoni, e te vai o Momoni, e te vaorakau o Momoni, ki te mata o te tangata tei tae ki te kite i to ratou Akaora i reira; i na, e ao to ratou no te mea, ka akapaapaa ratou iaia na roto i te reo imene e tuatau ua atu.

31. E kua raveia teianei au mea ki te kotinga o te enua ra, kia kore te reira e kiteaia e te ariki.

32. Ina ra, kua kite te ariki i tetai au angaanga a tona iti tangata, e kua tono atura aia i tona au tavini kia akara i te reira. I te rā i akaputuputu mai ei ratou ia ratou uaorai kia akarongo ki te tuatua na te Atu ra, kua kitea e te ariki.

33. Kua tuatua maira te ariki, te titau ra a Alama i te tangata kia patoi iaia; no reira i tono atu ei aia i tona nuku e tamate ia ratou.

34. Kua akakiteia ra a Alama e te iti tangata o te Atu i te aere anga mai o te nuku o te ariki ra; no reira kua rave ratou i to ratou au puakapa e to ratou au ngutuare tangata e aere atura ki roto i te metepara.

35. E ā anere e rima ngauru oki tangata o ratou.