1. E akaoti akera Abinadaia i teianei tuatua, kua akaue atura te ariki i te au taunga kia apai atu iaia, e kua akaue atu oki kia taiaia aia.

2. I noo ana tetai tangata i rotopu ia ratou, ko Alama tona ingoa, e e uanga oki aia na Niphai. E tangata mapu ua aia, e kua irinaki aia ki te au tuatua ta Abinadaia i tuatua mai, kua kite oki aia i te au ara ta Abinadaia i akakite kia ratou ra; no reira i akamataʼi aia i te pati akatenga atu ki te ariki ra, kia kore aia e riri ia Abinadaia kia tuku ua ra iaia kia aere ma te au.

3. Maata rava atura te riri o te ariki i reira, e kua akaue atura kia tuaruia a Alama ki vao ia ratou, e kua unga atura aia tona au tavini kia ta iaia.

4. Oro atura aia na mua ia ratou, e pipini iora, e kare rava aia i kitea e ratou. E kua pipini aia i nga rā e manganui, kua tata aia i te au tuatua katoatoa ta Abinadaia i tuatua mai.

5. Akaue atura te ariki ra kia takapini tona au tiaki vaeau ia Abinadaia e opu iaia; kua tapeka iora ratou iaia, e titiriia atura aia ki roto i te are tapekaanga.

6. E ope akera e toru rā, kia oti oki te uipaanga i tona au taunga, kua akaue atura aia kia apainga akaouia mai aia ki mua iaia ra.

7. E kua tuatua maira aia kiaia, e Abinadaia, kua kite matou i tetai akaapaanga ia koe, e tau oki ia koe te mate.

8. I tuatua mai oki koe e, ka tae mai te Atua uaorai ki rotopu i te tamariki a te tangata nei; e teianei, no te reira, ka taiaia koe, me kare koe e akakore i te au tuatua kino taau i tuatua mai noku e no toku ra iti tangata.

9. Kua karanga atura Abinadaia kiaia, Te tuatua atu nei au kia koe, kare rava au e akakore i te au tuatua taku i tuatua kia koe, e i teianei iti tangata, no te mea e tuatua tika ïa; e kia kite koe e, e tuatua tika ïa, kua akatika ua au kia topa au ki roto i to rima na.

10. I na, e akakoromaki ua au e tae ua atu ki te mate, kare ra au e akakore i taku ra au tuatua, e ka riro oki te reira ei akaapaanga ia koe. E mei te mea e, ka ta mai koe iaku, kua akamaringi koe i te toto o te tangata apa kore, e ka riro katoa te reira ei akaapaanga ia koe i te rā openga ra.

11. Kua vaitata akera te ariki ra ko Noa i te tuku atu iaia, no te mataku oki i tana au tuatua, e kua mataku oki aia ko te tae mai aea te akaapaanga a te Atua ki rungao iaia.

12. Kua akateitei ra te au taunga i to ratou reo iaia, e kua akamata iora i te akaapa iaia, i te na ko anga mai e: Kua akaapa mai aia i te ariki nei. Kua tupu i reira te riri o te ariki iaia ra, e kua tuku atura aia iaia kia taiaia.

13. Rave iora ratou iaia, e kua tapeka iaia, e kua pāpā iaia ki te rakau ai e tae rava atu ki te mate.

14. E kia pakapaka aia i te ai, kua kapiki atura aia kia ratou, na ko atura;

15. I na, mei ta kotou e rave mai nei kiaku, ka pera katoa ta kotou uanga i te takinga kino i te au tangata e manganui, koia oki i te mamae o te mate i te ai; e ka peraia ratou no to ratou akarongo i te ora a te Atu to ratou Atua ra.

16. Ka riro katoa kotou i te mate i te au tu maki katoatoa no ta kotou tuatua tika kore ra.

17. I na, ka pāpāia kotou ki tera rima, ki tera rima, e arumakiia ki tera ngai ki tera ngai, mei te anana mamoe taetaevao ra e e akapueurikirikiia e te au puaka taae e te taetaevao.

18. Ei taua rā ra, e arumakiia kotou, e e opukia oki e te rima o to kotou au enemi, ei reira kotou e mamae ei, mei taku e mamae nei, i te mamae o te mate i te ai.

19. E pera oki te Atua i te akautunga i te tangata i takinga kino i tona ra iti tangata. E te Atua, e ariki mai koe i toku vaerua.

20. E oti akera ia Abinadaia i te tuatua i teianei au tuatua, kua topa iora aia ki raro, e kua mate aia i te ai; i na, kua taiaia aia no te mea kare aia i akakore i te au akaueanga a te Atua ra; e kua riro tona mate ei akairo e, e tuatua tika tana i tuatua maira.