1. E kua oki akaou akera te nuku o te ariki ra, kua puapinga kore ua ra to ratou kimianga i te au tangata o te Atu.

2. E i na oki, kua meangiti te nuku o te ariki, i akameangitiia oki ratou, e kua tupu iora te maveteanga i rotopu i te toeanga o te tangata.

3. E kua akamata atura te pae meangiti o te au tangata i te tuatua akamataku ki te ariki ra, tupu iora te maro maata i rotopu ia ratou.

4. E tangata tetai i rotopu ia ratou, ko Kitiona tona ingoa e tangata ririnui aia, e e enemi oki i te ariki, i kiriti ei aia i tana koke, tuatua taputou iora aia ma te riri kia ta aia i te ariki.

5. Tamaki atura raua ko te ariki; e kite akera te ariki e, kua vaitata aia i te vi iaia, oro atura aia e tae atura ki runga i te patu i vaitatao ki te iero ra.

6. Arumaki atura Kitiona iaia, e kua vaitata aia i te tae ki runga i te patu e ta i te ariki, e akara akera te ariki i tona mata e pini ua ake i te pae enua ra i Semeroni, e i na, tei roto mai te nuku o te ngati Lamana, i te kotinga o te enua ra.

7. Kapiki ua maira te ariki ma te aue o tona ngakau, na ko maira, E Kitiona, e aroa mai ana iaku, teia mai nei oki te ngati Lamana ki runga ia tatou e e ta mai ratou ia tatou; i na, ka ta ratou i toku ra iti tangata.

8. Kua maata atura to te ariki taitaia i tona uaorai ora e to tona ra iti tangata. Kua aroa ra a Kitiona iaia.

9. Akaue atura te ariki i tona ra iti tangata kia oro ke atu mei mua i te ngati Lamana, e na mua oki aia ia ratou i te oro anga atu ki te metepara ra, kua oro ratou e ta ratou au vaine, e ta ratou au tamariki oki.

10. E kua arumaki atura te ngati Lamana ia ratou e tae atura ki runga ia ratou, akamata iora i te ta ia ratou ra.

11. Kua akaue atura te ariki ia ratou kia vaoo te au tane katoatoa i ta ratou au vaine, e ta ratou au tamariki, e kia oro mei mua atu i te ngati Lamana.

12. E manganui ra te tane tei kore i akaruke ia ratou, kua inangaro ratou kia noo e kia mate ki te pae ia ratou. Kua akaruke ra te toenga i ta ratou au vaine e ta ratou au tamariki, e oro ke atura.

13. E ko ratou tei noo vaitatao ki ta ratou au vaine e ta ratou au tamariki ra, kua tono ratou i ta ratou au tamaine manea kia tu atu ki mua ia ratou e kia pati ki te ngati Lamana e, auraka ratou e ta mai ia ratou.

14. Kua aroa mai te ngati Lamana ia ratou i reira, kua akara rekareka oki ratou i te manea o ta ratou au tamaine ra.

15. No reira kua akaora te ngati Lamana ia ratou, e kua apaina tuikaaia ratou ki te enua ra ko Niphai; e kua akatika kia noo ratou ki te enua ra, me ka tuku maira ratou i te ariki ra ia Noa ki te rima o te ngati Lamana ra, e kia oronga ua atu i ta ratou puapinga e tae ua atu ki te apa o ta ratou au puapinga katoatoa, te apa o ta ratou auro, e ta ratou ario, e te apa o te au apinga oko maata, e kia pera ua rai ratou i te apai anga i te tero na te ariki o te ngati Lamana i tera mataiti i tera mataiti.

16. Tei rotopu oki i te au tangata tei rave tuikaaiaʼi ra tetai tamaiti a te ariki ra, ko Limihai tona ingoa.

17. E kua inangaro a Limihai kia kore tona metua tane e taiaia, kua kite ra a Limihai i te au ara a tona ra metua, koia ra, e tangata tuatua tika oki aia.

18. Kua tono muna atura Kitiona i te au tangata ki roto i te metepara kia kimi aere i te ariki e ratou katoa tei kapiti atu kiaia ra. E aravei atura oki ratou i te au tangata i te metepara, ko ratou katoatoa, mari ra, te ariki e tona ra au taunga.

19. I taputou ana oki ratou ki roto i to ratou ngakau e, ka oki akaou ratou ki te enua ra ko Niphai, e mei te mea e taiaia ta ratou au vaine e ta ratou au tamariki, e ratou katoa tei noo ki rotopu ia ratou, ka kimi ratou kia tutaki i te mate, e e mate katoa atu ratou.

20. Akaue maira te ariki kia ratou, eiaa ratou e oki akaou, riri akera ratou ki te ariki, e kua tamate takiri ratou iaia, koia ia, i te mate o te ai.

21. Kua vaitata ratou i te rave i te au taunga ra, e tamate katoa ia ratou, kua oro ke atu ra ratou mei mua atu ia ratou.

22. E kua manako ratou kia oki atu ki te enua ko Niphai, kua aravei ra ratou i te au tangata o Kitiona ra. Kua akakite atura te au tangata o Kitiona kia ratou i te au mea katoatoa tei tupu mai ki ta ratou au vaine e ta ratou au tamariki; e kua akakite atu oki e, kua akatika akenei te ngati Lamana kia noo ratou ki te enua, kia apai ra ratou i te apa o ta ratou apinga ki te ngati Lamana ra.

23. Akakite maira te tangata ki te au tangata o Kitiona i reira e, kua tamate ratou i te ariki, e kua oro ua atura tona au taunga ki roto i te metepara ra.

24. E kia oti akera ratou i te tuatua anga, kua oki akaou atura ratou ki te enua ra ko Niphai ma te mataora, no te mea kare i taiaia ta ratou au vaine e ta ratou au tamariki; e kua akakite atu ratou kia Kitiona i ta ratou i rave ki te ariki ra.

25. Kua taputou iora te ariki o te ngati Lamana e, kare tona ra iti tangata e ta ia ratou.

26. E ko Limihai oki, te tamaiti a te ariki, i orongaia mai te basileia kiaia e te iti tangata, kua taputou aia ki te ariki o te ngati Lamana e, ka apai ua atu tona au tangata i te puapinga kiaia ra, e tae ua atu ki te apa o ta ratou puapinga katoatoa.

27. Akamata iora Limihai i te akatinamou i te basileia, e i te akatupu oki i te au ki rotopu i tona ra iti tangata.

28. Kua tuku i reira te ariki o te ngati Lamana i te au tiaki i te enua e pini ua ake, kia kore ratou e oro atu ki te metepara; e kua tutaki atu aia i tona au tiaki ki te apinga tei rauka iaia no te ngati Niphai ra.

29. E au akera te basileia o Limihai ariki e rua mataiti, kare te ngati Lamana i akapekapeka mai e kare oki i kimi kia ta ia ratou.