1. Kua akamata akaou iora matou i te akatinamou i te basileia, e i te noo akaou ki te enua ma te au. E kua akaue atura au kia maaniia te au tu apinga tamaki, kia vai teateamamao te au apinga tamaki na toku iti tangata no te tuatau e aere akaou mai ei te ngati Lamana e tamaki mai ki toku ra iti tangata.

2. E kua tuku oki au i te au tiaki e pini ua ake te enua, kia kore te ngati Lamana e aere muna akaou mai kia matou, e kua pera au i te tiaki anga i toku ra iti tangata e i taku ra au anana, e i te akono oki ia ratou, kia kore ïa e riro atu ki te rima o to matou au enemi ra.

3. Noo akera matou ki te enua o to matou au metua i nga mataiti e manganui, koia oki e rua ngauru ma rua mataiti.

4. Kua akaue atu au i te au tane kia tanu i te one ra, e e tanu i te au tu sitona e te au tu ua katoatoa oki.

5. E kua akaue atu oki au i te au vaine kia maani i te kakau, e e angaanga, e e maani i te au tu kakau memeitaki, koia ia, i te au tu kakau, kia akakakau matou i to matou vai taakaanga; e kua pera matou i raukaʼi te manuia i te enua, e kua akapera oki matou i te noo anga ki te enua e rua ngauru ma rua mataiti ma te au.

6. Mate iora te ariki ra ko Lamana, monoia akera aia e tana tamaiti. E akamata iora aia i te akamaroiroi i tona iti tangata kia tamaki mai ki toku iti tangata, e kua akateateamamao ratou no te tamaki, e kua aere maira ratou e tamaki mai i toku iti tangata.

7. Kua tono atura au i toku au tangata tutaka aere, e pini ua ake te enua ra ko Semeroni, kia kite au i to ratou akateateamamaoanga, kia teateamamao atu au ia ratou, kia kore ratou e aere mai ki rungao i toku ra iti tangata e e akapou ia ratou.

8. Aere maira ratou ki te pae i apatokerau i te enua ra ko Siloama ma to ratou au nuku mamaata, e te au tangata e ta ratou au apinga tamaki, te ana, te kakao, te koke, e te simetera, e te toka, e te maka, e kua varuia oki to ratou upoko kia ma, e kua tatuaia to ratou taukupu ki tetai kiri puaka.

9. E kua akaue iora au kia uunaia te au vaine e te au tamariki ki roto i te metepara; e kua akaputuputu iora au i toku ra au tangata pakari tei rauka ia ratou te apai i te apinga tamaki, e toku ra au tangata mapu katoa oki tei rauka ia ratou te apai i te apinga tamaki, kia aere kia tamaki i te ngati Lamana ra; e kua akapapa au ia ratou, te tangata katoatoa ki te ngai e tau i tona mataiti.

10. Ei reira, kua aere atu matou kia tamaki atu i te ngati Lamana ra, e kua aere katoa atura au, ko au uaorai i toku pakarianga, e tamaki atu i te ngati Lamana. Kua aere atura matou ki runga ma te ririnui o te Atu ki te tamaki.

11. Kare oki te ngati Lamana i kite i te Atu ra, e tona ririnui; kua irinaki ua ratou ki to ratou uaorai maroiroi. E iti tangata maroiroi rai oki i te maroiroi o te tangata nei.

12. E iti tangata taae ratou e te rotoriri, e te kaki toto oki, e te irinaki ua ra i te tuatua tika kore a to ratou au metua koia oki, kua tuaruia ratou ki vao i te enua ra ko Ierusalema, no te au ara a to ratou ai metua, e kua takinga kinoia ratou e to ratou au taeake i roto i te metepara ra, e kua takinga kino katoaia ratou i to ratou tere anga na runga i te moana ra.

13. Te irinaki katoa nei ratou e, kua takinga kino akaouia ratou i to ratou enua ipukarea mua ra, kia tae mai ratou na runga i te moana, e i peraia oki, no te mea kua akono meitaki a Niphai i te au akaueanga a te Atu ra, e kua akarongo te Atu i tana au pure, e kua akatika maira oki i te reira, e nana oki ratou i arataki i to ratou tere ki roto i te metepara ra.

14. Kua riri tona au taeake kiaia, no te mea kare ratou i kite i te au ravenga a te Atu; kua riri katoa ratou kiaia i runga i te moana ra, no te mea, kua akaketaketa ratou i to ratou ngakau ki te Atu ra.

15. E kia tae mai ratou ki te enua i taputouia ra, kua riri akaou ratou kiaia, kua tuatua atu oki ratou e, kua rave ua atu aia i te mana i to ratou rima, kia akaaere i te iti tangata ra, e kua titau maira ratou iaia e ta.

16. E riri akaou maira ratou kiaia i te mea, kua aere atu aia ki te metepara mei ta te Atua i akaue mai kiaia ra, e kua apai atu oki aia i te akapapaanga i kotikotiia ki runga i te au papa veo ra, kua tuatua oki ratou e, i keia ana aia i te reira.

17. E kua pera ratou i te apiianga i ta ratou au tamariki, kia makitakita ia ratou, e kia ta ia ratou, e kia keia e kia noni i ta ratou ra, e kia titau ua atu rai kia akapou ia ratou; no reira, e makitakita mutu kore to ratou ki te au tamariki a Niphai.

18. No reira oki i akavare mai ei te ariki ra ko Lamana iaku, na roto i tona karape e tana ravenga pikikaa, e tana au taputou; kia arataki mai au i toku nei au tangata ki runga i teianei enua kia akapouia ratou, i na, kua tumatetenga ua rai matou i teianei au mataiti e manganui i te enua nei.

19. E oti akera iaku, ko Zenipha, i te tuatua i taua au mea katoatoa ra ki toku ra iti tangata no runga i te ngati Lamana ra, kua akamaroiroi au ia ratou kia aere ki te tamaki ma to ratou maroiroi, e ma te irinaki ki te Atu ra; kua tamaki atura matou kia ratou i reira, te mata ki te mata.

20. Tuaru akaou atura matou ia ratou ki vao i to matou enua, e kua ta ua atu rai matou ia ratou, e kare atura i tatauia no te maata.

21. Oki akaou atura matou ki to matou uaorai enua, e akamata akaou atura toku au tangata i te tiaki i ta ratou au anana, e i te tanu oki i to ratou enua.

22. E teianei, kua pakari au, e kua oronga atu au i te basileia ki tetai tamaiti aku. Otira ua taku tuatua. E na te Atu e akameitaki mai i toku iti tangata. Amene.