1. E kia akaoti akera te ariki ra ko Beniamina i te tuatua anga atu i te au tuatua i orongaia mai kiaia e te angela a te Atu, kua akara akera tona mata e pini ua ake i taua urupu ra, e i na, kua inga ratou katoatoa ki runga i te one, i te mataku i te Atu ra.

2. I kite ana oki ratou i to ratou au tu kino, e kino ake ïa i te one pueu o te enua. Kapiki ua atura ratou ma te reo okotai, i te na ko anga atu e, E aroa mai ia matou nei, e tuku mai i te toto tarangaara o te Mesia, kia akakoreia ta matou nei au ara, kia ma to matou ngakau, te irinaki nei oki matou ia Iesu Mesia te Tamaiti a te Atua ra, tei anga i te rangi, te enua, e te au apinga ravarai, ko te ka tae mai ki raro nei ki rotopu i te tamariki a te tangata nei.

3. Oti akera taua au tuatua i te tuatuaia e ratou, tae maira te Vaerua o te Atua ki rungao ia ratou ra, ki iora ratou i te mataora e kua matara oki ta ratou au ara, e kua au to ratou ngakau no te maata o to ratou akarongo ia Iesu Mesia, ko te ka tae mai, mei tei tau i te au tuatua i tuatuaia mai e te ariki ra ko Beniamina kia ratou ra.

4. Kua akamata akaou a Beniamina ariki i te tuatua atu kia ratou, na ko atura, E aku au oa, e aku taeake, e toku nei au tangata, e toku iti tangata, e akarongo akaou mai kiaku, kia kite kotou, e kia marama kotou i te toenga o taku au tuatua, taku ka akakite atu kia kotou.

5. I na oki, mei te mea kua akaaraara te kite e te takinga meitaki o te Atua ia kotou i te akamanakoanga i to kotou puapinga kore, e to kotou tu puapinga kore e te inga anga oki ra;

6. E tuatua atu au kia kotou na, mei te mea kua tae kotou ki te kite i to te Atua takinga meitaki, e tona mana aite kore, e tona kite pakari, e tona akakoromaki, e tona akakoromakianga roa i te tamariki a te tangata nei; e kua tae oki ki te kite i te tarangaara i akonoia mei te akatumuanga o te ao nei kia akaoraia aia tei irinaki i te Atua ra, tei maroiroi i te akono i te akaueanga, ma te mou piri i te akarongo e tae atu ki te openga, koia oki te openga o te oraanga kopapa nei;

7. Te tuatua atu nei au e, koia te tangata ka rauka iaia te ora, na roto i te tarangaara i akonoia mei te akamataanga mai o te ao nei no te au tangata katoatoa mei te ingaanga o Adamu ra, e to teia tuatau nei, e to te tuatau a muri atu e tae ua atu ki te openga o te ao nei.

8. Ko te ravenga ïa e tae mai ei te ora. Kare atu e ora, mari ra, tei tuatuaia akenei; kare atu oki e ravenga e oraʼi te tangata, mari ra ko taku i tuatua akenei.

9. E irinaki i te Atua, e irinaki e, te ora nei aia, e nana i anga i te au mea katoatoa, te rangi e te ao katoa oki; e irinaki e, tei iaia te kite pakari katoatoa, e te mana katoatoa i te rangi e i te ao katoa nei, e irinaki e, kare e rauka i te tangata te marama i te au mea katoatoa mei te marama i rauka i te Atua ra.

10. E tenana, kia irinaki kotou, e kia tataraara kotou i ta kotou au ara e tikai, e kia akaruke i te reira, e kia taakaaka ia kotou uaorai ki mua i te Atua ra; kia pati atu ma te ngakau tae kia akakore mai aia i ta kotou au ara, e tenana, mei te mea e irinaki kotou i taua au mea ra, e akono kotou i te reira.

11. E tuatua akaou atu au kia kotou mei taku i tuatua akenei, mei te mea e kua taeaia e kotou te kite i te kaka o te Atua, e kua kite kotou i tona ra takinga meitaki, e kua tongi oki i tona aroa, e kua rauka ia kotou te akakoreanga i ta kotou au ara, tei akatupu i te mataora maata ki to kotou ngakau, e akamaara kotou i reira, e e tamou i te akamaaraanga i te mana maata o te Atua, e to kotou uaorai puapinga kore, e tona ra takinga meitaki e tona akakoromakianga roa ia kotou, e te aronga tau kore e, kia taakaaka, ma te kapiki atu i te ingoa o te Atu i te au rā ravarai, e ma te tamou marie i te irinaki i te au mea te ka tae mai, tei tuatuaia mai oki e te vaa o te angela.

12. I na, e tuatua atu au kia kotou, kia rave kotou i te reira, ka mataora kotou, kare e tivata, e ka akakiia oki kotou ki te aroa o te Atua, e ka vai matara ua ta kotou au ara, e ka tupu oki kotou ki te kite i te kaka nona, no tei anga ia kotou, koia oki, i te kite i te mea tika e te tuatua mou.

13. Kare oki kotou e inangaro kia akakino tetai ki tetai i reira, ka inangaro ra i te noo ua ma te au, e e tutaki atu i te tangata i tei tau ki tana angaanga.

14. E kare oki kotou e tuku ua i ta kotou au tamariki kia pongi ratou, e kia aere taaka ua, kare oki kotou e akatika kia akaapa ratou i te au ture a te Atua ra, e kia tamaki, e kia karo tetai ki tetai, a kia riro ei tavini no te tiaporo, te atu o te ara, koia oki te vaerua kino ra i te tuatuaia mai e to tatou ai metua ra, e enemi oki aia i te au tuatua tika katoa ra.

15. Ka apii ra kotou ia ratou kia aere na te mataara o te tuatua tika e te akono meitaki ra, e apii oki kotou ia ratou kia aroa tetai ki tetai e kia tauturu tetai ki tetai.

16. E ka tauturu atu kotou i te aronga e tau kia tauturuia; e oronga atu i to kotou puapinga ki te aronga tei ngere; e kia pati mai te tangata putaua ia kotou, kare kotou e tuku ua atu iaia ma te puapinga kore kia mate.

17. Peneiake ka tuatua kotou e, nona uaorai tona tumatetenga, e no reira kare au e akatika i toku rima, kare oki au e oronga atu i taku kai nana, kare oki au e oronga atu i toku puapinga nona kia kore aia e mate, kua tika ua tona au utunga ra.

18. Te tuatua atu nei rai au kia kotou na, E te tangata e rave i te reira kua tau rava ïa no te tataraara, e kia kore aia e tataraara i tana i rave ra, ka mate aia e tuatau ua atu, e kare atu ona puapinga i te basileia o te Atua ra.

19. E i na oki, kare ainei tatou i te au tangata patipati? Kare ainei tatou katoatoa e irinaki ua atu i taua Mea Ora ra ko te Atua, no ta tatou au mea katoatoa, no te kai, no te kakau, no te auro, e no te ario e ta tatou au apinga katoatoa?

20. E i na, i teianei ra i pati ei kotou ki tona ingoa no te mataraanga i ta kotou au ara. Kua tuku ua ainei aia kia pati puapinga kore ua kotou kiaia? Kare rava ïa; Kua riringi mai aia i tona Vaerua ki rungao ia kotou, e kua akaki oki i to kotou ngakau ki te mataora, e kua piri to kotou vaa iaia i kore ei e rauka ia kotou i te tuatau atu, no to kotou mataora maata.

21. E tenana mei te mea e akatika mai te Atua, ko tei anga ia kotou, e ta kotou e irinaki nei no to kotou ora, e no kotou katoa, e no ta kotou au apinga katoatoa, e kia oronga mai aia i ta kotou e pati kiaia ma te akarongo e ma te manako e, ka rauka ia kotou; e tenana, e tau rava atu ia kotou kia oronga atu i to kotou puapinga tetai ki tetai.

22. E mei te mea e akaapa kotou i te tangata tei tuku mai i tana patianga kia kotou no to kotou puapinga kia kore aia e mate, e e akaapa atu kotou iaia; e tika rava atu ta kotou akaapaangaia i reira, ko kotou oki i tāpū i to kotou puapinga; kare rai oki na kotou te reira na te Atua ra, e nona oki kotou i oraʼi; e kare rai kotou i tuku atu i tetai patianga, kare oki e tataraara i te au mea ta kotou i rave ra.

23. E tuatua atu au kia kotou, Aue oki te reira tu tangata e, ka pou oki tona puapinga e ïa katoa; e tenana, e tuatua atu au i teianei au mea ki te aronga apinga nui i teianei ao.

24. E tuatua katoa au kia kotou tei putaua, kare o kotou puapinga, mari ra, kua rava ua ta kotou i tera rā, i tera rā; e tuatua au kia kotou tei kore i oronga ki te tangata patipati, no te mea kare a kotou, teia toku inangaro ia kotou, kia tuatua kotou ki to kotou ngakau e, kare au e oronga atu no te mea kare āku apinga, naringa e puapinga toku, ka oronga atu au.

25. E tenana, kia tuatua akapera kotou i roto i to kotou ngakau, te vai rai kia kotou te apa kore, me kore ra, kua akaapa uaia kotou, e kua tika ta kotou akaapaanga, no te mea kua noinoi kotou i tei kore i rauka ia kotou.

26. E no teianei au mea taku i tuatua atu kia kotou, koia oki kia matara ta kotou au ara i tera rā, i tera rā, e kia aere tika kotou ma te apa kore ki mua i te aroaro o te Atua ra, i inangaro ei au kia oronga atu kotou i ta kotou apinga na te au tangata putaua, ko te tangata katoatoa mei tei tau ki tona ra puapinga, i te angai anga i tei pongi ra, e te akakakau i tei taaka ua ra, e kia aravei atu i tei maki ra, e kia matuapuru atu ia ratou i te pae vaerua e i te pae kopapa katoa oki, kia tau oki ki ta ratou i inangaro.

27. Kia raveia te au mea katoatoa ma te kite e te tau tikai; kare oki e tau kia oro viviki atu tetai tangata i tei rauka iaia. E tenana, kia maroiroi aia e kia rauka iaia te re; no reira, kia raveia te au mea katoatoa ma te tau tikai.

28. Kua inangaro au kia akamaara kotou e, ko te tangata i roto ia kotou, e pati i ta tona tangata tupu, kia akaoki aia i tana i pati ra, kia tau oki ki tana i papau ra; me kare, kua ara kotou i reira, e peneiake e riro te reira i te akatupu i te ara na to kotou tangata tupu katoa ra.

29. Kare e rauka iaku te akakite atu i te au mea ravarai e araʼi kotou; kua maata te au ravenga e te au mataara e araʼi, kare oki e pou kia tarē.

30. Ko teia ra taku e akakite atu nei kia kotou, kia kore kotou e akatau ia kotou uaorai, e to kotou manako, e ta kotou tuatua, e ta kotou au angaanga e rave ra, e e akono oki i te au akaueanga a te Atua ra, e tamou ua rai i te akarongo i ta kotou i akarongo ana, no te taeanga mai o to tatou Atu ra, e tae ua atu ki te openga o to kotou oraanga nei, e mateia kotou e tikai. E tenana, e te tangata e, e akamaara, kia kore e mate.