1. E oti akera te ariki ra ko Limihai i te tuatua ki tona ra iti tangata, kua tuatua atura oki aia i te au mea e manganui kia ratou, e kua tata au i tetai papaki meangiti rava o te reira ki roto i teianei puka, kua akakite atura aia ki tona iti tangata i te au mea katoatoa no to ratou au taeake tei noo ki te enua ra ko Zarahemela.

2. E kua akatu aia ia Amona ki mua i te urupu tangata, e akakite atu kia ratou i te au mea katoatoa tei tupu ki to ratou au taeake mei te tuatau i akaruke ei a Zenipha i te enua, e tae rava mai ki te tuatau i aere mai ei aia uaorai mei taua enua maira.

3. E kua akakite atura aia kia ratou i te tuatua openga ta te ariki ra ta Beniamina i apii mai kia ratou, e kua akamarama atura aia i te reira ki te iti tangata o te ariki ra ko Limihai, kia kite ratou i te au tuatua katoa tana i tuatua ra.

4. E akaoti akera aia i te reira, kua tuku atura te ariki ra ko Limihai i te au tangata kia oki ratou katoatoa ki to ratou uaorai ngutuare.

5. E kua akaue atura aia kia apainaia mai te au papa, tei kotikotiia ki te akapapaanga tuatua o tona au tangata, mei te tuatau i akaruke mai ei ratou i te enua ra ko Zarahemela, ki mua ia Amona ra, kia tatau aia i te reira.

6. E kia oti ia Amona te tatau i te akapapaanga, kua ui maira te ariki kiaia kia kite e, ka rauka ainei iaia te uri i te au reo ke ke ra? E kua pau atura Amona kiaia, kare e rauka iaia.

7. E kua tuatua maira te ariki kiaia, Te tangi nei au no te au tumatetenga o toku iti tangata, e kua akaue atura au kia tere atura e ā ngauru ma toru no toku iti tangata kia aere atu ki roto i te metepara, kia kimi aere ratou i te enua ra ia Zarahemela, e kia pati oki matou ki to matou au taeake kia akaora mai ia matou i te tuikaaanga.

8. E kua ngaro ratou i roto i te metepara i te au rā e manganui, kua maroiroi ra ratou, kare ra i kitea te enua ra ko Zarahemela e ratou, kua oki maira ratou ki teianei enua, kua tere oki ratou na rotopu i tetai enua e manganui tona au vai, kua kite oki ratou i tetai enua tei ki i te au ivi tangata e to te manu katoa, e kua ki oki i te au tu are pururu ki raro; e kite iora ratou i tetai enua i nooia ana e tetai iti tangata tei tau ki te tamariki a Iseraela i te maata.

9. E kua apai mai ratou e rua ngauru ma a papa i kotikotiia ki te tuatua, e au papa auro tikai ïa, ei akakite e, e tuatua tika ta ratou i tuatua maira.

10. E i na, kua apai mai oki ratou i tetai au tapoki umauma mamaata i maaniia ki te veo e te kapa, e e au mea pe kore oki.

11. E teianei, i apai mai ratou i te au koke, kua pou te mouringa e kua kino te koi ma te tutae auri; e kare e rauka i tetai tangata i teianei enua kia uri mai i te tuatua, koia oki te au kotikotianga i runga i taua au papa ra. No reira kua tuatua atu au kia koe e, ka rauka ainei ia koe te uri i te reo ke ke ra?

12. E te tuatua akaou atu nei au kia koe, kua kite ainei koe i tetai tangata ka rauka iaia te uri i te reo ke ke ra? Kua inangaro oki au kia uriia teianei akapapaanga ki to tatou uaorai reo; penei ua ake, ko te akakite mai te reira kia tatou i te toenga o te iti tangata i akapouia ra, no ratou teianei akapapaanga; me kare, penei ake, ka akakite mai te reira kia tatou i taua iti tangata uaorai i akapouia ra; e kua anoano au kia kite i te tumu i pou ei ratou ra.

13. Kua tuatua iora Amona kiaia, ka rauka ua iaku te akakite atu kia koe e te ariki, i tetai tangata ka rauka iaia te uri i te akapapaanga e apinga oki tana e raukaʼi iaia i te akara e te uri i te au akapapaanga taito ra; e mea orongaia mai te reira no ko mai i te Atua. E kua karangaia taua mea ra, e akauri reo, e kare e tika i tetai tangata kia akara ki roto i te reira, mari ra, me kua akaueia mai aia, ko te kimi aea aia i te mea kare e tika kia kimiia e ïa, e ko te mate aea aia. E ko tei akaueia kia akara ki roto i te reira, ka karangaia aia ei akara.

14. E i na, ko te ariki o te iti tangata i te enua ra ko Zarahemela, koia te tangata tei akaueia kia rave i taua au mea ra, e tei iaia taua apinga aroa ra no ko mai i te Atua.

15. E kua tuatua maira te ariki e, e maata atu te akara i te peroveta.

16. E kua tuatua atura Amona, e tangata akakite tuatua ngaro te akara, e e peroveta katoa oki; e kare e rauka i te tangata tetai apinga aroa maata atu i te reira, mari ra kia rauka iaia te mana katoatoa o te Atua, e kare oki e rauka te reira i te tangata; ka rauka ra i te tangata te mana maata no ko mai i te Atua.

17. Ka kite ra te akara i te au mea i tupu ana, e te mea oki ka tupu a muri atu, e na roto ia ratou e akakiteia mai ei te au mea katoatoa, koia oki e akakiteia mai ei te au mea ngaro, e tae mai ei oki ki te marama te au mea tei uunaia ra, e na ratou e akakite mai i te au mea kare i kiteia ra; e na ratou oki e akakite mai i te au mea kare e tika kia akakiteia na roto i tetai ravenga ke.

18. E kua akapera te Atua i te oronga anga mai i tetai ravenga e raukaʼi i te tangata te rave i te au semeio mamaata na roto i te akarongo, no reira e riro ei aia ei puapinga maata ki tona au taeake.

19. E oti akera ia Amona i te tuatua i teia au tuatua nei, kua mataora rava akera te ariki, e kua akameitaki atura aia i te Atua, i te na ko anga atu e, kare au e ekoko, tei roto i teianei au papa te au mea umere rava e kua akonoia taua uri reo ra kia akakite i te au mea umere, mei te reira te tu, ki te tamariki a te tangata nei.

20. Aue te umere i te au angaanga a te Atua, te roa oki o tona akakoromaki i tona iti tangata nei; te matapo e te ngakau marokiakia o te tamariki a te tangata; kare oki ratou i kimi ana i te pakari, kare katoa ratou e anoano kia riro te reira ei akaaere ia ratou.

21. I na, mei te anana taae oki ratou tei oro ke atu mei te tiaki, e tei akapueurikirikiia atu, e tei tuaruia, e tei kaingaia e te au puaka o te vao rakau ra.