1. E teianei, kua tuatua atura Abinadaia kia ratou, kua inangaro au kia kite kotou e, ka aere mai te Atua uaorai ki raro nei ki rotopu i te tamariki a te tangata nei, e akaora i tona ra iti tangata.

2. E no tona noo anga i te kopapa nei, ka karangaia aia e ko te Tamaiti a te Atua, kua kauraro oki te kopapa nei i te inangaro o te Metua; koia te Metua e te Tamaiti katoa.

3. Te Metua, no te mea kua toia aia e te mana o te Atua; e te Tamaiti, no te kopapa nei, e pera aia i te riro anga ei Metua, e ei Tamaiti katoa.

4. E okotai oki Atua raua, koia te Metua mutu kore o te rangi e te enua katoa.

5. E i pera oki te kopapa i te kauraro anga i te Vaerua, me kore, te Tamaiti i te Metua, okotai ïa Atua, e ka tae oki te timataanga kiaia, kare ra i te timataanga, e akatika ra iaia uaorai kia aviriia, e kia pāpāia, e kia tuaruia ki vao, e kia akarukeia e tona ra iti tangata.

6. E oti akera te reira, e oti katoa oki te rave anga i te au semeio mamaata e manganui ki rotopu i te au tamariki a te tangata nei, ka aratakiia aia, i na, mei ta Isaia i tuatua maira, mei te mamoe muteki ki mua i te tangata pakoti i tona uru ra, kare ra tona vaa i tuatua atu.

7. I na, ka aratakiia rai aia, e ka akasatauroia, e ka taiaia, e ka ariki oki te kopapa i te mate, e ka apukuia te inangaro o te Tamaiti e te inangaro o te Metua.

8. E i pera oki te Atua i te tatara anga i te pirianganao o te mate, i raukaʼi oki iaia te re i te mate; ma te oronga atu ki te Tamaiti i te mana kia riro ei tuā i te tamariki a te tangata nei.

9. Kua aere atura ki runga i te rangi, e tei roto i tona ngakau te aroa, i akakiia oki ki te aroa i te tamariki a te tangata nei; te tu ua ra aia i rotopu ia ratou ma te tuatua tika, kua matara iaia te tapeka o te mate; kua rave aia ki runga iaia uaorai i ta ratou au tuatua kino e ta ratou au ara, kua akaora ia ratou, e kua akatikatikaia te au mea e tau ei.

10. E teianei, te tuatua atu nei au kia kotou, Naai tona uki e akakite mai? I na, te tuatua atu nei au kia kotou, kia akariroia aia ei atinga no te ara, ka kite aia i tona uanga. E teianei, eaa ta kotou ka tuatua mai? E koai tona uanga?

11. I na, te karanga atu nei au kia kotou, ko tei akarongo i te tuatua a te au peroveta, te au peroveta tapu katoatoa tei totou mai i te taeanga mai o te Atu ra; te karanga atu nei au kia kotou, ko te tangata katoatoa i akarongo i ta ratou au tuatua, e tei irinaki e, ka akaora te Atu i tona ra iti tangata, e tei akara ki mua ki taua rā ra e mataraʼi ta ratou au ara; te karanga atu nei au kia kotou e, ko tona ïa uanga, ko ratou oki te aronga ipukarea i roto i te basileia o te Atua.

12. Ko ratou te aronga i apainaia e ïa ta ratou au ara, no ratou i mate ei aia, kia akaora ia ratou i ta ratou au ara. E teianei, kare ainei ratou i tona uanga?

13. I na, kare ainei te au peroveta, ko ratou tei totou mai ma to ratou vaa, ko tei kore i inga i te ara; koia oki te au peroveta tapu katoatoa mei muatangana maira o teianei ao? Te karanga atu nei au kia kotou e, ko ratou tona uanga.

14. Ko ratou ïa tei akatupu i te au, e tei apai mai i te tuatua meitaki e te tau, e tei akakite i te ora, e tei tuatua ki Ziona e, Tei to Atua ra te au.

15. Aue te manea i to ratou vaevae i runga i te maunga e!

16. E teianei, aue te manea i to ratou vaevae i runga i te maunga ko tei akakite ua rai i te au!

17. E teianei, aue te manea i to ratou vaevae i runga i te maunga ko tei akakite ua atu i te au e a muri noatu, i na, i teianei, e tuatau, e tuatau ua atu.

18. E i na, te karanga atu nei au kia kotou, kare ko te reira anake: Aue oki te manea o tona vaevae i runga i te maunga ko ei apai mai i te tuatua meitaki te tumu o te au koia oki te Atu, tei akaora i tona iti tangata, koia tei oronga atu i te ora no tona ra iti tangata.

19. Naringa kare te tarangaara tana i rave no tona iti tangata, tei akonoia oki mei muatangana maira o te ao nei; te karanga atu nei au kia kotou, naringa kare te reira, kua mate ua atu te tangata katoatoa e tikai.

20. Ina ra, kua matara te au tapekaanga o te mate, e tei te Tamaiti te au, e tei iaia te mana ki runga i te mate; no reira aia i akatupu ei i te tuakaouanga o tei mate ra.

21. E ka tae mai tetai tuakaouanga, ko te tuakaouanga mua ïa; koia oki te tuakaouanga o ratou tei vai ana, e te vai nei, e te ka vai e tae roa atu oki ki te tuakaouanga o te Mesia; ko tona ingoa rai ïa.

22. E teianei, ka tuakaou mai te au peroveta katoatoa, e ratou katoa tei akarongo i ta ratou au tuatua, koia oki ratou katoatoa tei akono i te au akaueanga a te Atua, ka tu akaou mai ratou i te tuakaouanga mua; e tenana, ko ratou te tuakaouanga mua ra.

23. E akatuia ratou kia noo ki ko i te Atua tei akaora ia ratou; no reira ka rauka ia ratou te ora mutu kore na roto i te Mesia, i tei tatara i te au tapekaanga o te mate.

24. Ko te aronga ïa te ka tu ki te tuakaouanga mua; e ko ratou ïa tei mate i roto i to ratou kite kore, i mua ake ka tae mai ei te Mesia, kare oki te ora i akakiteia atu kia ratou. E ka akapera te Atu i te akatupu i to ratou ora; e ka tu mai ratou i te tuakaouanga mua, koia oki, e ora mutu kore to ratou, i akaoraia oki e te Atu.

25. E no te au tamariki varevare katoa oki te ora mutu kore.

26. E akara ra, kia mataku, e ka ruketekete ki mua i te Atua ra; e ruketekete oki kotou; kare oki te Atu e akaora ia ratou tei patoi iaia ra, e tei mate ki roto i ta ratou au ara; koia oki, ko ratou katoatoa tei mate i roto i ta ratou au ara mei te akatumuanga mai o teianei ao, e tei inangaro ua rai oki kia patoi i te Atua, ratou katoatoa tei kite i te au akaueanga a te Atua, kare ra ratou i akono i te reira; kare o ratou tuanga i te tuakaouanga mua.

27. E tenana, kare ainei e tau kia ruketekete kotou? Kare te ora e tae kia ratou, kare oki te Atu e akaora ia ratou; i na, kare e tika i te Atu kia akaora ia ratou, kare oki e tika iaia kia patoi iaia uaorai, kare oki aia e patoi i te tuatua tika e tau ei.

28. E te karanga atu nei au kia kotou, te vai atura te tuatau e akakiteiaʼi te ora o te Atu ki to te au basileia, e ki te au kopu e ki te au reo, e ki te au iti tangata katoatoa ra.

29. Koia ia, e te Atu, ka akateitei toou au tiaki i to ratou reo; e ka taokotai mai ratou i te reo imene, e taokotai oki ratou i te kite i te rā e akaoki mai ei te Atu ia Ziona.

30. Kia maeva i te mataora, e imene kapipiti, e te au ngai tanea i Ierusalema e; kua akapumaana oki te Atu i tona iti tangata; kua akaora aia i Ierusalema.

31. Kua akakite ua te Atu i tona rima tapu ki mua i te mata o to te au enua katoa ra; e ka ki te au openga o te enua ra i te ora a to tatou Atua.