1. E teianei, kia pera akera te ariki ra ko Beniamina i te tuatua anga atu ki tona ra iti tangata, kua tono atura aia i tetai tangata ki rotopu ia ratou kia uiui ki tona ra iti tangata, kia kite aia e, me kua akarongo ratou i te tuatua tana i tuatua atu kia ratou.

2. Kua kapiki maira ratou ma te reo okotai, Ae, kua akarongo matou i te tuatua katoatoa taau i tuatua mai kia matou; e kua kite papu oki matou e, e tuatua tika ïa, na roto oki i te Vaerua o te Atu Mana Katoatoa tei akatuke ia matou, koia oki to matou ngakau, i kore ei matou e inangaro akaou i te rave i te kino, kia rave ra i te meitaki ma te tuku moe kore.

3. E tei ia matou katoa, na roto i te meitaki maata o te Atua, e te akakite anga oki a tona ra Vaerua, te kite maata i te au mea te ka tupu a muri atu; e naringa e tau ka rauka ia matou te totou i te au mea katoatoa ra.

4. No to matou akarongo oki i te au mea katoatoa ta to matou ariki i tuatua mai kia matou kua tae mai matou ki teianei kite maata, no reira kua rekareka matou ma te rere ua i te rekareka.

5. E te inangaro nei matou kia papau i tetai koreromotu ki te Atua kia akono i tona anoano, e kia akono oki i tana au akaueanga e te au mea katoatoa tana i akaue mai kia matou i te toeanga o to matou puke rā, kia kore taua mamae mutu kore ra e tae ki runga ia matou uaorai, mei ta te angela i tuatua maira, e kia kore matou e inu i te kapu o te riri o te Atua.

6. E teianei, ko te au tuatua teia ta te ariki ra ta Beniamina i inangaro ia ratou; i na ko atu ei aia kia ratou e, kua tuatua mai kotou i te tuatua taku i inangaro ra; e te koreromotu ta kotou i papau, e koreromotu tuatua tika ïa.

7. E teianei no teau koreromotu ta kotou i papau mai ra, ka tuatuaia kotou e tamariki na te Mesia, tana au tamariki tamaroa e tana au tamariki tamaine, i na oki, i teia rā i akaanau akaouiaʼi kotou e ïa i te vaerua; no te mea te na ko mai nei kotou, kua akatukeia to kotou ngakau na roto i te akarongo i tona ra ingoa; no reira i akaanauiaʼi kotou e ïa, e i riro ei oki kotou ei tamariki tamaroa e ei tamaine nana ra.

8. E i raro ake i teia upoko nei e akarangatiraiaʼi kotou, e kare oki e upoko ke atu i akakiteia mai e akatiamaiaʼi kotou. Kare oki e ingoa ke atu i akakiteia e rauka mai ei te ora; no reira, kua inangaro au kia tuku kotou i te ingoa o te Mesia ki rungao ia kotou, kotou katoatoa tei papau i te koreromotu ki te Atua, koia oki, kia akono marie kotou e tae ua atu ki te openga o to kotou oraanga nei.

9. E ko tei pera ra, ka kitea aia ki te rima katau o te Atua, e ka kite oki aia i te ingoa i tuatuaiaʼi aia; ka tuatuaia oki aia ki te ingoa o te Mesia.

10. E ko tei kore e rave i te ingoa o te Mesia ki runga iaia, ka tuatuaia rai aia ki tetai ingoa ke e tikai, no reira e kiteaʼi aia ki te rima kaui o te Atua.

11. E kua inangaro au kia akamaara oki kotou e, ko te ingoa teia taku i tuatua ra, e oronga atu au kia kotou, e kare rava atura te reira e akakoreia, mari ra na roto i te ara; e tenana, e matakite kia kore kotou e ara, kia kore te ingoa ra e akakoreia i to kotou ngakau.

12. Te tuatua atu nei au kia kotou e, kua inangaro au kia akamaara kotou kia tamou ki te ingoa i tataia rai ki roto i to kotou ngakau kia kore kotou e noo ki te rima kaui o te Atua ra; kia akarongo ra kotou e kia kite oki i te reo i kapikiiaʼi kotou, e te ingoa oki i kapikiiaʼi kotou e ïa ra.

13. Naea e kite ei tetai tangata i tona pu, mei te mea e kare aia i angaanga ana na taua pu ra? E tangata ke rai kiaia, e ko tei kore i manakoia i te au akakoroanga o tona ra ngakau.

14. E teianei, ka rave ainei te tangata i te asini a tona ra tangata tupu, ma te tāpū atu i te reira? Te tuatua atu nei au kia kotou, kare; kare oki aia e akatika kia kai aia i roto i tana au anana, ka tuaru atu ra iaia ki vao. Te tuatua atu nei au kia kotou, ka peraia oki ki rotopu ia kotou me kare kotou e kite i te ingoa i kapikiiaʼi kotou.

15. No reira kua inangaro au kia tamou meitaki kotou ma te ngaueue kore, kia rave ua atu rai kotou i te angaanga meitaki ki te maata, kia tamou te Mesia, ko te Atu ra, te Atua Mana Katoatoa ia kotou nana uaorai, kia aratakiia kotou ki te rangi, e kia rauka ia kotou te ora mutu kore e te ora openga kore oki, na roto i te kite pakari e te mana, e te tuatua tika, e te aroa nona, no tei anga i te au mea katoatoa, i te rangi ra, e te enua katoa nei, koia te Atua i rungao i te au mea katoatoa. Amene.