1. E oti akera ia Abinadaia i te tuatua i teianei au tuatua, kua akatika atura aia i tona rima e kua na ko atura, Te vai atura te tuatau e kite ei te tangata katoatoa i te ora a te Atu ra, to te au enua katoa ra, e to te au kopu, e to te au reo, e to te au iti tangata, ka kite te mata e te mata e ka aaki ki mua i te Atua e, e tika tana akavaanga.

2. Ei reira te au tangata kino e tuaru keiaʼi ki vao ma te otooto, e te aue, e te mii, e te pakati anga nio; e ka pera, no te mea, kare ratou i akarongo ki te reo o te Atu; no reira i kore ei te Atu e akaora ia ratou.

3. No teianei ao oki ratou, e no te tiaporo ra, e mana oki to te tiaporo ki runga ia ratou; koia oki, ko taua ovi taito ra tei pikikaa i to tatou nga metua mua ra, ko te tumu ïa no to raua inga anga, i riro ei oki te tangata i te inangaro ua rai i ta te kopapa, e ta te tiaporo, i te kite i te kino e te meitkai, e ma te kauraro anga i te tiaporo ra.

4. No reira, ka mate ei te tangata ravarai; e i na, naringa kare te Atua i akaora i tona iti tangata i to ratou tu ngaro e te poiri, ka ngaro ua rai ratou e tuatau ua atu.

5. E akamaara ra, ko tei akono ua atu i tona au inangaro i te kopapa nei, e tei aere ua ki te aerenga kino ma te patoi i te Atua, te vai ua rai aia i tona tu inga, e tei raro anake aia i te mana a te tiaporo ra. Ka vai ua rai aia ki reira, mei te mea ra e, kare e akaoraanga i akonoia, e ka enemi aia i te Atua; e ka enemi katoa te tiaporo ki te Atua.

6. E teianei, naringa kare te Mesia i tae mai ki te ao nei, kare katoa e akaoraanga. Te tuatua nei, mei te mea ra e, kua tae mai aia, e kua tupu takere te reira au mea.

7. Naringa kare te Mesia i tuakaou mai mei te mate maira, me kore ra, i tatara i te au tapeka o te mate ra, kia kore o te mate re, kia kore oki o te mate tara, kare rava oki e tuakaouanga i reira.

8. Ina ra, e tuakaouanga tetai, no reira, kare o te mate ra re, e te tara o te mate, kua apukuia ïa e te Mesia ra.

9. Koia te marama e te ora o to te ao nei, koia oki, e marama mutu kore, kare rava ïa e poiri; i na, e ora mutu kore oki, kare rava e mate akaou.

10. E teianei kopapa mate ua, ka riro ïa ei kopapa mate kore, e tikai, e teianei kopapa pe ua, e riro ïa ei kopapa pe kore; e ka akatuia ïa ki mua i te akavaanga a te Atua ra, kia akavaia e ïa kia tau ki ta ratou au angaanga, me kua meitaki, e me kua kino;

11. E me kua meitaki, ki te tuakaouanga ki te ora mutu kore e te mataora; e me kua kino, ki te tuakaouanga ki te mate mutu kore, e ka tukuia atu ki te tiaporo, tei akatuikaa ia ratou, ko te mate oki ïa.

12. I aere ua ana ratou i te inangaro e te manako o to ratou uaorai kopapa, kare oki i pure ana ki te Atua, ka vai tika uaʼi tona rima kia ratou; i akatika uaia mai oki te rima aroa kia ratou; kare ra ratou i ariki; i akoia ratou no ta ratou au ara, kare ra ratou i kopae i te reira; i akaueia mai ratou kia tataraara, kare ra ratou i tataraara.

13. E teianei, kare ainei e tau ia kotou kia ruketekete e kia tataraara i ta kotou au ara, e kia akamaara oki e, na roto i te Mesia anake ra e oraʼi kotou?

14. E tenana, mei te mea te apii ra kotou i te ture a Mose ra, e apii katoa kotou e, e akaraanga anake ïa no te au mea te ka tupu a muri atu.

15. E apii kia ratou e, ka tae mai te ora, na roto mai i te Mesia ra, ko te Metua mutu kore oki aia. Amene.