1. Tei ia Semeroni tetai ngai, e kua matau te au tamaine a te ngati Lamana i te akaputuputu ki reira, kia imene, kia ura, e kia tarekareka ia ratou uaorai.

2. E tae akera ki tetai rā, kua putuputu mai tetai papaki iti o ratou ra, kia imene, e kia ura.

3. E teianei, kua akama te au taunga o Noa kia oki mai ki te oire ra ko Niphai, i na, kua mataku katoa ratou, ko te taiaia aea ratou e te au tangata ra, no reira i kore ei ratou i oki atu ki ta ratou au vaine e ta ratou au tamariki.

4. Te ori aere ua ra ratou i roto i te metepara ra, kite akera ratou i te au tamaine a te ngati Lamana ra, kua pipini iora ratou kia akarakara atu ia ratou.

5. E oti akera ratou i te akaputuputuia mai kia ura, kua aere atura ratou mei roto atu i to ratou ngai pipini anga, rave iora ia ratou, e apai ke atura ki te metepara ra, i na, kua apai atura ratou i nga tamaine e rua ngauru ma ā, a te ngati Lamana ki roto i te metepara ra.

6. E kia kite te ngati Lamana e, kua ngaro ta ratou au tamaine, riri iora ratou ki te au tangata o Limihai, no te mea kua manako iora ratou e, ko te tangata o Limihai ïa tei akapera ana.

7. Tono maira ratou i to ratou au nuku, e kua aere katoa maira te ariki uaorai ki mua i tona ra au tangata; kua aere maira ratou ki runga i te enua ra ko Niphai kia ta i te au tangata o Limihai ra.

8. Kua kite ra a Limihai ia ratou mei runga i te are teitei, kua kite oki aia i to ratou akateateamamaoanga no te tamaki. Kua akaputuputu i reira aia i tona ra au tangata, e kua tiaki ratou i roto i te au kainga e te vao rakau.

9. Kia tae maira te ngati Lamana ra, kua aere atura te au tangata o Limihai mei roto atu i to ratou au ngai tiakianga, e akamata iora i te tamate ia ratou.

10. Riro iora ei tamaki maata, no te mea kua tamaki atura ratou mei te liona ka noni i tana kai ra.

11. Tuaru atura te au tangata o Limihai i te ngati Lamana mei mua atu ia ratou, kare ra ratou i apa ki te maata o te ngati Lamana. No to ratou oraanga, e no ta ratou au vaine, e no ta ratou au tamariki oki, i tamaki ei ratou, kua akaputuputu to ratou aronga ririnui katoatoa, e kua tamaki oki ratou mei to te taae rai.

12. Kite akera ratou i te ariki o te ngati Lamana i rotopu i to ratou au tangata mate ra; kare aia i mate, kua puta ra, e no te oro viviki atu a tona au tangata, kua akarukeia aia ki runga i te one ra.

13. Rave iora ratou iaia, rapakau iora i tona au puta, e kua apai maira iaia ki mua ia Limihai, i te na ko anga atu e, i na, ko te ariki teia o te ngati Lamana; no tona au puta i ingaʼi aia ki rotopu i to ratou au tangata mate ra, e kua akaruke ratou iaia; e i na, kua apai mai matou iaia ki mua ia koe; e teianei, ka tamate tatou iaia.

14. Kua tuatua atu ra a Limihai kia ratou, auraka kotou e tamate iaia, e apai mai iaia ki ko nei kia kite au iaia. E kua apai maira ratou iaia. Kua tuatua iora a Limihai kiaia, Eaa te tumu i aere mai ei kotou ki runga nei e tamaki mai ki toku nei au tangata? I na, kare toku nei au tangata i kaati i te taputouanga taku i taputou atu kia koe na; Eaa koe i aati ei i te taputouanga taau i taputou ki toku ra au tangata?

15. Kua tuatua maira te ariki ra, kua aati au i te taputouanga no te mea, kua apai ke atu toou au tangata i te au tamaine a toku ra au tangata, e no reira, i roto i toku riri maata, kua arataki mai au i toku ra au tangata kia tamaki atu ki toou na au tangata.

16. E teianei, kare a Limihai i akarongo ake ki taua tuatua ra; i na ko atu ei aia e, ka kimi au i rotopu i toku nei au tangata, e ko tei rave i te reira, ka mate. E kua akaue atura aia kia kimiia te reira i rotopu i tona au tangata.

17. E kia akarongo akera a Kitiona, ko te rangatira ïa o te ariki, i taua au mea ra, kua aere maira aia e kua na ko maira aia ki te ariki ra, te tuatua atu nei au kia koe, e akarongo mai, e akakoromaki mai, auraka e kimi ki rotopu i teianei iti tangata, auraka oki koe e tuku i teia mea kino ki runga ia ratou.

18. Kare ainei koe i maara i te au taunga a toou metua ra, ko ta teia iti tangata i kimi kia tamate? E kare ainei ratou i te metepara i teia nei? E kare ainei oki ratou i te au tangata tei keia i te au tamaine a te ngati Lamana ra?

19. E teianei, E akakite atu i te reira ki te ariki nei, kia akakite katoa atu aia ki tona ra au tangata, kia au ratou kia tatou nei; I na oki, te akateateamamao nei ratou i teianei, kia aere mai e tamaki mai kia tatou nei; e i na oki, e toko iti ua tatou nei.

20. E e manotini te ka aere mai, e kia kore te ariki nei e akaau ia ratou kia tatou nei, ka mate tatou.

21. E kare ainei te au tuatua a Abinadaia ra i tupu, tana i totou mai kia tatou nei? E kua akaperaia no te mea, kare tatou i akarongo ki te au tuatua a te Atu ra, e ma te akaruke oki i ta tatou au ara.

22. I teianei e akaau tatou ki te ariki nei, e akatupu oki tatou i te taputou ta tatou i taputou kiaia ra; e ngari ake kia tuikaaia tatou, i te mate; e tenana kia akaoti tatou i teia akamaringianga toto maata nei.

23. Kua akakite atura a Limihai ki te ariki ra i te au mea katoatoa no runga i tona metua, e te au taunga oki tei oro ki te metepara ra, e kua akaapa oki ia ratou no te apai ke atu angaia o ta ratou ra au tamaine.

24. E kua au oki te ariki ra ki tona ra au tangata; e kua tuatua atura aia kia ratou, ka aere tatou, ma te mou kore i te apinga tamaki, e aravei atu i toku ra au tangata; e te tuatua atu nei au kia koe na ma te taputou e, kare rai toku ra au tangata e tamate i toou au tangata.

25. Aru atura ratou i te ariki ra, e aere atura ratou e kare a ratou apinga tamaki, e aravei atu i te ngati Lamana ra, tipapa iora te ariki o te ngati Lamana ki raro ki mua ia ratou ra, e pati atura aia kia ora te au tangata o Limihai ra.

26. E kia kite akera te ngati Lamana i te au tangata o Limihai, e kare a ratou apinga tamaki, kua aroa maira ia ratou, ma te mareka katoa, e kua oki atu ra ratou ma te ariki katoa, ki to ratou uaorai enua ma te au.