1. E ope akera nga mataiti e rua, kua tae akaou maira Abinadaia ki rotopu ia ratou ra, kua akatutu aia mei te mea, e tangata ke rai aia, akamata iora aia i te totou ki rotopu ia ratou, i te na ko anga atu e, kua na ko mai te Atua i te akaue anga mai kiaku, E Abinadaia, ka aere, ka totou ki toku iti tangata, kua akaketaketa oki ratou i to ratou ngakau i te patoi i taku au tuatua; Kare rai ratou i tataraara i ta ratou angaanga kino, no reira ka atoro atu au ia ratou ki toku nei riri, i na, i toku riri maata, e ka akautunga atu oki au ia ratou ki ta ratou tuatua tika kore e te au angaanga viivii.

2. Aue oki teianei uki e! Kua tuatua maira te Atu kiaku, ka akatika ana i to rima na, ka totou, ka na ko atu ei e, Te na ko maira te Atu; no te viivii o teianei uki, i akatuikaaiaʼi ratou, e e pāpāia oki ratou ki te paparinga; koia oki, ka tuaruia ratou e te tangata, e e taiaia; e na te manu o te reva, e na te puakaaoa, e na te au puaka taae e kai i to ratou kiko.

3. Ei reira e riro ei te ora o te ariki ra ko Noa mei te kakau i roto i te ai vera ra; ka kite oki aia e, ko au te Atu.

4. Ka pāpā oki au i toku iti tangata ki te tumatetenga maata, koia oki, ki te onge, e te makimate, e ka akaaue au ia ratou, kare e akaea.

5. E naku oki e tapeka i te apainga maata ki runga i to ratou tua; e e akaaereia ratou na mua mei te asini murare ra.

6. E naku oki e akatopa i te ua toka ki runga ia ratou, e ka taiaia ratou i reira, e e taiaia ratou ki te matangi no te itinga o te rā ra, e na te au manumanu e akakino i te enua, e akapou oki te sitona.

7. E ka taiaia ratou ki te makimate maata; e pera au no ta ratou tuatua tika kore e ta ratou au angaanga viivii ra.

8. Kia kore oki ratou e tataraara, ka akapou takiri au ia ratou i te enua nei; ka akaruke mai ra ratou i te akapapaanga i muri ake ia ratou, e ka akono au i te reira no tetai atu au iti tangata ka noo ki te enua nei; ka pera oki au kia kitea e te iti tangata ke, ta ratou au angaanga viivii. E manganui atu rai te au mea ta Abinadaia i totou atu ki teianei iti tangata.

9. E kua riri iora ratou iaia, e kua rave ratou iaia, e kua apai, tapeka atura iaia ki mua i te ariki ra, e kua tuatua atura ki te ariki, i na, kua apai mai matou i tetai tangata ki mua ia koe na, ko tei totou i te tuatua kino i toou nei iti tangata, e ko tei karanga maira oki e, ka akapou te Atua ia ratou.

10. E te totou katoa ra aia i te kino o toou oraanga nei, e te na ko maira oki e, ka riro toou ora mei te kakau i te umu ai mura ra.

11. E te karanga maira oki aia e, ka riro koe mei te teita, mei te teita marō o te aua i aereia e te au puaka, e i takatakaiia e te vaevae.

12. E te tuatua katoa maira aia, e ka riro koe mei te ua marō o te tataramoa e me e matangi tetai, e akapueuia ïa e te matangi ki runga i te tua o te enua nei, e kua tuatua aia e, na te Atua te reira i tuatua maira. E te tuatua maira aia e, ka tae mai teianei au mea ki runga ia koe me kare koe e tataraara; no taau au ara oki e tae mai ei te reira.

13. E tenana, e te ariki e, eaa taau ara i rave ana? E eaa oki ta toou iti tangata au ara i rave ana, kia akaapaia tatou e te Atua, e kia akavaia oki e teia tangata nei?

14. E teianei, e te ariki e, i na, kare a matou ara, e ko koe oki, e te ariki e, kare aau ara i rave; i pikikaa akenei oki teia tangata ia koe, e kua totou puapinga kore ua oki aia.

15. E i na, kua ririnui tatou nei, kare rava tatou e akatuikaaia e kare oki e tapekaia e to tatou au enemi, i na, kua manuia akenei koe i te enua nei, e ka manuia ua atu rai koe.

16. I na oki, teia te tangata, e te tuku atu nei matou iaia ki roto i to rima na, kia rave koe i taau i inangaro iaia.

17. Kua akaue i reira te ariki ra ko Noa kia titiriia a Abinadaia ki roto i te are auri; e kua akaue katoa atura aia kia taokotai mai te au taunga kia uriuri ratou i te tuatua nona, kia kimi i ta ratou ka rave kiaia.

18. Kua tuatua akera ratou ki te ariki, E apai mai iaia ki ko nei kia uiui matou kiaia; e kua akaue iora te ariki kia apainaia mai aia ki mua ia ratou.

19. Kua akamata ratou i reira i te uiui atu kiaia, kia kimi apa ratou nona, e raukaʼi ia ratou te tapepe atu iaia, kua pau ra aia i ta ratou au uianga ma te mataku kore, i va uaʼi ratou; kua pau tika atura aia i ta ratou au uianga e kua akamura aia ia ratou ki ta ratou uaorai au tuatua ra.

20. Kua tuatua maira tetai o ratou kiaia, Eaa te aiteanga i te au tuatua i tataia e tei apiiia oki e to tatou ai metua ra, ko tei na ko maira:

21. Aue, te manea i te vaevae o te karere i runga i te maunga; ko tei apai mai i te tuatua meitaki ra; ko tei tutu aere i te au ra, ko te apai mai i te tuatua meitaki ra; ko tei tutu aere i te ora ra; ma te tuatua atu ki Ziona e, Tei to Atua rai te au!

22. Ka akateitei to au tiaki i to ratou reo; e ka imene kapipiti ratou ma te reo; e ka akara oki ratou, te mata ki te mata okotai, me akaoki mai te Atu ia Ziona.

23. E maeva ua atu rai kotou, e imene kapipiti, e te au ngai pou i Ierusalema; kua akapumaana oki te Atu i tona iti tangata; kua akaora aia ia Ierusalema.

24. Kua akakite te Atu i tona ra rima tapu ki mua i te mata o te pa enua katoa ra; e ka kite te au openga katoatoa o te enua ra i te ora a to tatou Atua?

25. Kua tuatua atura Abinadaia kia ratou i reira, E au taunga kotou, ko tei akatutu kia apii i teianei iti tanga ta, e kia kite i te Vaerua o te totou, e te ui mai ainei kotou kiaku i te aiteanga o teianei au mea?

26. E te karanga atu nei au kia kotou na, aue oki kotou ko tei taruri ke i te au mataara o te Atu! Mei te mea kua kite kotou i taua au mea ra, kare rai kotou i apii atu i te reira; no reira kua taruri ke kotou i te au mataara o te Atu.

27. Kare kotou i inangaro ana i te marama; no reira i kore ei kotou i kite i te pakari; E tenana, eaa ta kotou e apii nei ki teianei iti tangata?

28. Kua tuatua maira ratou, te apii nei matou i te ture a Mose ra.

29. Tuatua akaou atura aia kia ratou, mei te mea, te apii nei kotou i te ture a Mose, eaa i kore ei kotou i akono i te reira? Eaa i noinoi ei to kotou ngakau i te apinga nui? Eaa oki kotou i akaturi ei, e e akapou ei i to kotou maroiroi ki te au vaine akaturi; i na, i arataki atu ei oki kotou i teianei iti tangata kia rave i te ara, i akaunga mai ei te Atu iaku kia totou atu ki teianei iti tangata, koia oki, kia akakite atu i te mate maata te ka tae mai ki runga i teianei iti tangata?

30. Kare ainei kotou i kite e, e tuatua tika taku? Kua kite oki kotou e, e tuatua tika taku; e e tau kia ruketekete kotou ki mua i te Atua ra.

31. No ta kotou tuatua tika kore oki ka papaiaʼi kotou; i tuatua mai oki kotou e, te apii nei kotou i te ture a Mose. Eaa ra ta kotou i kite i ta te ture a Mose? E tae mai ainei te ora na roto i te ture a Mose? Eaa ta kotou e tuatua maira?

32. E kua pau maira ratou e, ka na roto te ora i te ture a Mose.

33. Kua karanga atura a Abinadaia kia ratou ra, kua kite au e, me akono meitaki kotou i te au akaueanga a te Atua, ka ora kotou, koia oki, kia akono kotou i te au akaueanga i tukuia mai e te Atu kia Mose i runga i te maunga ra ko Sinai, ko tei na ko maira e;

34. Ko au te Atu ko to Atua ra, ko tei arataki mai ia koe mei te enua ra mei Aiphiti, mei te ngutuare oki o te tuikaaanga ra.

35. Auraka rava toou ei Atua ke atu iaku nei.

36. Auraka rava koe e anga i te idolo akatikitikiia noou, e te tu o tetai mea i runga i te rangi ra, e no tetai mea i raro i te enua nei.

37. Kua tuatua atura Abinadaia kia ratou, I akono ana ainei kotou i taua au mea ra? Te tuatua atu nei au kia kotou na, kare rava kotou i pera ana. I apii ana ainei kotou i teianei iti tangata kia rave i taua au mea ra? Te tuatua atu nei au kia kotou na, kare rava kotou i pera ana.