Vaega 100
Faaaliga na tuuina mai ia Iosefa Samita le Perofeta ma Sini Rikitone, i Perisipoka, Niu Ioka, i le aso 12 o Oketopa, 1833. Ona o le tele o aso o toesea nei uso e toalua mai o laua aiga, o lea na laua lagona ai sina popole e uiga ia te i latou.
1–4, Ia talai atu e Iosefa ma Sini le talalelei mo le faaolataga o tagata; 5–8, O le a tuu mai ia te i la’ua i le itula tonu lava mea e tatau ona la’ua fai atu ai; 9–12, Ia avea Sini ma failauga ae avea Iosefa ma talifaaaliga ma malosi i le molimau; 13–17, O le a faatuina mai e le Alii se nuu mamā, ma o e e usiusitai o le a faaolaina.
1 E moni, ua faapea ona fetalai mai o le Alii ia te oulua, a’u uo, o Sini ma Iosefa, o loo manuia o oulua aiga; ua i ai i latou i o’u lima, ma o le a Ou faia ia te i latou e pei ona lelei ia te a’u; ona ua i ai ia te a’u le mana uma.
2 O lea, mulimuli mai ia te a’u, ma faalogo mai i le fautuaga o le a Ou tuu atu ia te oulua.
3 Faauta, ma tagai, ua ia te a’u ni tagata e toatele i lenei mea, i nofoaga o faataamilo ai; ma o le a tatalaina se faitotoa aoga i nofoaga o faataamilo ai i le laueleele lenei i sasa’e.
4 O lea, na tuu atu ai e A’u, o le Alii, oulua, ia oulua o mai i le nofoaga lenei, ona ua faapea ona tatau ai ia te a’u mo le faaolataga o agaga.
5 O lea, e moni Ou te fai atu ia te oulua, ia siitia a’e o oulua leo i lenei nuu; tautala atu mafaufauga o le a Ou tuu i o oulua loto, ma o le a lē faafememeaiina oulua i luma o tagata;
6 Auā o le a tuu atu ia te oulua i le itula tonu lava, ioe, i le minute tonu lava, mea e te lua fai atu ai.
7 Ae Ou te tuu atu ia te oulua se poloaiga, ia oulua alaga atu soo se mea lua te alaga atu i lo’u igoa, i le mamalu o le loto, i le agaga o le agamalu, i mea uma.
8 Ma Ou te tuu atu ia te oulua le folafolaga lenei, e tusa ai ma lo oulua faia o lenei mea, o le a liligi atu le Agaga Paia e molimau i mea uma o soo se mea lua te fai atu ai.
9 Ma ua tatau ia te a’u ona avea oe, la’u auauna, o Sini, ma failauga i lenei nuu; ioe, e moni, o le a Ou faauuina oe i lenei valaauga, e avea lava ma failauga mo la’u auauna o Iosefa.
10 Ma o le a Ou tuu atu ia te ia le mana ia malosi ai i le molimau.
11 Ma o le a Ou tuu atu ia te oe le mana e te malosi ai i le faamalamalamaina o tusitusiga paia uma, ina ia mafai ona avea oe ma failauga mo ia, ma o le a avea o ia ma talifaaaliga mo oe, ina ia mafai ona e iloa le moni o mea uma e faatatau i mea o lo’u malo i le lalolagi.
12 O lea, ia faaauau pea la oulua malaga ma ia olioli o oulua loto; auā faauta, ma tagai, Ou te faatasi ma oulua e oo lava i le iuga.
13 Ma o lenei, Ou te tuu atu ia te oulua se upu e uiga ia Siona. O le a laveaiina Siona, e ui ina a’oa’ina o ia mo se vaitau itiiti.
14 O o oulua uso, o a’u auauna o Orson Hyde ma John Gould, ua i ai i o’u lima; ma e tusa ai ma lo la tausia o a’u poloaiga, o le a faaolaina i la’ua.
15 O lea, ia faamafanafanaina o oulua loto; ona o le a galulue faatasi mea uma mo le lelei o e e savavali sa’o, ma mo le faapaiaina o le ekalesia.
16 Auā o le a Ou faatuina mai mo a’u se nuu mamā, o e e auauna mai ia te a’u i le amiotonu;
17 Ma o i latou uma o e e valaau atu i le suafa o le Alii, ma tausi i ana poloaiga, o le a faaolaina. E faapea lava. Amene.