1 Rainin juon ko̧o̧njeļ eo eutiej in ron̄oulemān pris utiej ro rekar koba ilo m̧weo im̧ōn Josep Smith, Jun., jān revelesōn, im kar wōnm̧aanļo̧k wōt n̄an kajutak ko̧o̧njeļ eo eutiej an kabun̄ eo an Kraist, eo me enaaj kitbuuj jon̄oulruo pris utiej ro, im juon ak jilu president ro āinwōt an case eo maron̄ aikuji.

2 Ko̧o̧njeļ eo eutiej kar jitōn̄ e jān revelesōn kōn un in n̄an mejaļļi men ko reaorōk im reppen ko remaron̄ waļo̧k ilo kabun̄ in, ko rekar jab maron̄ mejaļ jān kabun̄ eo ak ko̧o̧njeļ eo an bisop n̄an bun̄bōro eo an aolep jar ko.

3 Josep Smith, Jun., Sidney Rigdon im Frederick G. Williams kar kile er n̄an president ro jān ainikien ko̧o̧njeļ eo; im Josep Smith, Sen., Jon Smith, Josep Coe, Jon Johnson, Martin Harris, Jon S. Carter, Jered Carter, Oliver Cowdery, Samuel H. Smith, Orson Hyde, Sylvester Smith, im Luk Johnson, pris utiej ro, kar kāālet er bwe ren juon ko̧o̧njeļ eo etōt n̄an kabun̄ in, jān juon wōt ainikien errā an ko̧o̧njeļ eo.

4 Innām riko̧o̧njeļ rein etaer ewaļo̧k ilōn̄ kar kajjitōk ippāer eļan̄n̄e rekar m̧ōņōņō in bōki ijjitōn̄ kein aer ak jaab, im eļan̄n̄e renaaj kar m̧akūtkūt ilo opij in ekkar n̄an kakien ko an lan̄ ak jaab, eo n̄an e aolep rekar uwaak bwe rem̧ōņōņō in bōk ijjitōn̄ ko aer, im naaj kar kōtōpraki opij ko aer ekkar n̄an jouj an Anij likūti ioer.

5 Oran eo kajutake ko̧o̧njeļ eo kake, ro rekar vote ilo etan im n̄an kabun̄ in ilo ijjitōn̄ eo an riko̧o̧njeļ rein etaer ewaļo̧k ijin ilōn̄ rekar en̄ouljilu, āinwōt an ellaajrak: ruwatimjuon pris utiej ro, jon̄ouljiljilimjuon elder ro, emān pris ro, im jon̄ouljilu ro uwaan kabun̄ in.

6 Kar voteeo: ke ko̧o̧njeļ eo eutiej ejjab maron̄ wōr an kajoor n̄an jerbal eļan̄n̄e ejako jiljilimjuon ian riko̧o̧njeļ rein ej ellaajrak etaer ewaļo̧k ijin ilōn̄, ak ro jān iien n̄an iien kar jitōn̄ er bwe ribōk jikier im rej pād.

7 Rein jiljilimjuon enaaj wōr aer kajoor n̄an jitōn̄ pris utiej ro jet, ro remaron̄ in watōk er tōllo̧ke im remaron̄ jerbal ilo jikin riko̧o̧njeļ ro rejako.

8 Kar voteeo: bwe jabdewōt iien peļļo̧k enaaj waļo̧k jān mej, kōm̧akūt jān opij kōn bōd, ak kōm̧akūt jān tōrerein ko an kien in an kabun̄, an jabdewōt ian riko̧o̧njeļ rein ewaļo̧k etaer ilōn̄, naaj ņa kobban jān jokāālet eo an president eo ak president ro, im kōmaron̄ jān ainikien aolepān ko̧o̧njeļ eo an pris utiej ro, eo kar kakwelo̧k e n̄an un in, n̄an m̧akūtkūt ilo etan kabun̄ in.

9 President eo an kabun̄ in, eo ej barāinwōt president eo an ko̧o̧njeļ eo, ej jitōn̄e jān revelesōn, im kile ilo ium̧win kajeikik eo an jān ainikien kabun̄ eo.

10 Im ej ekkar n̄an aō eo an opij eo an bwe en tōl ioon ko̧o̧njeļ eo an kabun̄ in; im ej an utiej n̄an an bōk jipan̄ jān bar ruo president ro, ro kar jitōn̄ er ilo ejja wāween eo wōt e make kar jitōn̄ e kake.

11 Im ilo case in jako eo an juon ak jim̧or ian ro kar jitōn̄ er n̄an jipan̄ e, e ewōr an kajoor n̄an tōl ioon ko̧o̧njeļ eo ilo ejjeļo̧k juon rijipan̄; im ilo case eo n̄e e make ejako, president ro jet ewōr aer kajoor n̄an tōl ilo ijo jikin, jim̧or ak kajjojo make iaer.

12 Jabdewōt iien n̄e juon ko̧o̧njeļ eo eutiej an kabun̄ eo an Kraist ej jutak jān iien n̄an iien, ekkar n̄an jon̄ok eo im̧aanļo̧k, e naaj kuņaan jon̄oulruo riko̧o̧njeļ ro n̄an kūbween kijdik jān bōnbōn ko, im jān jekjek in lale wōn ian ro jon̄oulruo enaaj ekkōnono m̧okta, ijjino ippān nōm̧ba juon im āindein ilo karkan n̄an nōm̧ba jon̄oulruo.

13 Jabdewōt iien n̄e ko̧o̧njeļ in ej kobatok n̄an jerbale jabdewōt case, riko̧o̧njeļ ro jon̄oulruo enaaj watōke eļan̄n̄e ej juon eo epen ak jaab; eļan̄n̄e ej jab, ruo wōt ian riko̧o̧njeļ ro renaaj kōnono kake e, ekkar n̄an jekjek eo ilōn̄ jeje kake.

14 A eļan̄n̄e ļōmņak kake e bwe epen, emān naaj jitōn̄e er; im eļan̄n̄e epenļo̧k, jiljino; a ilo ejjeļo̧k case eban lōn̄ļo̧k jān jiljino jitōn̄e n̄an ekkōnono.

15 Eo ņa ruōn, ilo case ko otemjej, ewōr an jim̧we n̄an jimattan in ko̧o̧njeļ eo, n̄an bōbrae kajjookok ak jab jim̧we.

16 Im riko̧o̧njeļ ro jitōn̄ er n̄an ekkōnono im̧aan ko̧o̧njeļ eo ren jakem̧aantak case eo, ālikin kein kam̧ool ko kar etali, im ilo lukkuun jekjek eo an im̧aan ko̧o̧njeļ eo; im aolep em̧m̧aan ej ekkōnono ekkar n̄an jejjet im jim̧we.

17 Riko̧o̧njeļ ro rekar jibwe nōm̧ba ko remaron̄ ajej, er kein, 2, 4, 6, 8, 10, im 12 rej armej ro rej jutak ilo etan eo ņa ruōn, im bōbrae kajjookok ak jab jim̧we.

18 Ilo aolep case kein eo ej kinaakļo̧k im armej eo ņa ruōn enaaj wōr aer utiej in ekkōnono kōn er make im̧aan ko̧o̧njeļ eo, ālikin kar ron̄jaki kein kam̧ool ko im riko̧o̧njeļ ro kar jitōn̄ er n̄an ekkōnono kōn case eo em̧ōj kar ennaan ko aer.

19 Ālikin kar ron̄jaki kein kam̧ool ko, riko̧o̧njeļ ro, armej eo ej kinaakļo̧k im armej eo ņa ruōn ekar dedeļo̧k aer kōnono, president eo enaaj letok jem̧ļo̧k eo ekkar n̄an jeļāļo̧kjeņ eo me enaaj bōke kōn case eo, im kūr ioon riko̧o̧njeļ ro jon̄oulruo n̄an kapen ejja jem̧ļo̧k in wōt kōn vote ko aer.

20 A eļan̄n̄e riko̧o̧njeļ ro jet, ro rekar jab ekkōnono, ak jabdewōt iaer, ālikin ron̄jaki kein kam̧ool ko im akweļap ko ilo ejjeļo̧k jepiaan, rej lo juon bōd ilo jem̧ļo̧k eo an president eo, remaron̄ kaalikkar e, im case eo naaj bar ron̄jake.

21 Im eļan̄n̄e, ālikin kanooj kajim̧we bar-ron̄jake eo, jabdewōt kōmeramļo̧k in kakkobaba ej waļo̧k kōn case eo, jem̧ļo̧k eo eaikuj bar oktak āinwōt.

22 A ilo case eo ebar ejjeļo̧k meram letok e, jem̧ļo̧k eo m̧oktata enaaj jutak, ļapļo̧k eo jān jimattan in ko̧o̧njeļ eo ewōr an kajoor n̄an tōpare ejja in wōt.

23 Ilo case in jon̄an pen eo kōn katak im pedped, eļan̄n̄e ej jab bwe kar jeje n̄an kōm̧m̧an bwe en alikkar case eo n̄an ļōmņak ko an ko̧o̧njeļ eo, president eo emaron̄ kajjitōk im bōk ļōmņak eo an Irooj jān revelesōn.

24 Pris utiej ro, n̄e rejako jān ijo kabun̄ epād ie, ewōr aer kajoor n̄an kūr im kajutak juon ko̧o̧njeļ ilo̧kan jon̄ok eo ijin im̧aanļo̧k, n̄an mejaļļi men ko reppen, n̄e aolep ak juon ian party ko ewōr aer ilo abņōņō eo renaaj kajjitōk e.

25 Im ko̧o̧njeļ in ba kake in pris utiej ro enaaj wōr aer kajoor n̄an jitōn̄ juon iaer make n̄an tōl ioon ko̧o̧njeļ in n̄an iien eo.

26 E naaj jerbal an ko̧o̧njeļ in ba kake n̄an jilkinļo̧k, ilo iien eo em̧ōkajtata, juon copy in aolep m̧akūtkūt ko aer, ippān juon dipiio in ennaan in kam̧ool ej ekkejel ippān jem̧ļo̧k eo aer, n̄an ko̧o̧njeļ eo eutiej an jea eo an Presidency eo Kein Kajuon an Kabun̄ in.

27 Eļan̄n̄e aolep ak kajjojo ian ro ewōr aer ilo abņōņō eo rej jab bun̄ burueer ilo jem̧ļo̧k eo an ko̧o̧njeļ in ba kake, remaron̄ bar bōklōn̄tak n̄an ko̧o̧njeļ eo eutiej an Presidency eo Kein Kajuon an Kabun̄ in, im kōm̧m̧ane juon iien bar-ron̄jake, case eo me enaaj kōm̧m̧an, ekkar n̄an jon̄ok eo m̧oktaļo̧k kar je, āinwōt n̄e ejjeļo̧k jem̧ļo̧k ekar kōm̧m̧an.

28 Ko̧o̧njeļ in pris utiej rein ijo ettoļo̧k kūri wōt ilo case ko rekanooj pen ian case ko rejelōt kabun̄; im ejjeļo̧k case ekkā ak emmakijkij enaaj bwe n̄an kūri ko̧o̧njeļ jab in.

29 Pris utiej ro rej ito-itak ak ro pukottok er ettoļo̧k ewōr aer kajoor n̄an ba eļan̄n̄e emennin aikuj n̄an kūr ko̧o̧njeļ jab in ak jaab.

30 Ewōr juon oktak ikōtaan ko̧o̧njeļ eo eutiej in ak pris utiej ro rej ito-itak ettoļo̧k, im ko̧o̧njeļ eo eutiej an ro rej ito-itak ej bobo in jon̄oulruo rijjilōk, ilo jem̧ļo̧k ko aer.

31 Jān jem̧ļo̧k eo an eo m̧oktaļo̧k emaron̄ wōr bar-ron̄jake; ak jān jem̧ļo̧k eo an eo tokālik ej jab maron̄ kōm̧m̧an.

32 Eo tokālik maron̄ wōt kūri ilo kajitūkini jān ritōl ro reļļap an kabun̄ in ilo case in bōd.

33 Kar jeke: bwe president eo ak president ro an jea eo an Presidency eo Kein Kajuon an Kabun̄ in enaaj wōr an kajoor n̄an kaalikkar eļan̄n̄e jabdewōt case rot in, āinwōt maron̄ kōm̧m̧an iien bar lelōn̄tak, ej ekkar n̄an bar-ron̄jake, ālikin etale unin lelōn̄take im kein kam̧ool ko im ennaan ko rej ekkejel ippān.

34 Innām riko̧o̧njeļ ro jon̄oulruo raar wōnm̧aanļo̧k n̄an kūbween kijdik ak ekkāālel, n̄an lale wōn ej ekkōnono m̧okta, im naan kein ilaļ kar waļo̧k eo, eo in: 1, Oliver Cowdery; 2, Josep Coe; 3, Samuel H. Smith; 4, Luk Johnson; 5, Jon S. Carter; 6, Sylvester Smith; 7, Jon Johnson; 8, Orson Hyde; 9, Jered Carter; 10, Josep Smith, Sen.; 11, Jon Smith; 12, Martin Harris.Ālikin jar kwelo̧k eo eaar kilōk.