Jekjōn 106
Revelesōn letok kōn Josep Smith Rikanaan eo, ilo Kirtland, Ohio, Nobōm̧ba 25, 1834. Revelesōn in ej iiokļo̧k Warren A. Cowdery, juon em̧m̧aan jein Oliver Cowdery.
1–3, Warren A. Cowdery kar kūr e āinwōt juon ritōl; 4–5, Itok eo Kein Karuo ej jamin kailbōk ro nejin meram āinwōt juon riko̧o̧t; 6–8, Jeraam̧m̧an ko reļļap rej ļoor jerbal etiljek ilo Kabun̄ in.
1 E ej ankilaō bwe karejera Warren A. Cowdery en jitōn̄e im kapiti juon pris eutiej in tōl ioon kabun̄ eo Aō, im ilo bukwōn in Freedom im jikin ko ipeļaakin ijo;
2 Im en kwaļo̧k naan kōn gospel eo ejjeļo̧k jem̧ļo̧kin Aō, im kotak ainikien im kakkōl armej ro, jaab ilo ijo jikin make, a ilo kounty ko rej ekkejeltok;
3 Im kōmaatļo̧k aolep iien ko an n̄an kūr in eutiej im ekwōjarjar, eo me kiiō Ij leļo̧k n̄an e, im niknik kappukote aelōn̄ in lan̄ im wānōk eo an, im aolep men ko rekkar renaaj kobaļo̧k ippān; bwe rijerbal eo ej tōllo̧ke wōņāān.
4 Im bar juon alen, em̧ool Ij ba n̄an kom̧, itok eo an Irooj ej epaak, im ej kailbōk laļ in āinwōt juon riko̧o̧t ilo bon̄—
5 Kōn menin, kan̄ōrn̄ōre ipūmi, bwe kom̧in maron̄ ro nejin meram, im bwe raan eo en jab kailbōk kom̧ āinwōt juon riko̧o̧t.
6 Im bar juon alen, em̧ool Ij ba n̄an kom̧, eaar wōr lan̄lōn̄ ilo lan̄ ke karejera Warren eaar badikdik n̄an jokoņ eo Aō, im kōjenolo̧k e jān m̧oņ ko an armej raņ;
7 Kōn menin, em̧ōņōņō karejera Warren, bwe enaaj wōr Aō tūriam̧okake ioon; im, jekdo̧o̧n juwa eo an būruōn, Inaaj kotak lōn̄ļo̧k e toun wōt an naaj kōttāik e make Im̧aō.
8 Im Inaaj leļo̧k n̄an e jouj im bab-laļ eo kake e emaron̄ jutak; im eļan̄n̄e ej wōnm̧aanļo̧k n̄an juon rikam̧ool etiljek im juon meram n̄an kabun̄ in em̧ōj Aō kōpooje juon kūrawūn n̄an e ilo m̧ōko im̧ōn kiin̄ an Jema. Em̧ool āindein. Amen.