Jekjōn 108
Revelesōn letok kōn Josep Smith Rikanaan eo, ilo Kirtland, Ohio, Tijem̧ba 26, 1835. Jekjōn in kar bōk e jān wōt kajjitōk eo an Lyman Sherman, eo m̧oktaļo̧k ekar ekkapit juon jiljilimjuonn̄oul im eo ekar itok ippān Rikanaan eo kōn juon kajjitōk eo kōn juon revelesōn n̄an kwaļo̧ke jerbal eo an.
1–3, Lyman Sherman em̧ōj jeorļo̧k jero̧wiwi ko an; 4–5, E ej aikuj in bōnbōn ippān elder ro rej tōl ilo Kabun̄ in; 6–8, E kar kūri n̄an kwaļo̧k naan kōn gospel eo im kōkajoorļo̧k ro jein im jatin.
1 Em̧ool āindein Irooj ej ba n̄an eok, rikarejera Lyman: Jero̧wiwi ko am em̧ōj jeoriļo̧k jān eok, kōnke kwaar pokake Ainikiō ilo wanlōn̄tak ijin jibbon̄ōn in n̄an bōk kapilōk an eo em̧ōj Aō kar jitōn̄ e.
2 Kōn menin, kōtļo̧k bwe jetōb eo an en kakkije kōn am jutak ilo mour in jetōb, im jab bar jum̧ae Ainikiō.
3 Im kwōn jutak im tiljekļo̧k jān kiiō m̧aanļo̧k ilo kōjparok kanejnej ko am, ko kwaar kōm̧m̧ani im ko kwōj kōm̧m̧ani, im kwo naaj jeraam̧m̧an kōn elōn̄ kōjeraam̧m̧an ko reļļap.
4 Kōttar im kōmmaanwa m̧ae kwelo̧k ekwōjarjar eo naaj kūri jān ro rikarejera, innām naaj keememej eok ippān elder ro Aō m̧oktata, im bōk jim̧we jān ekkapit ippān aolep elder ro Aō im Iaar kāālet er.
5 Lo, en̄in ej kallim̧ur eo an Jemān n̄an eok eļan̄n̄e kwōj tiljek wōt.
6 Im enaaj kūrm̧ool ioom̧ ilo raan en bwe enaaj wōr am jim̧we n̄an kwaļo̧k naaj kōn gospel eo Aō ijoko jabdewōt Inaaj jilkinļo̧k eok, jān kiiō m̧aanļo̧k n̄an iien en.
7 Kōn menin, kōkajoorļo̧k ro jeiūm̧ im jatūm ilo aolep kōm̧m̧ao ko am, ilo aolep jar ko am, ilo aolep kōketak ko am, im ilo aolep kōm̧m̧an ko am.
8 Im lo, im lo, Ij pād ippam̧ n̄an kōjeraam̧m̧an eok im kōjo̧o̧r eok indeeo. Amen.