1 Te katituaraoi nakon aram, O te Uea ae Atuan Iteraera, are e kawakina te berita ae tabu ao ni kaota te nanoanga nakoia am taan mwakuri ake a nakonako i nanon te raoiroi i matam, ma nanoia ni kabane—

2 Ngkoe are ko a tia n tuangiia am taan mwakuri bwa a na katea te auti nakon aram n te tabo aei [Kirtland].

3 Ao ngkai ko nooria, O te Uea, bwa am taan mwakuri a tia ni karaoia ni kaineti nakon am tua.

4 Ao ngkai ti butiiko, te Tama ae Tabu, n aran Iesu Kristo, Natin bwanibwanim, tii n arana ae kona n reke te kamaiuaki nakoia natiia aomata, ti butiiko, O te Uea, bwa ko na butimwaea te auti aei, mwakurin baira, am taan mwakuri, are ko tuangiira bwa ti na kateia.

5 Bwa ko ataia bwa ti a tia ni karaoa te mwakuri aei rinanon karawawata aika korakora; ao man kainanora ti a tia n anga ara bwai ni katean te auti nakon aram, bwa e aonga Natin te Aomata n iai te tabo ae na kaotia iai nakoia ana aomata.

6 Ao n aron ae ko a tia n taekinna n te kaotioti, are e kaotaki nakoira, ni weteira bwa raom, ni kangai—Tewea te botaki n taromauri, n aron ae I a tia n tuangkami;

7 Ao ibukina bwa tiaki ni kabane iai aia onimaki, kam na botumwaaka n ukoukouri ao n reirei i marenami taeka ni wanawana; eng, ukoukori man booki aika moan te raoiroi taeka ni wanawana; ukoukoura te rabakau, n te kamatebwai ao n te onimaki naba.

8 Barongaingkami; katauraoi bwaai nako aika kainnanoaki, ao katea te auti, ae te auti n tataro, te auti n aki mamatam, te auti n onimaki, te auti n reirei, te auti ni mimitong, te auti ae baireaki raoi, ana auti te Atua;

9 Bwa rinimi e aonga ni karaoaki n aran te Uea, bwa otinakomi e aonga ni karaoaki n aran te Uea, bwa ni kabane ami kamauri a aonga ni karaoaki n aran te Uea, ma kateani baai nakon are Moan te Rietata—

10 Ao ngkai, te Tama ae Tabu, ti butiiko bwa ko na buokiira, am aomata, ma am akoi, n tewean ara botaki n taromauri, bwa e aonga ni karaoaki nakon karineam ao nakon am butimwaai ae tabu;

11 Ao n te aro bwa ti aonga ni kuneaki n tau, i matam, ni karekea kakoroan bukin te berita are ko a tia ni karaoia ma ngaira, am aomata, n taian kaotioti ake a kaotaki nakoira;

12 Bwa e aonga mimitongim n tiku i aoia am botanaomata, ao i aon am auti aei, are ti katabua nakoim, bwa e aonga ni katabuaki bwa e na tabu, ao bwa kaotim ae tabu e aonga n reitinako n te auti aei;

13 Ao bwa aomata ni kabane ake a na rin ni mataroan ana auti te Uea a aonga n namakina mwaakam, ao n namakina kairoroakiia ni kakoaua bwa ko a tia ni katabua, ao bwa bon am auti, nem ae tabu.

14 Ao ni kariaia, te Tama ae Tabu, bwa ni kabane naake a na taromauri n te auti aei a na kona n reireiaki taeka ni wanawana man booki aika moan te raoiroi, ao bwa a aonga n ukoukora te rabakau man te kamatebwai, ao man te onimaki naba, n aron ae ko a tia n taku;

15 Ao bwa a aonga n rikirake iroum, ao ni karekea bwaninin te Tamnei ae Raoiroi, ao ni baireaki ni kaineti nakon am tua, ao n tauraoi ni karekei bwaai nako aika kainanoi;

16 Ao bwa te auti aei e aonga n riki bwa te auti n tataro, te auti n aki mamatam, te auti n onimaki, te auti ni mimitong ao ana auti te Atua, am auti;

17 Bwa riniia ni kabane am aomata, nakon te auti aei, aonga ni karaoaki n aran te Uea;

18 Bwa ni kabane otinakoia man te auti aei aonga ni karaoaki n aran te Uea;

19 Ao bwa ni kabane aia kamauri a aonga ni karaoaki n aran te Uea, ma baai aika tabu, a tabekaki nakon are Moan te Rietata;

20 Ao bwa akea te bwai ae e bareka ae e na kariaiakaki n rin nako n am auti ni kabaereka;

21 Ao ngkana am aomata a bure, temanna i buakoia, a riai ni waekoa n raira nanoia ao n oki nakoim, ao ni karekea te akoaki i matam, ao ni kaoki kakabwaia ake ko a tia ni katabui bwa a na bwaro nako aoia naake a karineko n am auti.

22 Ao ti butiiko, te Tama ae Tabu, bwa am taan mwakuri a aonga ni waaki man te auti aei n irianaki ma mwaakam, ao bwa aram e aonga ni mena i aoia, ao mimitongim e katoomimia, ao am anera a tararua i aoia;

23 Ao man te tabo aei a aonga n uotii mwakuri aika korakora ao ni mimitong, n te koaua, nakon tabotabon te aonaba, bwa a aonga n ataia bwa aio am mwakuri, ao bwa ko a tia n arora baim, ni kakoroa bukin are ko a tia n taekin man wiia burabeti, ni kaineti nakon boong aika kaitira.

24 Ti butiko, te Tama ae Tabu, bwa ko na kateimatoaia aomata ake a na taromauri, ao ni karineaki araia ao ni iai mwiokoaia n am auti aei, nakon rooro ni kabane ao ibukin te tai ae akea tokina;

25 Bwa akea bwai n ibuaka ae karaoaki ni kaitaraia ae e na tokanikai; bwa ane e kekena te mwanono ibukiia e na manga bon bwaka nako iai;

26 Bwa akea botaki aika buakaka ae a na karekea te mwaaka n teirake ao n tokanikai i aoia am aomata ake a na katokaaki aram i aoia n te auti aei;

27 Ao ngkana aomata nako a na teirake ni kaitaraia aomata aikai, bwa e na kauraaki unim nakoia;

28 Ao ngkana a na oreia aomata ikai ko na oreia; ko na buaka ibukiia am aomata n aron are ko karaoia ni bongin te buaka, bwa a aonga ni kamaiuaki man baia ni kabane aia kairiribai.

29 Ti butiko, te Tama ae Tabu, ni kamangaoia, ao ni kamimiia, ao ni uotia nakon te kamamaeaki ao te mangaongao, ni kabane naake a tia n kabuti rongorongo aika kewe n aaba nako, n te aonaba ni kabane, ni kaitaraia am tia mwakuri ke taan mwakuri, ngkana a aki rairananoia, ngkana te euangkerio ae akea tokina e na katanoataaki i taningaia;

30 Ao bwa ni kabane aia mwakuri a na aki koro bukiia, ao n taeaki nako n te karau te aiti, ao man te motikitaeka are ko na kanakoa nako aoia n unim, bwa e aonga n iai te toki nakon keewe ao kabuakaka ni kaitaraia am aomata.

31 Bwa ko ataia, O te Uea, bwa am taan mwakuri a tia n aki bure imatam ni kaotan koauan aram, are a tia ni karawawataki ibukin bwaai aikai.

32 Mangaia are ti bubuti i matam ibukin te kamaiuaki ae kororaoi ma ni bwanin mai i aan te amo aei;

33 Urua, O te Uea; urua man roroaia am taan mwakuri, ni mwaakam, bwa ti aonga n teirake i buakon te roro aei ao ni karaoa am mwakuri.

34 O Iehova, nanoangaia aomata aikai, ao ibukina ni kabane aomata a bure, kabwarai riaoan te tua irouia am botanaomata, ao ni kamaunaaki n aki toki.

35 Kataua kabirakiia am minita bwa e na kabaeaki i aoia ma te mwaaka mai eta.

36 Kataua bwa e na kakoroaki bukina i aoia, n aroia naake ni bongin te Bentekota; kataua te bwaintituaraoi n te neewe ni bwaro nako aoia am aomata, neewe aika kirimangamanga n ai aron te ai, ao rairairi mai iai.

37 Ao e riai am auti ni kaonaki, ma mimitongim, ae ai aron karen te ang ae korakora.

38 Kaaki i aoia am taan mwakuri kakoauaan te berita ae tabu, bwa ngkana a nako ao ni katanoata am taeka a na kona ni kamatoa te tua, ao ni katauraoi nanoia am aomata aika itiaki ibukin motikitaeka ni kabane akanne are ko nang kanakoi, n unim, i aoia kaain te aonaba, ibukin riaoan te tua irouia, bwa aonga am aomata n aki mamaara ni bongin te kaangaanga.

39 Ao kaawa nako are am taan mwakuri a na rin iai, ao aomata n te kaawa anne a butimwaea aia koaua, kataua am rau ao am kamaiu ni mena i aon te kaawa anne; bwa a aonga ni ikotiia aika a raoiroi man te kaawa anne, bwa a aonga n roko nakon Tion, ke nakon ana titeiki, taabo are ko a tia n rineia, ma anenen te kimwareirei ae akea tokina;

40 Ao ni karokoa ae kakoroaki bukin aio, tai kataua am motikitaeka ni bwaka i aon te kaawa anne.

41 Ao kaawa nako are am taan mwakuri a na rin iai, ao aomata n te kaawa anne a aki butimwaea aia koaua am taan mwakuri, ao am taan mwakuri a kauringiia bwa a na kamaiuia i bon irouia man te roro aei ae kamangao, e riai ni mena i aon te kaawa anne ni kaineti ma are ko a tia n taekinna man wiia am burabeti.

42 Ma kamaiuiia, O Iehova, ti bubutiko, am taan mwakuri man baia, ao kaitiakiia man raraaia.

43 O te Uea, ti aki kukurei ni kamaunakiia raora n aomata; tamneia a rang ni kakawaki imatam;

44 Ma am taeka a riai ni kakoroaki bukiia. Buokiia am taan mwakuri bwa a na kangai, ma am akoi e na buokiia: E na karaoaki nanom, O te Uea, ao tiaki nanora.

45 Ti ataia bwa ko a tia n taekin man wiia am burabeti bwaai aika a kakamaku ni kaineti ma naake a buakaka, ni boong aika kaitira—bwa ko na kabwaroa am motikitaeka, n akea baireana;

46 Mangaia are, O te Uea, kamaiuiia am aomata man aia kaangaanga naake a buakaka; katauia am taan mwakuri bwa a na kabaea te tua, ao ni kabaea te koaua, bwa a aonga n tauraoi ni kaitaraa bongin te kabuokaki.

47 Ti butiiko, te Tama ae Tabu, n uringiia naake a tia ni kanakoaki mai irouia kaain te aono ae Jackson, Missouri, man abaia ni bwaibwai, ao ni maenako, O te Uea, te amo ni karawawata aei are e a tia ni katokaaki i aoia.

48 Ko ataia, O te Uea, bwa a tia ni kainanoaki ao ni kakorakaiaki korakora mai irouia aomata aika buakaka; ao nanora a taonako n te nanokawaki ibukin rawawataia ae korakora.

49 O te Uea, e na maanra te tai ae ko na kariaia aomata aikai n rinanon te karawawataaki aei, ao tangiia ake akea aia bure a waerake nakon taningam, ao raraaia a waerake bwa te kakoaua i matam, ao n aki karaoa kaotan am kakaoaua ibukiia?

50 Nanoangaia, O te Uea, aomata aika taan iowaawa aika buakaka, ake a tia ni kanakoia am aomata, bwa a aonga n toki aia kuribwai, bwa a aonga n raira nanoia man aia bure ngkana te rairananoia e kona ni kuneaki;

51 Ma ngkana a aki, kaota mwaakan baim, O te Uea, ao kaoka are ko a tia n rineia bwa Tion nakoia am aomata.

52 Ao ngkana a aki kona ni bitaki, n te aro bwa e aonga aia waki am aomata n aki kabwaka i matam, ke kauraki unim, ao unim e na bwaka i aoia, bwa a aonga n rai ma ni mate, wakaaia ma mwangaia, mai i an karawa;

53 Ma ngkana a teimatoa n raira nanoia, ko akoi ao n nanoanga, ao ni katannakoa unim ngkana ko tara ubun are am Kabiraki.

54 Nanoangaia, O te Uea, aba ni kabane n te aonaba; nanoangaia taan kairiri i abara; a riai tuua akanne, ake a rang ni kamanoaki ma te karinerine ao te ninikoria irouia ara bakatibu, are, Tuan abara ae Maungatabu, ni kateimatoaki n tai nako.

55 Uringiia uea, nati n uea mwaane, tooka, ao ake a kakannato n te aonaba, ao aomata ni kabane, ao ekaretia, ao kainnano ni kabane, ake akea aia bwai, ao ake a karawawataaki n te aonaba;

56 Bwa nanoia e aonga ni kamarauaki ngkana am taan mwakuri a na nako man am auti, O Iehova, ni kaota koauan aram; bwa e aonga aia motikitaeka ae e aki riai ni mauna n atakin te koaua, ao a aonga am aomata ni karekea te akoaaki i mataia ni kabane;

57 Bwa a aonga ni kabane tabotabon te aonaba n ataia bwa ngaira, am taan mwakuri, ti a tia n ongo bwanaam, ao bwa ko a tia ni kanakoira;

58 Bwa mai i buakon bwaai aikai, am taan mwakuri, natin Iakobwa, a aonga n ikotiia ake a raoiroi ni katea te kaawa ae tabu nakon aram, n aron are ko a tia n tuangiia.

59 Ti butiiko bwa ko na rineia nakon Tion titeiki tabeua irarikin aei are ko a tia n rineia, bwa ikotakiia am aomata a aonga ni waaki n te mwaaka ae korakora ao ueana, bwa am mwakuri e aonga ni kauarerekeaki n te raoiroi.

60 Ngkai taeka aikai, O te Uea, ti a tia n taekin i matam, ni kaineti ma kaotioti ao tuua ake ko a tia n anganira, ngaira ake ti atongaki bwa Tientaire.

61 Ma ko ataia bwa e korakora am tangira ibukiia natin Iakobwa, ake a tia ni kamaenakoaki i aon maunga n te tai ae maan, n te bong ae uananginang ao n roo.

62 Mangaia are ti butiiko bwa ko na nanoangaia natin Iakobwa, bwa Ierutarem, man te aoa aei, e aonga ni moanaki kabooana;

63 Ao e aonga te amo n tautoronaki ni moanna n uruakaki man ana auti Tawita;

64 Ao aonga natin Iuta ni moana okiia nakon aaba ake ko anga nakon Aberaam, aia bakatibu.

65 Ao ni bubuti bwa nikiraia kanoan Iakobwa, ake a tia ni kamaraiaaki ao n oreaki ibukin riaoan te tua irouia, a na rairaki man aroia ni iowaawa man tiritiri nakon bwaninin te euangkerio ae akea tokina;

66 Bwa a aonga ni kawenei aia bwai ni buaka n tiritiri, ao ni katoka aia kakaaitara.

67 Ao a aonga ni kabane nikiran Iteraera ake a kamaenakoaki, ake a tia ni kanakoaki nako tabotabon te aonaba, ni karekea atakin te koaua, ni kakoaua te Mesia, ao ni kabooaki man te bwainikirinaki, ao ni kimwareirei i matam.

68 O te Uea, uringa am tia mwakuri, Iotebwa Timiti te Ataei, ao ni kabane karawawatana ao bwainikirinakina—e kanga n tia ni berita ma Iehova, ao ni berita nakoim, O Atuan Iakobwa ae Mwaaka—ao tua ake ko a tia n anganna, ao bwa e a tia ni kataia ma nanona ae koaua ni karaoa am kantaninga.

69 Nanoangaia, O te Uea, buuna ao natina, bwa a aonga ni karietaaki i matam, ao ni kawakinaki ni baim n tobwa.

70 Nanoangaia ni kabane ana koraki ni kaan, bwa e aonga aia motikitaeka ae e aki riai n uruaki ao n taenakoaki n te ieka; bwa a aonga n rairaki ao ni kabooaki ma Iteraera, ao n ataia bwa ngkoe te Atua.

71 Uringia, O te Uea, taian beretitenti, ni kabane beretitenti n am ekaretia, bwa angataim e aonga ni karietaia, ma aia utu ni kabane, ao aia koraki ni kaan, bwa aonga araia n reitinako ao n uringaki n aki toki man te roro teuana nakon te roro teuana.

72 Uringia ni kabane am ekaretia, O te Uea, ma aia utu ni kabane, ao ni kabane aia koraki ni kaan, ma ni kabane aia aoraki ao ake a karawawataaki, ma ni kabane ake a kainnano ao n nimamannei n te aonaba; bwa te abanuea, are ko a tia ni karaoia n akea baai, e aonga n riki bwa te maunga ae korakora ao ni kaonrakea te aonaba ni kabuta;

73 Bwa e aonga am ekaretia ni waaki man rereuan te roo, ao n oota n tamaroa n ai aron namwakaina, n itiaki n ai aron taai, ao ni kakamaku n ai aron te taanga ni buaka ma aia buraeki;

74 Ao ni katamaroaki n ai aron te tia mare te aine ibukin te bong anne ngkana ko na kaki rabunan karawa, ao ni kariki maunga bwa a na bwaro rikaki imatam, ao mwarua bwa a na karietaaki, ao taabo aika tabukibuki n riki n aoraoi; bwa e aonga mimitongim ni kaonrakea te aonaba;

75 Bwa ngkana e tang te buu ibukiia maate, ti na uotaki rake n te nang ni kaitibo ma ngkoe, bwa ti aonga ni mena i rarikin te Uea n aki toki;

76 Bwa aonga kunnikaira ni itiaki, bwa ti aonga ni kunnikaiaki n te niniira ae te raoiroi, ma baan baam i nanon baira, ao baunuean te mimitong i aon atuura, ao ni karekea te kimwareirei ae akea tokina ibukin kainnanora ni kabane.

77 O te Uea ae te Atua ae Moan te Mwaaka, ongo n ara bubuti aikai, ao kaekaira mai karawa, nem ae tabu, ike ko tekateka i aon am kai n tokanuea, ma te mimitong, te karineaki, te mwaaka, ueana, te korakora, te tautaeka, te koaua, te motiraoi, te motikitaeka, te nanoanga, ao bwanininna ae akea tiana, man ae akea tokina nakon ae akea tokina.

78 O ongo, O ongo, O ongo iroura, O te Uea! Ao kaekai bubuti aikai, ao butimwaea katabuan te auti aei nakoim, mwakurin baira, are ti a tia ni kateia nakon aram;

79 Ao te ekaretia naba aei, ni katoka i aona aram. Ao buokiira ni mwaakan Tamneim, bwa ti aonga ni ikotii bwanara ma taian terabim aika a oota mwaaka, n raneanea ni katomimia am kai n tokanuea, ma bwana ni kamoamoaa, n anenea Otanna nakon te Atua ao te Tiibu te Teei!

80 Ao kariaia, am aomata aikai ake ko a tia ni kabiria, bwa a na kunnikaiaki n te kamaiuaki, ao am aomata aika itiaki a takarua ni kimwareirei. Amen, ao Amen.