1 E moni ua faapea ona fetalai mai o le Alii ia te oe la’u auauna Thomas: Ua Ou faalogoina au tatalo; ma ua matauina au galuega alofa mama o se faamanatuga i o’u luma, e fai mo i latou na, o ou uso, o e ua filifilia e molimau atu lo’u igoa ma auina atu i fafo i atunuu uma, ituaiga, gagana, ma nuu, ma ua faauuina e ala i agavaa o a’u auauna.

2 E moni Ou te fai atu ia te oe, sa i ai ni mea itiiti i lou loto ma faapea foi ia te oe sa lē fiafia i ai A’u, o le Alii.

3 Ae ui i lea, talu ai ona ua e faamaualaloina oe lava o le a faaeaina oe; o lea, ua faamagaloina au agasala uma mai ia te oe.

4 Ia fiafia lou loto i luma o o’u mata; ma ia e molimau atu lo’u igoa, e lē na’o i Nuuese, ae i tagata Iutaia foi; ma ia e auina atu la’u upu i tuluiga o le lalolagi.

5 O lea, ia e finafinau, i lea taeao i lea taeao; ma ia tuu atu lou leo lapatai e alu atu i lea aso ma lea aso; ma a oo mai le po, aua ne’i tuua o e nonofo i le lalolagi ia momoe, ona o lou tautala atu.

6 Ia faailoa atu le mea e te nofo ai i Siona, ma aua ne’i aveesea lou fale; ona ua i ai ia te A’u, o le Alii, se galuega tele mo oe e te faia, i le faasalalauina atu o lo’u igoa i totonu o le fanauga a tagata.

7 O lea, ia fusi i ou sulugatiti mo le galuega. Ia faasee foi ou vae, ona ua filiilia oe, ma ua taatia lou ala i totonu o mauga, ma i totonu o atunuu e tele.

8 Ma o lau upu o le a faamaualalo ai le toatele o tagata maualuluga, ma o lau upu o le a faaea ai le toatele o e maualalalo.

9 O le a avea lou leo o se aoaiga i lē ua solitulafono; ma o lau aoaiga ia tuu ai le laulaufaiva o le taufaaleaga ia taofi lona faapi’opi’o.

10 Ia e lotomaualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo.

11 Ua Ou iloa lou loto, ma ua Ou faalogo i au tatalo e faatatau i ou uso. Aua le faapito’au ia te i latou i le alofa sili atu i lo le toatele o isi, ae ia tuu atu lou alofa mo i latou e faapei foi mo oe lava; ma ia faateleina lou alofa i tagata uma, ma ia i latou uma o e alolofa i lo’u igoa.

12 Ma tatalo mo ou uso o le Toasefululua. Apoapoai malosi atu ia te i latou ona o lo’u igoa, ma ia apoapoaiina i latou ia latou agasala uma, ma ia e faamaoni i lo’u igoa i o’u luma.

13 Ma a mavae atu o latou faaosoosoga, ma puapuaga e tele, faauta, o A’u, o le Alii, o le a Ou aapa atu ia i latou, ma afai latou te lē faamaaa o latou loto, ma lē faamalō o latou ūa e faasaga mai ia te a’u, o le a liua mai i latou, ma o le a Ou faamaloloina i latou.

14 O lenei, Ou te fai atu ia te oe, ma o le mea Ou te fai atu ai ia te oe, Ou te fai atu ai i le Toasefululua uma: Tutulai ia ma fusi i o outou sulugatiti, ma ave i luga a outou satauro, mulimuli mai ia te a’u, ma fafaga a’u mamoe.

15 Aua le faaeaeaina outou lava; aua le fouvale i la’u auauna o Iosefa; aua e moni Ou te fai atu ia te outou, ua Ou faatasi ma ia, ma o le a i luga o ia lo’u lima; ma o ki ua Ou tuu atu ia te ia, ma ia te outou foi, o le a lē aveesea mai ia te ia seia Ou alu atu.

16 E moni Ou te fai atu ia te oe, la’u auauna e Thomas, o oe o le tagata ua Ou filifilia e umia ki o lo’u malo, e faatatau i le Toasefululua, i le lautele i totonu o atunuu uma—

17 Ina ia mafai ona avea oe ma a’u auauna e tatala le faitotoa o le malo i nofoaga uma e lē mafai ona o atu i ai la’u auauna o Iosefa, ma la’u auauna o Sini, ma la’u auauna o Ailama;

18 Aua o luga o i latou ua Ou faataatia ai le avega a aulotu uma mo se vaitau itiiti.

19 O le mea lea, soo se mea latou te auina atu i ai oe, ia e alu, ma o le a Ou faatasi ma oe; ma o soo se mea e te folafola atu ai lo’u igoa o le a tatala mai ai se faitotoa aoga ia te oe, ina ia latou maua la’u upu.

20 Soo se tasi e talia la’u upu ua talia a’u, ma o soo se tasi e talia a’u, ua talia e ia i latou na, o le Au Peresitene Sili, o e ua Ou auina atu, o e ua Ou faia o fautua ia te outou, mo lo’u igoa.

21 O lenei foi, Ou te fai atu ia te outou, soo se tasi tou te auina atu i lo’u igoa, e ala i le leo o outou uso, o le Toasefululua, ua fautuaina mai ma ua faamaonia e outou i le ala e tatau ai, o le a i ai le mana e tatala ai le faitotoa o lo’u malo i soo se atunuu i soo se mea tou te auina atu i ai i latou—

22 E tusa ai ma lo latou faamaualalo o i latou lava i o’u luma, ma tumau i la’u upu, ma faalogo i le leo o lo’u Agaga.

23 E moni, e moni, Ou te fai atu ia te outou, ua ufitia le lalolagi i le pouliuli, ma le pouliuli mafiafia tele i mafaufau o tagata, ma ua leaga ai tagata uma i o’u luma.

24 Faauta, ua vave ona oo mai o le tauimasui i luga o e o nonofo i le lalolagi, o se aso o le toasa, o se aso o le susunuina, o se aso o le faatafunaga, o le tagitu’i, o le faanoanoa, ma o le auega; ma o le a oo mai i luga o le lalolagi atoa e pei o se asiosio, ua fetalai mai ai le Alii.

25 Ma o le a amata i luga o lo’u fale, ma o le a alu atu mai lo’u fale, ua fetalai mai ai le Alii;

26 E muamua i totonu o i latou o i totonu o outou, ua fetalai mai ai le Alii, o e ua fai mai ua latou iloa lo’u igoa ae sa latou lē iloa a’u, ma ua upuleaga faasaga mai ia te a’u i le totonugalemu o lo’u fale, ua fetalai mai ai le Alii.

27 O lea, vaai ia outou lē faapopoleina outou lava e faatatau i mataupu o la’u ekalesia i le nofoaga lenei, ua fetalai mai ai le Alii.

28 Ae ia faamamā o outou loto i o’u luma; ma, ona outou o atu ai lea i le lalolagi atoa, ma talai atu la’u talalelei i tagata uma o e e lei mauaina;

29 Ma o ia o lē e talitonu ma papatiso o le a faaolaina, ma o ia o lē e lē talitonu, ma lē papatisoina, o le a faasalaina.

30 Aua o outou, o le Toasefululua, ma i latou, o le Au Peresitene Sili, o e ua tofia faatasi ma outou e avea ma o outou fautua ma o outou taitai, ua tuuina atu i ai le mana o lenei perisitua, mo aso e gata ai ma mo le taimi mulimuli, lea ua i ai le tisipenisione o le atoaga o taimi,

31 O se mana lea ua outou umia, faatasi ma i latou uma o e na mauaina se tisipenisione i soo lava se taimi mai le amataga o le foafoaga;

32 Aua e moni Ou te fai atu ia te outou, o ki o lenei tisipenisione, ia ua outou maua, na tuuina ifo mai tamā, ma mulimuli lava i mea uma, na auina mai ia te outou mai le lagi.

33 E moni Ou te fai atu ia te outou, faauta i le tele o lo outou valaauga. Faamamā o outou loto ma o outou ofu, ne’i manaomia mai o outou lima le toto o lenei tupulaga.

34 Ia faamaoni se’i Ou alu atu, aua ua vave ona Ou alu atu; ma ua ia te a’u la’u taui e taui atu i tagata taitoatasi e tusa ai i ana galuega. O A’u o le Alefa ma le Omeka. Amene.