1 Chi yaal jo’ka’in naxye li Qaawa’ aawe laa’at inmoos aj Thomas: Wab’ihomeb’ laa tij; ut laa mayej taqenaq jo’ jun jultikahom chiwu, choq’ reheb’ a’an, laa komon, li ke’sik’e’ ru re xch’olob’ankil xyaalal lin k’ab’a’ ut re xtaqlankil chi najt sa’ xyanqeb’ chixjunil li tenamit, junkab’al, aatinob’aal, ut teepal, ut ke’k’ojob’aman chi b’aanunb’il xb’aaneb’ lin moos.

2 Chi yaal ninye aawe, wanjenaq yal junjunq li k’a’aq re ru sa’ laa ch’ool ut aawik’in laa’at li moko nasaho’ ta wi’ chi tz’aqal inch’ool laa’in, li Qaawa’.

3 A’b’anan, a’ yaal jo’ xakub’si aaloq’al taataqsimanq aaloq’al; jo’kan ut, kuyb’il chixjunil aamaak.

4 Chiwanq xsahil aach’ool chiru li wilob’aal; ut laa’at taach’olob’ xyaalal lin k’ab’a’, moko ka’aj ta wi’ chiruheb’ laj Gentil, chiruheb’ aj b’an wi’ laj Judio; ut laa’at taataqla li waatin toj sa’ xmaril li ruchich’och’.

5 Chayal ut aawu, wulaj wulaj, ut rajlal kutan chi’elq lix yaab’ aakux re xtijb’aleb’, ut naq taa’ok q’ojyin me’war li ani wankeb’ sa’ li ruchich’och’, xb’aan laa yehom.

6 Chinawmanq ru laa wochoch sa’ Sion, ut maawisi laa junkab’al; xb’aan naq laa’in, li Qaawa’, wan jun ink’anjel xnimal ru chaab’aanu, re xpuktesinkil lin k’ab’a’ sa’ xyanqeb’ li ralal xk’ajoleb’ li winq.

7 Jo’kan ut, b’ak’ laa yiitoq choq’ re li k’anjel. Tz’aptz’ooq ajwi’ laa woq, xb’aan naq sik’b’il aawu, ut wan laa b’e sa’ xyanqeb’ li tzuul, ut sa’ xyanqeb’ k’iila tenamit.

8 Ut rik’in laa waatin naab’al li taqenaqeb’ te’k’ame’q taq’a, ut rik’in laa waatin naab’al li kub’enaqeb’ te’taqsiiq xloq’al.

9 Lix yaab’ aakux taawanq chixch’iilankil laj q’etol aatin, ut chi ch’iilanb’il aab’aan li ru’uj raq’ laj yoob’anel aatin chixch’anab’ lix po’jenaqil na’leb’.

10 Tuulanaq aach’ool; ut li Qaawa’ laa Dios tatxb’eresi chawuq’, ut tixk’e xsumenkil ru laa tij.

11 Ninnaw ru laa ch’ool, ut wab’ihom laa tij chirixeb’ laa komon. Me’wan chi tiib’ileb’ ru aab’aan sa’ rahok sa’ xb’een naab’al chik; a’ut chiwanq aarahom choq’ reheb’ a’an jo’ choq’ aawe laa’at; ut chinumtaaq laa rahom choq’ reheb’ chixjunil li winq, ut choq’ reheb’ chixjunil li neke’rahok re lin k’ab’a’.

12 Ut chattijoq choq’ reheb’ laa komon xkomoneb’ li Kab’laju. Tijeb’ chi kaw choq’ re lin k’ab’a’, ut che’wanq chi tijb’il xb’aan chixjunil lix maakeb’, ut tiikaqat chiwu chixpaab’ankil lin k’ab’a’.

13 Ut chirix li aaleek te’xk’ul, ut naab’al li rahob’tesiik, k’e reetal, laa’in, li Qaawa’, teb’ink’oxla sa’ inch’ool, ut wi ink’a’ neke’xkawob’resi li raameb’, ut ink’a’ neke’jipo’ xk’a’uxleb’ chiwix, te’jale’q xch’ool, ut laa’in teb’ink’irtesi.

14 Anajwan, ninye aawe, ut li k’a’ru ninye aawe, ninye re chixjunileb’ li Kab’laju: Waklinqex, ut b’ak’omaq lee yiitoq, ut paqomaq lee krus, taaqehomaqin, ut ch’olanihomaqeb’ lin karneer.

15 Meetaqsi eeloq’al eejunes; meepo’resi eech’ool chirix lin moos aj Jose; xb’aan naq chi yaal ninye eere, laa’in wankin rik’in a’an, ut li wuq’ taawanq sa’ xb’een; ut li laaw li kink’e re a’an, ut eere ajwi’ laa’ex, ink’a’ taa’isiiq chaq rik’in a’an toj reetal naq tink’ulunq.

16 Chi yaal ninye aawe, at inmoos Thomas, laa’at li winq li kinsik’ ru re naq k’amk’ooq aab’aan lix laawil lin awa’b’ejihom, jo’ wan chirixeb’ li Kab’laju, chi najt sa’ xyanqeb’ chixjunil li tenamit—

17 Re naq laa’at tatwanq choq’ inmoos re xteeb’al xtz’apleb’ li rokeb’aal li awa’b’ejihom sa’ chixjunil li na’ajej b’ar wi’ lin moos aj Jose, ut lin moos aj Sidney, ut lin moos aj Hyrum, ink’a’ neke’ru chi chalk;

18 Xb’aan naq sa’ xb’eeneb’ a’an xinkanab’ riiqil chixjunileb’ li iglees chiru jarub’aq kutan.

19 Jo’kan ut, yalaq ta b’ar tate’xtaqla, ayu laa’at, ut laa’in tinwanq aawik’in; ut sa’ yalaq b’ar taach’olob’ wi’ lin k’ab’a’, taateemanq jun nimla okeb’aal choq’ aawe, re naq te’ruuq chixk’ulb’al li waatin.

20 Ani nak’uluk re li waatin nikinixk’ul laa’in, ut ani nak’uluk we, naxk’uleb’ a’an, li Xb’eenil Awa’b’ejil, li keb’intaqla, li keb’ink’e choq’ aj k’ehol na’leb’ choq’ re lin k’ab’a’, cheru.

21 Ut jo’kan wi’chik, ninye aawe, naq ani taataqla sa’ lin k’ab’a’, rik’in xyaab’eb’ xkux laa komon, eb’ li Kab’laju, chi taqlanb’ileb’ ut k’eeb’il xwankileb’ chi tz’aqal aab’aan, te’wanq xwankil chixteeb’al li rokeb’aal lin awa’b’ejihom choq’ re yalaq tenamit li b’arwan teetaqlaheb’ wi’—

22 A’ yaal jo’ te’xtuulanob’resi rib’ chiwu, ut te’kanaaq sa’ li waatin, ut te’ab’inq chiru lix yaab’ xkux lin Musiq’.

23 Chi yaal, chi yaal, ninye eere, li q’ojyin naxtz’ap xb’een li ch’och’, ut li nimla q’ojyin lix k’a’uxleb’ li tenamit, ut chixjunil li tz’ejwalej xkana chi po’jenaq chiru li wilob’aal.

24 K’ehomaq reetal, li eeqajunk nachal chi seeb’ sa’ xb’eeneb’ li wankeb’ sa’ li ruchich’och’, jun kutan re josq’il, jun kutan re k’atok, jun kutan re sache’k-u, re yaab’ak, re raho’k ch’oolej, ut re ayaynak; ut jo’ jun sut iq’ taachalq sa’ xb’een chixjunil lix b’een li ch’och’, chan li Qaawa’.

25 Ut sa’ xb’een li wochoch taatiklaaq chaq, ut chalen chaq sa’ li wochoch taa’elq, chan li Qaawa’;

26 Xb’een wa sa’ eeyanq laa’ex, chan li Qaawa’, li kexyehok re naq nekenaw ru lin k’ab’a’ ut ink’a’ kenaw wu, ut kexmajewan chiwix sa’ xyi li wochoch, chan li Qaawa’.

27 Jo’kan ut, chek’e reetal naq ink’a’ teech’a’ajkila eek’a’uxl chirix li k’a’ru na’uxman sa’ lin iglees sa’ li na’ajej a’in, chan li Qaawa’.

28 Chesaqob’resi b’an ru lee ch’ool chiwu; toja’ ut naq chexxik sa’ chixjunil li ruchich’och’, ut chejultika lin evangelio chiru li junjunq li yo’ob’tesinb’il li maji’ nak’uluk re;

29 Ut ani napaab’an ut nakub’e xha’ taakole’q, ut ani ink’a’ napaab’an, ut ink’a’ nakub’e xha’, taak’ehe’q sa’ tojb’a-maak.

30 Xb’aan naq eere laa’ex, li Kab’laju, ut eb’ a’an, li Xb’eenil Awa’b’ejil, li xaqab’anb’ileb’ eerochb’een re te’wanq choq’ aj k’ehol eena’leb’ ut aj jolominel eere, k’eeb’il xwankil li tijonelil a’in, choq’ re li roso’jikil kutan ut choq’ re li jun sutaq chik, sa’ li wan wi’ lix k’ojlajik lix tz’aqalil ru li kutan,

31 Li wankilal li nekek’am wi’ laa’ex, eerochb’een chixjunileb’ li ke’k’uluk re jun k’ojlajik sa’ yalaq jo’q’e chi kutan chalen chaq sa’ xtiklajik li yo’ob’tesink;

32 Xb’aan naq chi yaal ninye eere, eb’ lix laawil li jun k’ojlajik a’in, li kek’ul laa’ex, ke’numsiman chaq chalen rik’ineb’ li yuwa’b’ej, ut anajwan sa’ roso’jik, taqlanb’ileb’ taq’a chalen sa’ choxa eerik’in laa’ex.

33 Chi yaal ninye eere, k’a’jo’ xnimal ru lee b’oqb’al. Ch’ajob’resihomaq lee ch’ool ut lee raq’, maare anchal taapatz’manq reeqaj lix kik’el li tasal tenamit a’in sa’ lee ruq’.

34 Tiikaqex chi paab’ank toj reetal naq tink’ulunq, xb’aan naq tink’ulunq chi seeb’; ut lin q’ajkamuhom wan wik’in re xk’eeb’al reeqaj re li junjunq chi winq a’ yaal chanruhaq xk’anjel. Laa’in li Alfa ut li Omega. Amen.