Isigaba 113
Izimpendulo kweminye imibuzo ngemibhalo ka-Isaya, ezanikwa nguJoseph Smith umPhrofethi, eFar West, eMissouri noma eduze nakhona, ngoMashi 1838.
1–6, ISiqu sikaJese, ihlumela eliphuma kuso, nempande kaJese kuyakhonjwa; 7–10, Insali esabalele yaseSiyoni inelungelo kubo ubuphristi futhi babizelwa ukuba babuyele eNkosini.
1 Ubani iSiqu sika Jese okukhulunywa ngaso evesini lokuqala, elesibili, elesithathu, elesine, nelesihlanu lesahluko seshumi nanye sika Isaya na?
2 Ngiqinisile isho kanje iNkosi: NguKristu.
3 Liyini ihlumela okukhulunywa ngalo evesini lokuqala lesahluko seshumi nanye sika-Isaya, okufanele liphume kuso iSiqu sikaJese na?
4 Bheka, isho kanje iNkosi: Liyinceku ezandleni zikaKristu, nganhlanye ewuzalo lukaJese noluka Efrayimi, noma lwendlu kaJosefa, kuye okubekwe amandla amakhulu.
5 Iyini impande kaJese okukhulunywe ngayo evesini leshumi lesahluko seshumi nanye na?
6 Bheka, isho kanje iNkosi, wuzalo lukaJese, kanye nolukaJosefa kubo ubuphristi obungobabo ngokusemthethweni, ne zikhiye zombuso, ukuze kubekhona isibonakaliso, nokuba kuqoqwe abantu bami ngezinsuku zokugcina.
7 Imibuzo ka-Elias Higbee: Kuqondweni ngomyalo oku-Isaya, esahlukweni samashumi amahlanu nambili, ivesi lokuqala, elithi: Yembatha amandla akho, O Siyoni—futhi yibaphi abantu u-Isaya ayeqondise kubo na?
8 Wayekuqondise kulabo uNkulunkulu okufanele ababize ngezinsuku zokugcina, okufanele baphathe amandla obuphristi ukubuyisa futhi uSiyoni, nokukhululwa kuka-Israyeli; futhi ukwembatha amandla akhe kuwukwembatha igunya lobuphristi, uSiyoni, ane lungelo kubo ngokohlanga; futhi ukuze abuyele kulawomandla ayemlahlekele.
9 Kufanele siqondeni ngokuzikhulula kukaSiyoni ezibophweni zomqala wakhe; evesini lesibili na?
10 Kufanele siqonde ukuthi insali esabalele iyakhuthazwa ukuba ibuyele eNkosini abawa kuyo; okuyothi uma bekwenza, isethembiso seNkosi siwukuthi iyokhuluma nabo, noma ibanike isambulo. Bheka ivesi lesithupha, elesikhombisa, kanye nelesishiyagalombili. Izibopho zomqala wakhe yiziqalekiso zikaNkulunkulu kuye, noma insali ka-Israyeli esimweni sabo zokusabalala phakathi kwabeZizwe.