Vaega 113
O tali i ni fesili faapitoa e uiga i tusitusiga a Isaia, na tuuina mai e Iosefa Samita le Perofeta, i poo tafatafa ane o Far West, Misuri, ia Mati 1838.
1–6, Ua faamatala mai le Pogai o Iese, le tatupu e tupu mai ai, ma le a’a o Iese ua faailoa mai; 7–10, Ua i ai i vaega o totoe ua faataapeapeina o Siona se aiā i le perisitua ma ua valaauina e foi mai i le Alii.
1 O ai le Pogai o Iese ua ta’u mai i fuaiupu 1, 2, 3, 4, ma le 5 o le mataupu 11 o le Isaia?
2 E moni ua faapea ona fetalai mai le Alii: O Keriso lea.
3 O le a le tatupu ua ta’ua i le fuaiupu muamua o le mataupu 11 o le Isaia, lea o le a tupu mai le Pogai o Iese?
4 Faauta, ua faapea ona fetalai mai o le Alii: O se auauna i aao o Keriso, o lē o se vaega o lona tupuga mai e mai ia Iese faapea foi mai ia Efaraima, po o le aiga o Iosefa, o lē ua tuuina i ai le mana tele.
5 O le a le a’a o Iese ua ta’u mai i le fuaiupu 10 o le mataupu 11?
6 Faauta, ua faapea ona fetalai mai o le Alii, o se tasi lea e tupuga mai ia Iese, faapea foi ma Iosefa, o lē e ā tonu le perisitua, ma ki o le malo, e avea ma tagavai, ma mo le faapotopotoina o lo’u nuu i aso e gata ai.
7 O fesili mai ia Elias Higbee: O le a le uiga o le poloaiga o loo i le Isaia, mataupu 52, fuaiupu 1, ua fai mai: Ia ofu i lou malosi, Siona e—ma o ai tagata ua faatatau i ai le tala a Isaia?
8 Sa faatatau o ia ia te i latou o e o le a valaaulia e le Atua i aso e gata ai, o e o le a umia le mana o le perisitua e toe aumai ai Siona, ma le lavea’iga o Isaraelu; ma o le ofu i lona malosi o le ofu lea i le pule o le perisitua, lea ua ia te ia, o Siona, le aiā i ai, e ala i le gafa; ma le tasi foi, ia toe foi atu i lena mana na aveesea mai ia te ia.
9 O le a se mea ia tatou malamalama i ai e uiga i le tatalaina e Siona o ia lava mai noataga o lona ūa; fuaiupu 2?
10 Ia tatou malamalama ua apoapoaiina vaega o totoe ua faataapeapeina ia toe foi mai i le Alii mai mea na latou pa’u’ū ese mai ai; o se mea afai latou te faia, o le folafolaga a le Alii e faapea o le a fetalai mai o ia ia te i latou, pe tuu mai ia te i latou faaaliga. Tagai i le fuaiupu 6, 7, ma le 8. O noataga o lona ūa, o fetuu ia a le Atua i ona luga, po o vaega o totoe o Isaraelu i lo latou tulaga faataapeapeina i totonu o Nuuese.