Vaega 11
Faaaliga na tuuina mai e ala mai ia Iosefa Samita le Perofeta, i lona uso o Ailama Samita, i Haramoni, Penisilevania, Me 1829. O lenei faaaliga na maua e ala mai i le Urima ma le Tumema i le tali mai i le aioiga ma le olega a Iosefa. Ua faailoa mai i le talafaasolopito a Iosefa Samita e faapea o lenei faaaliga na maua mai ina ua mavae le toefuataiga o le Perisitua Arona.
1–6, O e e galulue i le tovine o le a latou maua le olataga; 7–14, Saili le poto, alaga atu le salamo, faalagolago i le Agaga; 15–22, Tausi i poloaiga, ma suesue i le afioga a le Alii; 23–27, Aua le teena le agaga o faaaliga ma valoaga; 28–30, O e latou te talia Keriso e avea ma atalii o le Atua.
1 Ua le pine ona oo mai o se galuega tele ma le ofoofogia i totonu o le fanauga a tagata.
2 Faauta, o A’u o le Atua; uai mai i la’u upu, lea ua vave ma mamana, ua maai sili atu nai lo se pelu mata-lua, i le vavaeina o sooga ma le su o ivi; o lea ia uai mai ai i la’u upu.
3 Faauta, ua sinasina le fanua, ua saunia e selesele; o lea, ai se e fia selesele ia tuu atu o ia e sasau atu lana selesaito ma lona malosi, ma selesele mai manū o ao, ina ia mafai ona teu e ia mo lona agaga le olataga tumau e faavavau i le malo o le Atua.
4 Ioe, ai se e fia sasau atu lana selesaito ma selesele mai, o ia lava lea ua valaaulia e le Atua.
5 O lea, afai e te ole mai ia te a’u o le a e mauaina; afai e te tuitui mai o le a tatala atu ia te oe.
6 O lenei, ona ua e ole mai, faauta, Ou te fai atu ia te oe, tausi i a’u poloaiga, ma saili e aumai ma faatu le faamoemoe o Siona.
7 Aua le saili mo ’oa ae mo le poto; ma, faauta, o le a fofola atu ia te oe mealilo o le malo o le Atua, ma ona faamauoaina ai lea o oe. Faauta, o ia o lē e mauaina le ola e faavavau, ua mauoa.
8 E moni, e moni, Ou te fai atu ia te oe, e pei ona e manao mai ia te a’u o le a faapea lava ona faia ia te oe; ma, afai e te manao i ai, o le a avea oe ma ala o le faia o mea lelei e tele i lenei tupulaga.
9 Ia lē fai atu se mea i lenei tupulaga tau lava o le salamo. Tausi i a’u poloaiga, ma fesoasoani e aumai i luma la’u galuega, e tusa ma a’u poloaiga, ma o le a faamanuiaina ai oe.
10 Faauta, ua ia te oe se meaalofa, pe o le a e maua se meaalofa pe afai e te manao i ai mai ia te a’u i le faatuatua, faatasi ma le loto faamaoni, i le talitonu i le mana o Iesu Keriso, po o lo’u mana lea o loo tautala atu ia te oe;
11 Ona, faauta, o A’u lava lea o loo tautala atu; faauta, o A’u o le malamalama e susulu atu i le pouliuli, ma Ou te tuu atu ia te oe nei upu e ala i lo’u mana.
12 Ma o lenei, e moni, e moni, Ou te fai atu ia te oe, ia tuu atu lou faalagolago i le Agaga lena lea na te taitai ia fai mea lelei—ioe, ia fai mea sao, ia savali ma le lotomaualalo, ia faamasino ma le amiotonu; ma o lo’u Agaga lea.
13 E moni, e moni, Ou te fai atu ia te oe, o le a Ou faaali atu ia te oe lo’u Agaga, lea o le a faapupula ai lou mafaufau, lea o le a faatumulia ai lou agaga i le olioli;
14 Ma ona e iloa ai lea, pe o le a e iloa i lenei mea, i le faatuatua i le talitonu mai ia te a’u o le a e mauaina, mea uma o soo se mea e te manao mai ai ia te a’u, ua faatatau i mea o le amiotonu.
15 Faauta, Ou te poloai atu ia te oe ua lē manaomia ona e manatu e faapea ua valaaulia oe e te talai atu seia valaaulia oe.
16 Faatali laitiiti tēisi, seia e maua la’u upu, la’u papa, la’u ekalesia, ma la’u talalelei, ina ia mafai ona e iloa ma le mautinoa la’u aoaoga faavae.
17 Faauta ona oo lea ina, tusa ai ma ou manao, ioe, o le a faia lava ia te oe e tusa ai ma lou faatuatua.
18 Tausi i a’u poloaiga; taofi lou filemu; aioi atu i lo’u Agaga;
19 Ioe, pipii mai ia te a’u ma lou loto atoa, ina ia mafai ona e fesoasoani i le aumaia i le malamalama o mea na ua fetalaia—ioe, le faaliliuga o la’u galuega; onosai seia maea ona e faataunuuina.
20 Faauta, o lau galuega lenei, e tausi i a’u poloaiga, ioe, ma lou manatu atoa, mafaufau ma lou malosi atoa.
21 Aua le saili e talai atu la’u upu, ae ia muamua saili ia maua la’u upu, ona matala ai lea o lou laulaufaiva; ona oo lea, afai e te manao i ai, o le a e maua lo’u Agaga ma la’u upu, ioe, le mana o le Atua i le faatalitonuina o tagata.
22 Ae i le taimi nei ia taofi lou filemu; suesue i la’u upu lea ua uma ona tuuina atu i le fanauga a tagata, ma suesue foi i la’u upu lea o le a alu atu i totonu o le fanauga a tagata, po o lena lea o loo faaliliuina nei, ioe, seia oo ina e maua mea uma o le a Ou tuu atu i le fanauga a tagata i le tupulaga lenei, ma ona faaopoopo atu ai lea i ai o mea uma.
23 Faauta o oe o Ailama, lo’u atalii; saili le malo o le Atua, ma o le a faaopoopo atu mea uma e tusa ma le mea ua tonu.
24 Ati a’e i luga o la’u papa, o la’u talalelei lea;
25 Aua le teena le agaga o faaaliga, po o le agaga o valoaga, aua oi talofa ia te ia o lē e teena ia mea;
26 O lea, ia teu i totonu o lou loto seia oo mai le taimi lea ua i lo’u poto e te alu atu ai.
27 Faauta, Ou te tautala atu ia te i latou uma ua i ai manaoga lelei, ma ua sasau atu a latou selesaito e selesele mai.
28 Faauta, o A’u o Iesu Keriso, le Atalii o le Atua. O A’u o le ola ma le malamalama o le lalolagi.
29 O A’u lava lea o lē na alu atu i o’u lava ae sa lē talia a’u e o’u lava;
30 Peitai e moni, e moni, Ou te fai atu ia te oe, o le toatele o i latou e talia a’u, o i latou lava ia o e e talitonu i lo’u igoa, o le a Ou tuu atu ia te i latou le mana e avea ai ma atalii o le Atua. Amene.