1 Talu ai ona ua faaali mai e le Alii ia te a’u e faatatau i o’u fili, i Misuri ma le Setete lenei, ua latou toe tuli mai ia te a’u; ma talu ai ona ua latou tuli mai ia te a’u e aunoa ma se pogai, ma ua lē i ai sina ata po o se lanu itiiti o le faamasinotonu po o se aiā i la latou itu i le faaosoina o a latou sauaga e faasaga mai ia te a’u; ma talu ai ona o a latou tuua’iga ua faavae uma i le pepelo o le lama silisili ona uliuli, ua ou manatu ai ua tatau ma ua poto ia te a’u ona tuua le alaalafaga mo se vaitau puupuu, mo lo’u lava saogalemu ma le saogalemu o lenei nuu. Ou te fia fai atu ia i latou o e ua ou fai pisinisi faatasi ma i latou, ua ou tuua a’u mea tau pisinisi i sui ma failautusi o e o le a taulimaina pisinisi uma i se ala vave ma tatau, ma o le a vaai ia soloia a’u aitalafu uma i le taimi e tatau ai, i le faamatuu atu lea o meatotino, po o se isi ala, e pei ona tatau ai i se tulaga, pe tusa ai ma tulaga e mafai ai. A oo ina ou iloa ua uma atu le afā, ona ou toe foi mai ai lea ia te outou.

2 Ma o tugā ua valaaulia a’u ou te ala atu ai, e peiseai ua nao se mea faatauvaa ia mea ia te a’u, ona o le lotovale ma le ita o tagata ua avea ma o’u tulaga masani i aso uma o lo’u olaga; ma o le a se pogai e foliga mai ai o se mealilo lea, vagana ai na faauuina a’u a o le’i faavaeina le lalolagi mo se faamoemoe lelei, pe leaga, e pei ona outou filifili e ta’u ai. Ia outou faamasino mo outou lava. Ua silafia e le Atua ia mea uma, pe lelei pe leaga. Ae e ui i lea, o le vai loloto o le mea lea ua masani ona ou aau ai. Ua avea ia mea uma ma uiga masani ia te a’u; ma ua ou lagona, e pei o Paulo, e olioli i puapuaga; ona ua laveaiina a’u i fafo e le Atua o o’u tamā mai nei puapuaga uma e oo mai i le aso nei, ma o le a ia laveaiina a’u mai le taimi nei ma le agai i luma; aua faauta, ma taga’i, o le a ou manumalo i o’u fili uma, aua ua fetalai mai ai le Alii le Atua.

3 O lea, ia tuu atu i le au paia uma ia olioli, ma fiafia tele; aua o le Atua o Isaraelu o lo latou Atua, ma o le a tuuina mai e ia se taui totogi faamasinotonu i luga o ulu o tagata uma ua faasauā ia te i latou.

4 O lenei foi, e moni ua faapea ona fetalai mai o le Alii: Ia tuu atu le galuega o lo’u malumalu, ma galuega uma ua Ou tofia ia te outou, ia faia pea ma lē taofia; ma ia tuu atu lo outou filiga, ma lo outou maelega, ma le onosai, ma a outou galuega ia toe faaluaina, ma o le a leai se ala e aveesea ai lo outou taui, ua fetalai mai ai le Alii o ’Au. Ma afai latou te sauaina outou, sa faapea foi ona latou sauaina perofeta ma tagata amiotonu o e na muamua ia te outou. Ua i ai se taui mo nei mea uma i le lagi.

5 O lenei foi, Ou te tuu atu ia te outou se upu e faatatau i le papatisoga mo o outou tagata maliliu.

6 E moni, ua faapea ona fetalai mai o le Alii ia te outou e faatatau i o outou tagata maliliu: A papatiso soo se tasi o outou mo o outou tagata maliliu, ia tuu atu ia i ai se tusitalafaamaumau, ma ia tuu atu ia avea o ia o se molimau-vaai o a outou papatisoga; ia tuu atu ia te ia e faalogo i ona taliga, ina ia mafai ona molimau o ia i le moni, ua fetalai mai ai le Alii;

7 Ina ia tusifaamaumauina i le lagi a outou faamaumauga uma; soo se mea tou te faamauina i le lalolagi, e mafai ona faamauina i le lagi; soo se mea tou te tatalaina i le lalolagi, e mafai ona tatalaina i le lagi;

8 Aua ua lata ona Ou toefuatai atu mea e tele i le lalolagi, e faatatau i le perisitua, ua fetalai mai ai le Alii o ’Au.

9 O lenei foi, ia tuu atu ia faatulaga tatau talafaamaumau uma, ina ia mafai ona tuu o i latou i potutusi faamaumau o lo’u malumalu paia, e taofi ai ia manatua mai lea tupulaga i lea tupulaga, ua fetalai mai ai le Alii o ’Au.

10 Ou te fia fai atu i le au paia uma, sa ou manao, ma le naunau tele lava, e tautala atu ia te i latou mai le pulelaa e faatatau i le mataupu o le papatisoga mo e ua maliliu, i le Sapati e sosoo ai. Ae talu ai ona ua lē i ai i la’u pule le faia o lena mea, o le a ou tusia le afioga a le Alii e faatatau i lena mataupu, mai lea taimi i lea taimi, ma auina atu ia te outou i le meli, faapea foi ma le tele o isi mea.

11 Ou te faai’u nei la’u tusi mo le taimi nei, ona ua leai se taimi tele; aua ua lamalama vaavaai le fili, ma e pei ona fetalai le Faaola, ua sau le alii o lenei lalolagi, ae ua leai sana mea o i totonu ia te a’u.

12 Faauta, o la’u tatalo i le Atua, ia faaolaina outou uma. Ma ou te saini a’u lava o la outou auauna i le Alii, o le perofeta ma le tagatavāai O Le Ekalesia a Iesu Keriso o le Au Paia o Aso e Gata Ai.