1 Inton agpakita ti Mangisalakan makitatayonto ti mismo a kinasiasinona. Makitatayonto nga isu ket tao a kas kadatayo.

2 Ket dayta met laeng a pannakipulapol nga adda kadatayo sadiay, makaduaanto laeng iti agnanayon a gloria, a kinadayag a saantayo ita a malak-am.

3 Juan 14:23—Ti panagparang ti Ama ken ti Anak, iti dayta a bersikulo, panagpakita a mismo; ket ti kapanunotan a nagnaed ti Ama ken ti Anak iti puso ti tao daan a panangipagarup dagiti pammati, ket saan a pudno.

4 Kas sungbat iti saludsod—Saan kadi a ti panangusig iti panawen ti Dios, panawen ti anghel, panawen ti propeta, ken panawen ti tao, maibatay iti planeta a pagnanaedanda?

5 Sungbatak, Wen. Ngem awan dagiti anghel nga agpapaay iti daytoy a daga ngem kadagiti para iti daytoy wenno nagpaay iti daytoy.

6 Saan nga agnaed dagiti anghel iti planeta a kas iti daytoy a daga;

7 Ngem agnaedda iti yan ti Dios, iti lubong a kasla iti taaw a sarming ken apuy, a pakaipakitaan amin dagiti banag iti dayagda, iti napalabas, agdama, ken masakbayan, ken agtultuloy iti imatang ti Apo.

8 Ti lugar a pagnaedan ti Dios ket isu ti naindaklan nga Urim ken Tumim.

9 Daytoy a daga, iti napasanto ken saan a matay a kasasaad, maaramidto a kas iti kristal ket isunto ti Urim ken Tumim kadagiti agindeg nga agtaeng ditoy, a pakaipakitaanto amin a banag a maipanggep iti nababbaba a pagarian, wenno amin a pagarian a nababbaba ti kasasaadna, kadakuada nga agtaeng; ket kukuanto ni Cristo daytoy daga.

10 Ket ti puraw a bato a naagapad iti Apocalipsis 2:17, agbalinto nga Urim ken Tumim iti tunggal tao nga umawat iti daytoy, a pakaipakaammuanto dagiti banag a maipanggep kadagiti nangatngato a pagarian;

11 Ket maikkanto iti puraw a bato ti tunggal maysa nga umay iti celestial a pagarian, a pakaisuratan ti baro a nagan, nga awan ti asino man a tao a makaammo malaksid iti umawat. Ti baro a nagan isu ti napateg a balikas.

12 Ipadtok, iti nagan ti Apo a Dios, nga itinto South Carolina ti pangrugian dagiti parikut a pakaigapuanto ti adu nga agsayasay a dara sakbay ti yaay ti Anak ti Tao.

13 Mabalin a bumangonto babaen ti parikut ti tagabo. Daytoy a timek ti naipakdaar kaniak, bayat ti panangikarkararagko a sipapasnek iti daytoy a topiko, idi Disiembre 25, 1832.

14 Agkarkararagak idi a sipapasnek a mangammo iti oras ti yaay ti Anak ti Tao, idi nangngegko ti timek a nangulit iti sumaganad:

15 Joseph, anakko, no agbiagka agingga a maragpatmo ti walopulo-ket-lima a tawen makitamto ti rupa ti Anak ti Tao; ngarud umdas koman daytoy, ket saannakon a riribuken maipanggep iti daytoy a banag.

16 Nabatiak ngarud, a diak makaikeddeng no daytoy a yaay isu ti pangrugian ti millenium wenno kadagiti napalabas a panagparang, wenno nasken a matayak ket iti kasta makitak ti rupana.

17 Mamatiak iti yaay ti Anak ti Tao a saan a nasapsapa ngem iti dayta a panawen.

18 Ania man a pagbatayan iti kinasaririt a magun-odtayo iti daytoy a biag, maitugottayo iti panagungar.

19 Ket no ti tao makagun-od iti ad-adu a pannakaammo ken saririt iti daytoy a biag babaen ti kinaregta ken kinatulnog ngem iti sabali, dakdakkelto nga amang ti gundawayna iti lubong nga umay.

20 Adda paglintegan, a di maibabawi ti pannakaipaulogna iti langit sakbay ti pannakabukel daytoy a lubong, a nakaibatayan amin a bendision—

21 Ket no makagun-odtayo iti ania man a bendision manipud iti Dios, babaen ti panagtulnog iti dayta a paglintegan a naibatay.

22 Nagtagilasag ken nagtagitulang ti Ama a marikna a kas iti tao; kasta met ti Anak; ngem saan a nagtagilasag ken nagtagitulang ti Espiritu Santo, ngem isu ti Kinatao ti Espiritu. No saan a kasta, saan koma a makapagtaeng kadatayo ti Espiritu Santo.

23 Mabalin nga awaten ti tao ti Espiritu Santo, ket mabalinna ti bumaba kenkuana ket saan nga aguray kenkuana.