1 Ngkana e na kaoti te Tia Kamaiu ti na nooria ni bon arona. Ti na nooria bwa bon te aomata n aekara.

2 Ao te iwawaki anne are e riki i buakora ikai e na riki i buakora ikekei, ma e na tii raonaki ma te mimitong ae akea tokina, are te mimitong ae ti aki rinanona ngkai.

3 Ioane 14:23—Kaotin te Tama ao te Nati, n te kibu anne, a bon kaoti n aomata; ao te iango are te Tama ao te Nati a maeka i nanon te aomata bon aia koaua aaro nako ni kiritian ngkoa, ao e aki koaua.

4 Ni kaeka nakon te titiraki—Tiaki e bon baireaki ana tai te Atua, ana tai te anera, ana tai te burabeti, ana tai te aomata, ni kaineti nakon te buraneti are a maeka iai?

5 I kaeka, Eng. Ma akea anera ake a ibuobuoki nakon te aonaba aei ma tii naake kaaina ke a tia ni kaainna.

6 Anera aki maeka i aon te buraneti n aekan te aonaba aei;

7 Ma a maeka i matan te Atua, i aon te aonaba ae aekan taari are te kiraati ao te ai, ike bwaai ni kabane ibukin mimitongiia a kaotaki, ngkoa, ngkai, ao n tai aika a na roko, ao a mena n taai nako i matan te Uea.

8 Te tabo ae e maeka iai te Atua bon te Urim ao Tammim ae korakora.

9 Te aonaba aei, n arona ae katabuaki ao n aki mamate, e na karaoaki n aekan te atibu ae te kiraati ao n riki bwa te Urim ao Tammim nakoia kaaina ake a maeka iai, mai iai bwaai ni kabane ni kaineti nakon te abanuea ae karako arona, ke abanuea ni kabane aika a rinano aia karinan, a na kaotaki nakoia naake a maeka iai; ao te aonaba aei e na bwainna Kristo.

10 Ngkanne te atibu ae mainaina are e taekinaki n Te Kaotioti 2:17, e na riki bwa te Urim ao Tammim nakoia n tatabemaniia naake a karekea, ike bwaai ni kaineti nakon abanuea aika rietata riki karinaniia a na kaotaki;

11 Ao te atibu ae mainaina a anganaki n tatabemaniia nako naake a roko nakon te abanuea ae te tiretio, ike e koreaki te ara ae boou, ae akea te aomata ae e ataia tii ngkana e karekea. Te ara ae boou bon kiingin taeka.

12 I taetae ni burabeti, n aran te Uea ae te Atua, bwa moanakin kangaanga ake a na karika kawawaean te raraa ae korakora i mwaain rokon Natin te Aomata e na riki i South Carolina.

13 Tao e kona n reke rinanon te kangaanga n te tautoronaki. E taekina aei nakoiu te bwana, ngke I tataro ma nanou ni koaua i aon aei, n Ritembwa 25, 1832.

14 I tabe n tataro n te taina ma nanou ni koaua ni kan ataa tain rokon Natin te Aomata, ngke I ongo te bwana ae e taekina aio:

15 Iotebwa, natiu, ngkana ko maiu ni karokoa e koro wanibwi ma nimaua am ririki, ko na noora matan Natin te Aomata; mangaia are e riai aei n tau, ao tai manga katabetabeai i aon aei.

16 I katukaki n arou aio, n aki kona ni iangoia bwa te roko aei e kaineti nakon moan te tenga n ririki ke nakon kaotina tabeua ake mai i mwaina, ke N na mate ao n noora matana.

17 I kakoaua bwa rokon Natin te Aomata e na aki rimoa nakon te tai anne.

18 Tera karinanin te rabakau are ti karekea n te maiu aei, e na iri ma ngaira n te mangauti.

19 Ao ngkana te aomata e karekea te atatai ao te rabakau ae mwaiti n te maiu aei rinanon ana nanomatoa ao ana ongeaba riki nakon temanna, e na karekea rakan arona ae korakora riki n te aonaba ae e na roko.

20 Iai te tua, ae aki kona ni bibitaki are e kateaki i karawa i mwaain karikan te aonaba aei, ake a boto i aona kakabwaia ni kabane—

21 Ao ngkana ti karekei kakabwaia nako mai iroun te Atua, bon man te ongeaba nakon te tua anne are boto i aona.

22 Te Tama iai rabwatana ae te iriko ao te rii ae kona n riingaki n aekan te aomata; te Nati naba; ma te Tamnei ae Raoiroi akea rabwatana ae te iriko ao te rii, ma bon te aomata ae te Tamnei. Ngkana tiaki, te Tamnei ae Raoiroi e aki kona ni maeka inanora.

23 Te aomata e kona ni karekea te Tamnei ae Raoiroi, ao e kona n ruo nako aona ao n aki tiku irouna.