Jekjōn 15
Revelesōn letok kōn Josep Smith Rikanaan eo n̄an Jon Whitmer, ilo Fayette, New York, Juun 1829 (lale kōmmeļeļe ko an jekjōn 14). Ennaan in ijin ekanooj ittino im ekanooj epaak ilo jekjek in ke Irooj ej kōnono kōn ta eo E kab Jon Whitmer wōt rejeļā kake. Jon Whitmer tokālikin eaar erom juon ian Rikam̧ool Ro Ruwalitōk n̄an Bok in Mormon.
1–2, Pein Irooj ej ioon aolepān laļ; 3–6, N̄an kwaļo̧k naan kōn gospel eo im lo̧mo̧o̧ren armej raņ ej men eo eaorōk tata.
1 Eo̧ron̄, rikarejera Jon, im ron̄jaki naan ko an Jisōs Kraist, am Irooj im am Ripinmuur.
2 Bwe lo, Ij kōnono n̄an eok kōn alikkar im kōn kajoor, bwe Peiū ej ioon aolepān laļ.
3 Im Inaaj ba n̄an eok ta eo me ejjeļo̧k armej ejeļā ijello̧kun wōt N̄a im kwe wōt—
4 Bwe elōn̄ iien kwaar kōņaan jeļā jān Eō ta eo en kar kanooj aorōk tata n̄an kwe.
5 Lo, kwo jeraam̧m̧an kōn menin, im kōn ekkōnono naan ko Aō ko Iaar liwōj n̄an eok ekkar n̄an kien ko Aō.
6 Im kiiō, lo, Ij ba n̄an eok, bwe men eo me enaaj aorōk tata n̄an kwe enaaj n̄an kwaļo̧k ukeļo̧k n̄an armej rein, bwe kwōn maron̄ bōktok armej n̄an Eō, bwe kwōn maron̄ kakkije ippāer ilo aelōn̄ eo an Jema. Amen.