Benneg 28
Paltiing a naited ken ni Oliver Cowdery babaen ni Joseph Smith a Propeta, iti Fayette, Nueva York, idi Septiembre 1830 (History of the Church, 1:109–111). Addaan ni Hiram Page, kameng ti Simbaan, iti naisalsalumina a bato ket ibagbagana nga umaw-awat kadagiti paltiing babaen ti tulongna maipanggep iti pannakabangon ti Zion ken ti pannakaurnos ti Simbaan. Sumagmamano a kameng ti naallilaw kadagitoy nga imbagbagana, ket dakkel pay a biddut ni Oliver Cowdery ti pannakapaspasurotna. Kasakbayan la unay ti naituding a taripnong, sipapasnek a nagsaludsod ti Propeta iti Apo ti maipanggep iti dayta a banag, ket simmaruno daytoy a paltiing.
1–7, Iggem ni Joseph Smith dagiti tulbek dagiti kinadatdatlag, ket isu laeng ti makaawat kadagiti paltiing a para iti Simbaan; 8–10, Nasken a kasabaan ni Oliver Cowdery dagiti Lamanite; 11–16, Inallilaw ni Satanas ni Hiram Page ket inikkanna iti sinsinan a paltiing.
1 Adtoy, ibagak kenka, Oliver, a maitedto kenka a mangngegnakanto ti simbaan iti amin a banag nga isuromto kadakuada babaen ti Mangliwliwa, maipanggep kadagiti paltiing ken bilin nga intedko.
2 Ngem, adtoy, pudno, pudno, kunak kenka, awan ti asino man a matudinganto nga umawat kadagiti bilin ken paltiing iti daytoy a simbaan malaksid iti katulongak a ni Joseph Smith, Jun., ta inawatna ida a kas ken ni Moises.
3 Ket natulnogkanto koma kadagiti banag nga itedkonto kenkuana, a kas ken ni Aaron, a mangipakdaar a sipapammati kadagiti bilin ken paltiing, nga addaan iti bileg ken turay iti simbaan.
4 Ket no iturongnaka ti Mangliwliwa iti ania man nga oras nga agsao wenno mangisuro, wenno iti amin nga oras babaen ti bilin iti simbaan, aramidemto.
5 Ngem saankanto nga agsurat babaen ti bilin, ngem babaen ti sirib;
6 Ken saanmonto a bilinen ti adda iti ulom, ken ti adda iti ulo ti simbaan;
7 Ta intedko kenkuana dagiti tulbek ti kinadatdatlag, ken dagiti paltiing a naitalimeng, agingga nga itudingkonto kadakuada ti panangsukatda kenkuana.
8 Ket ita, adtoy, kunak kenka a mapanka kadagiti Lamanite ket ikasabam ti ebangheliok kadakuada; ket no awatenda la ketdi ti pannursurona ibilinmo ti pannakaipasdek ti simbaanko kadakuada; ket maaddaanka iti paltiing, ngem dimo isurat ida babaen ti bilin.
9 Ket ita, adtoy, kunak kenka a saan a naipalgak, ket awan ti tao a makaammo iti pakabangonan ti siudad ti Zion, ngem maitedto iti masakbayan. Adtoy, kunak kenka nga itinto nagbedngan dagiti Lamanite.
10 Dimonto panawan daytoy a lugar agingga a malpas ti taripnong; ket matudinganto ti katulongak a ni Joseph a mangiturong iti taripnong babaen ti timekda, ket no ania ti ibagana kenka ibagam.
11 Ket manen, alaem ti kabsatmo, ni Hiram Page, iti nagbaetanyo laeng, ket ibagam kenkuana a saan a nagtaud kaniak dagiti insuratna manipud iti dayta a bato ken kasta met nga inallilaw ni Satanas;
12 Ta, adtoy, saan a naituding kenkuana dagitoy a banag, wenno awan ti ania man a natudingan iti daytoy a simbaan a maisuppiat kadagiti katulagan ti simbaan.
13 Ta nasken a naurnos ti pannakaaramid dagiti amin a banag, ken babaen ti sapasap a pammalubos iti simbaan, babaen ti kararag ti pammati.
14 Ket tumulongkanto a mangrisut kadagitoy a banag, a maibatay kadagiti katulagan ti simbaan, sakbay ti panagdaliasatmo a mapan kadagiti Lamanite.
15 Ket maitedto kenka iti panawen a papanmo, agingga iti panawen a panagsublimto, no ania ti aramidem.
16 Ket nasken nga ungapemto ti ngiwatmo iti amin nga oras, iti panangipakdaarmo iti ebangheliok iti timek a mangidirdir-i. Amen.