Jekjōn 30
Revelesōn letok kōn Josep Smith Rikanaan eo n̄an Devid Whitmer, Piter Whitmer Jr., im Jon Whitmer, ilo Fayette, New York, Jeptōm̧ba 1830, ālikin juon kwelo̧k eo kar jilu raan aetokan ilo Fayette, ak m̧okta jān an elder ro an Kabun̄ in kar jeplōkļo̧k. Ilo lukkuun jinoin naan kein likūt ilo juon bok āinwōt jilu revelesōn ko; e kar kobatok ilo juon wōt jekjōn jān Rikanaan eo ilo 1835 edition in Katak im Bujen Ko.
1–4, Devid Whitmer kar kauweiki kōn an jab jerbal ilo niknik; 5–8, Piter Whitmer Jr. ej itōn etal ippān Oliver Cowdery n̄an juon mijen n̄an riLeman ro; 9–11, Jon Whitmer kar kūri n̄an kwaļo̧k naan kōn gospel eo.
1 Lo, Ij ba n̄an eok, Devid, bwe kwaar mijak armej im jab atartar Ioō kōn kajoor āinwōt am kar aikuj in kōm̧m̧ane.
2 Ak am ļōmņak ekar pād ioon men ko an laļ in eļapļo̧k jān men ko Aō, am Rikōm̧anm̧an, im jerbal in eo kar kūr eok n̄an e; im kwaar jab eo̧ron̄ e Jetōb eo Aō, im n̄an ro em̧ōj likūt ioom, ak kar reel jān ro im Iaar jab jitōn̄ er.
3 Kōn menin, kwōj make iaam n̄an kajjitōk kōn kwe make jān Peiū, im kejakļo̧kjeņ ioon men ko me em̧ōj am kar bōki.
4 Im ijo jikūm̧ enaaj ilo m̧weo im̧ōn jemam̧, m̧ae Aō lewōj n̄an eok elōn̄ļo̧k kien. Im kwo naaj wūjlepļo̧k eok n̄an jerbal in ilo kabun̄ in, im im̧aan laļ in, im ilo jikin ko ipeļaakin ijin. Amen.
5 Lo, Ij ba n̄an eok, Piter, bwe kwo naaj bōk ito-itak eo am ippān jeiūm̧ im jatūm Oliver; bwe iien eo emoottok bwe emennin aikuj ilo N̄a bwe kwōn kōpeļļo̧ke lo̧n̄iiūm n̄an kwaļo̧k gospel eo Aō; kōn menin, jab mijak, ak ron̄jaki naan ko im kapilōk an ļeo jeiūm̧ im jatūm, ko enaaj liwōj n̄an eok.
6 Im kwōn en̄taan ilo aolep en̄taan ko an, im jab jem̧ļo̧k am kotak wōt būruōm̧ n̄an Eō ilo jar im tōmak, n̄an an im am lo̧mo̧o̧r; bwe Iaar leļo̧k n̄an e kajoor n̄an kalōk ļo̧k kabun̄ eo Aō ilubwiljin riLeman raņ;
7 Im ejjeļo̧k Iaar jitōn̄ e bwe en an rikōkapilōklōk ioon e ilo kabun̄ in, kōn jerbal ko an kabun̄, ijello̧kun wōt n̄e ej ļeo jein im jatin, Josep Smith, Jun.
8 Kōn menin, kwōn ron̄jaki men kein im kwōn tiljek ilo kōjparok kien ko Aō, im kwo naaj jeraam̧m̧an n̄an mour indeeo. Amen.
9 Lo, Ij ba n̄an eok, rikarejera Jon, bwe kwo naaj jino jān iien in m̧aanļo̧k n̄an kabun̄bun̄ļo̧k gospel eo Aō, āinwōt kōn ainikien juon jilel.
10 Im am jerbal enaaj pād ilo jikin eo an jeiūm̧ im jatūm Pilip Burroughs, im ilo jikin ko ipeļaakin ijo, aaet, ijoko jabdewōt maron̄ ron̄jake eok, m̧ae Aō jiron̄ eok n̄an etal jān ijin.
11 Im aolepān jerbal eo am enaaj ilo Zaion, kōn aolepān am, jān iien in m̧aanļo̧k; aaet, kwo naaj kōpeļļo̧ke wōt lo̧n̄iūm ilo jibadbad eo Aō, jab mijak ta armej emaron̄ kōm̧m̧ane, bwe Ij pād ippam̧. Amen.