Benneg 31
Paltiing a naited ken ni Thomas B. Marsh babaen ni Joseph Smith a Propeta, idi Septiembre 1830 (History of the Church, 1:115–117). Simmaruno a dagus daytoy a pasamak iti maysa a taripnong ti Simbaan (kitaen ti paulo ti benneg 30). Immun-una a nabuniagan ni Thomas B. Marsh iti daytoy a bulan ken naordenan nga elder iti Simbaan sakbay a naited daytoy a paltiing.
1–6, Natudingan ni Thomas B. Marsh a mangikasaba iti ebanghelio ken naipanamnama kenkuana ti pagimbagan ti kaamaanna; 7–13, Nabagbagaan nga aganus, kanayon nga agkararag, ken sumurot iti Mangliwliwa.
1 Thomas, anakko, mabendisionanka gapu iti pammatim iti aramidko.
2 Adtoy, naaddaanka iti adu a rigat gapu iti kaamaam; nupay kasta, bendisionankanto ken ti kaamaam, wen, dagiti annakmo a babassit; ket dumtengto ti aldaw a mamati ken maammuanda ti pudno ket makikaysadanto kenka iti simbaanko.
3 Itag-aymo ti pusom ket agrag-oka, ta dimtengen ti oras ti misionmo; ket lumukayton ti dilam, ket ipakdaarmonto ti naimbag a damag ti naindaklan a rag-o iti daytoy a kaputotan.
4 Ipakdaarmonto dagiti banag a naipalgak iti katulongak, a ni Joseph Smith, Jun. Rugiamon ti mangasaba manipud iti daytoy a kanito, wen, ti agani iti kataltalonan a purawen tapno mapuoran.
5 Ngarud, ipakanmo ti kumpaymo iti amin a kararuam, ket mapakawanka kadagiti basolmo, ket agbaklaykanto iti binettek, ta maikari ti agtartrabaho iti tangdanna. Gapuna, agbiagto ti kaamaam.
6 Adtoy, pudno kunak kenka, umadayoka kadakuada iti apagbiit laeng a panawen, ket ipakdaarmo ti balikasko, ket isaganakto ti lugar a para kadakuada.
7 Wen, luktakto ti puspuso dagiti tao, ket awatendakanto. Ket ipasdekkonto ti simbaan babaen ti imam;
8 Ket patibkeremto ida ken isaganam ida iti kanito a panaguummongdanto.
9 An-anusam dagiti rigat, dimo idanem dagiti agidanem. Iturongmo ti balaymo babaen ti kinaemma, ken agtalinaedka a natibker.
10 Adtoy, kunak kenka nga agbalinkanto a mangngagas iti simbaan, ngem saan nga iti lubong, ta didakanto awaten.
11 Mapanka iti sadino man a pagayatak, ket itedto kenka ti Mangliwliwa ti aramidem ken no sadino ti papanam.
12 Agkararagka a kanayon, amangan ta maikursongka iti sulisog ket mapukawmo ti gunggonam.
13 Agbalinka a napudno agingga iti panungpalan, ket iti kasta, addaak kenka. Saan a naggapu iti tao wenno kadagiti tao dagitoy a balikas, ngem kaniak, uray pay ni Jesucristo, ti Mannubbotmo, babaen ti pagayatan ti Ama. Amen.