Tasal 34
K’utb’esinb’il na’leb’ k’eeb’il rik’in xtz’uumal re laj Jose Smith li Profeet re laj Orson Pratt, sa’ Fayette, Nueva York, 4 Noviembre 1830. Li Qawa’ Pratt b’elelaju chihab’ xyu’am sa’ li kutan a’an. Kijale’ chaq xch’ool ut kikub’e chaq xha’ naq kirab’i xb’een wa li evangelio li k’ojob’anb’il wi’chik, chi jultikanb’il xb’aan laj Parley P. Pratt, li ras, ak waqib’ xamaan chik. Kik’ule’ li k’utb’esinb’il na’leb’ a’in sa’ rochoch laj Peter Whitmer, yuwa’b’ej.
1–4, Eb’ li tiikeb’ chi paab’ank neke’ok choq’ ralal li Dios xb’aan li xtojb’al rix li maak; 5–9, Li xjultikankil li evangelio naxkawresi li b’e choq’ re li xkab’ xk’ulunik li Qaawa’; 10–12, Nachal li profeetil aatin xb’aan lix wankil li Santil Musiq’ej.
1 At walal Orson, k’e aaxik ut ab’i ut k’e reetal li k’a’ru tinye laa’in, li Qaawa’ Dios, aawe, li Jesukristo ajwi’ ut laj Tojol aawix;
2 Lix saqen ut lix yu’am li ruchich’och’, jun saqen li nalemtz’un sa’ q’ojyin ut li q’ojyin moko naxtaw ta ru;
3 Li k’a’jo’ kixra li ruchich’och’, jo’kan naq kixk’e tz’aqal lix yu’am, re naq jo’ k’ihaleb’ te’paab’anq, te’ruuq chi ok choq’ ralal li Dios. Jo’kan naq laa’at walalat;
4 Ut osob’tesinb’ilat xb’aan naq xatpaab’an;
5 Ut q’axal osob’tesinb’ilat wi’chik xb’aan naq b’oqb’ilat inb’aan chixjultikankil lin evangelio—
6 Chixtaqsinkil xyaab’ aakux jo’ rik’in xyaab’ li trompeet, najtaq xyaab’ ut kawaq, ut chixyaab’asinkil li jalb’a-k’a’uxlej chiru jun tasal tenamit yokotzinb’il ut po’jenaq xch’ool, re xkawresinkil lix b’e li Qaawa’ choq’ re li xkab’ xk’ulunik.
7 Xb’aan naq k’e reetal, chi yaal, chi yaal, ninye aawe, naq taanach’oq chaq li hoonal naq tink’ulunq sa’ jun choql rik’in wankilal ut nimla loq’alil.
8 Ut a’anaq xnimal ru kutan sa’ xhoonal ink’ulunik, xb’aan naq chixjunileb’ li jar tenamit te’siksotq.
9 A’b’anan rub’elaj naq taachalq li xnimal ru kutan a’an, li saq’e taaq’ojyino’q ru, ut li po taakik’o’q ru; ut eb’ li chahim ink’a’ te’raj xk’eeb’al xlemtz’unkileb’, ut wankeb’ li te’t’anje’q, ut ninqi sache’k neke’royb’eniheb’ laj maak.
10 Jo’kan ut, taqsi lix yaab’ aakux ut mikotz aametz’ew, xb’aan naq li Qaawa’ Dios x’aatinak; jo’kan ut, aatinan jo’ profeet, ut k’eeb’ilaq rik’in lix wankil li Santil Musiq’ej.
11 Ut wi tiikat chi paab’ank, k’e reetal, wankin aawik’in toj reetal naq tink’ulunq—
12 Ut chi yaal, chi yaal, ninye aawe, tink’ulunq chi seeb’. Laa’in laa Qaawa’ ut laj Tojol aawix. Chi jo’kan. Amen.