Vaega 35
Faaaliga na tuuina mai ia Iosefa Samita le Perofeta ma Sini Rikitone, i Feiete, pe latalata i Feiete, Niu Ioka, i le aso 7 o Tesema, 1830. O le taimi lea, sa toetoe ina alo ai le Perofeta i aso taitasi i le faiga o se faaliliuga o le Tusi Paia. Sa amata le faaliliuga i le vave ia Iuni 1830, ma sa auauna uma Oliva Kaotui ma Ioane Uitimera o ni tusiupu. Talu ai ona ua valaaulia nei i laua i ni isi tiute, sa valaaulia Sini Rikitone e ala i se tofiga paia e auauna atu o se tusiupu a le Perofeta i lenei galuega (tagai i le fuaiupu 20). I se faatomuaga i le talafaamaumau e uiga i lenei faaaliga, na faapea mai ai le talafaasolopito a Iosefa Samita: “O Tesema na sau ai Sini Rikitone [mai Ohaio] e ole atu i le Alii, ma sa o mai faatasi ma Eteuati Paterika. … I se taimi puupuu mulimuli ane talu ona taunuu mai o ia uso e toalua, na faapea ona fetalai mai ai o le Alii.”
1–2, O le ala e mafai ona avea ai tagata ma atalii o le Atua; 3–7, Ua valaauina Sini Rikitone e papatiso atu ma faaee atu le Agaga Paia; 8–12, O faailoga ma vavega e faia e ala i le faatuatua; 13–16, O le a soli e auauna a le Alii atunuu e ala i le mana o le Agaga; 17–19, Ua umia e Iosefa Samita ki o mealilo; 20–21, O le a gafatia e le au filifilia le aso o le afio mai o le Alii; 22–27, O le a lavea’iina Isaraelu.
1 Faalogo mai ia i le leo o le Alii lo outou Atua, o le Alefa ma le Omeka lava lea, o le amataga ma le gataaga, o lē o lona ala o se taamilosaga faavavau e tasi, ua tutusa i le asō e pei o ananafi, ma le faavavau.
2 O A’u o Iesu Keriso, le Atalii o le Atua, o lē na faasatauroina mo agasala a le lalolagi, o le toatele lava lea o e e talitonu i lo’u igoa, ina ia mafai ona avea i latou ma atalii o le Atua, ia tasi lava ia te a’u e pei ona Ou tasi ma le Tamā, e pei ona tasi le Tamā ma a’u, ina ia tasi i tatou.
3 Faauta, e moni, e moni, Ou te fai atu i la’u auauna o Sini, ua Ou vaai atu ia te oe ma au galuega. Ua Ou faalogo i au tatalo, ma saunia oe mo se galuega tele.
4 Ua faamanuiaina oe, ona o le a e faia mea sili. Faauta sa auina atu oe, e pei lava o Ioane, e saunia le ala i o’u luma, ma luma o Elia o lē o le a sau, ma sa e lē iloaina.
5 Sa e papatiso atu i le vai i le salamo, ae sa latou lē mauaina le Agaga Paia.
6 Ae Ou te tuu atu nei ia te oe se poloaiga, ia e papatiso atu i le vai, ma o le a latou maua le Agaga Paia e ala i le faaee atu o lima, e pei lava o aposetolo anamua.
7 Ma o le a oo mai o le a i ai se galuega tele i le laueleele, i totonu lava o Nuuese, ona o le a faaalia lo latou sese ma a latou mea inosia i mata o tagata uma.
8 Aua o A’u o le Atua, ma ua lē faapuupuuina lo’u lima; ma o le a Ou faaali atu vavega, faailoga, ma mea ofoofogia, ia te i latou uma o e talitonu i lo’u igoa.
9 Ma ai se tasi e ole mai i lo’u igoa i le faatuatua, o le a latou tutuli ese tiapolo; o le a latou faamalolo i e e mamai; o le a latou faia ia faapupulaina tauaso, ma e tutuli ia faalogo, ma e gugu ia tautatala, ma e pipili ia savavali.
10 Ma e vave ona oo mai o le taimi e faailoa atu ai mea sili i le fanauga a tagata;
11 Ae a aunoa ma le faatuatua e leai se mea o le a faaali atu vagana ai faatafunaga i luga o Papelonia, o ia lava lea na ia faia ia feinu atunuu uma i le uaina o le toasa o lona faitaaga.
12 Ma ua leai ni isi ua faia le lelei vagana i latou o e ua saunia e talia le atoatoaga o la’u talalelei, lea ua Ou auina atu i lenei tupulaga.
13 O le mea lea, Ou te valaau atu ai i mea vaivai o le lalolagi, i latou ia o e ua lē aoaoina ma inosia, e soli atunuu i le mana o lo’u Agaga;
14 Ma o lo latou lima o le a fai mo O’u lima, ma o le a avea a’u ma o latou talita ma o latou talipupuni; ma o le a Ou fusia i o latou sulugatiti, ma o le a latou tau faatamatane mo a’u; ma o le a i lalo o o latou vae o latou fili; ma o le a Ou faapa’ū atu le pelu mo i latou; ma o le a Ou faasaoina i latou i le afi o lo’u ita.
15 Ma o e matitiva ma e agamalu o le a talai atu le talalelei ia te i latou, ma o le a latou tulimatai i luma mo le taimi o lo’u alu atu, ona ua lata lava ona oo mai—
16 Ma o le a latou malamalama i le faataoto e uiga i le laau o le mati, ona ua lata mai nei lava le taumafanafana.
17 Ma ua ou auina atu le atoatoaga o la’u talalelei e ala i le lima o la’u auauna o Iosefa; ma ua ou faamanuiaina o ia i ona vaivai;
18 Ma ua Ou tuu atu ia te ia ki o mealilo o mea na ua faamaufaailogaina, o mea lava na sa mai i le faavaega o le lalolagi, ma mea o le a oo mai mai le taimi lenei seia oo i le taimi o lo’u alu atu, pe afai e tumau o ia ia te a’u, ae afai e leai, o le a Ou faatulai mai se tasi i lona tulaga.
19 O le mea lea, leoleo i luga o ia ina ia lē vaivai lona faatuatua, ma o le a tuuina atu e ala atu i le Fesoasoani, o le Agaga Paia lea, o lē ua silafia mea uma.
20 Ma Ou te tuu atu ia te oe se poloaiga—ia e tusi mo ia; ma o le a tuuina atu tusitusiga paia, e pei lava ona i ai i lo’u lava loto, mo le faaolataga o la’u lava ’au filifilia;
21 Ona o le a latou faalogo i lo’u leo, ma o le a vaai mai ia te a’u, ma o le a lē momoe, ma o le a latou gafatia le aso o lo’u alu atu; ona o le a faamamaina i latou, e pei lava ona Ou mama.
22 Ma o lenei Ou te fai atu ia te oe, nofo faatasi ma ia, ma o le a malaga o ia faatasi ma oe; aua e te tuulafoai ia te ia, ma e moni o le a faataunuuina lava nei mea.
23 Ma e tusa ai ma lou lē tusi ai, faauta, o le a tuu atu ai ia te ia e te vavalo atu; ma ia e talai atu la’u talalelei ma valaau atu i perofeta paia e faamaonia mai ana upu, e pei ona o le a tuuina atu ia upu ia te ia.
24 Tausi i poloaiga ma feagaiga uma ua fusia ai oulua; ma o le a Ou faia ia luluina le lagi mo lo oulua lelei, ma o le a gatete Satani ma o le a olioli Siona i luga o mauga ma faauluuluolaina.
25 Ma o le a faaolaina Isaraelu i la’u lava taimi e tatau ai; ma o le a taitaia i latou i ki ua Ou tuuina atu, ma lē toe fenumiai lava.
26 Ia siitia a’e o oulua loto ma fiafia, ua lata mai lo oulua togiolaina.
27 Aua le matatau, le lafu mamoe itiiti e, ua a outou le malo seia Ou alu atu. Faauta, e vave ona Ou alu atu. Ua faapea lava. Amene.