1 Ua faapea ona fetalai mai o le Alii lo outou Atua, o Iesu Keriso lava, o le O A’u Silisili, o le Alefa ma le Omeka, o le amataga ma le gataaga, o ia lava lea na silasila atu i luga o le vavaloloa lautele o le faavavau, ma ’au serafi uma o le lagi, ae lei faia le lalolagi;

2 O lea lava e tasi ua silafia mea uma, aua ua i luma o o’u mata mea uma;

3 O A’u lava lea e tasi o lē na tautala atu, ma faia ai le lalolagi, ma o mea uma na oo mai e ala mai ia te a’u.

4 O A’u lava lea e tasi o lē na avea le Siona a Enoka i lo’u lava loto; ma e moni, Ou te fai atu, o le toatele lava lea o e na talitonu i lo’u igoa, ona o A’u o Keriso, ma o lo’u lava igoa, e ala i le mana o le toto na Ou faamasaaina, na Ou aioi atu ai i luma o le Tamā mo i latou.

5 Ae faauta, o le toega o e ua amioleaga ua Ou taofia i filifili o le pouliuli seia oo i le faamasinoga o le aso tele, lea o le a oo mai i le iuga o le lalolagi;

6 Ma o le a faapea lava ona Ou faia ia taofia e ua amioleaga, o e e lē fia faalogo i lo’u leo ae faamaaa o latou loto, oi talofa, oi talofa, oi talofa, o lo latou malaia lea.

7 Ae faauta, e moni, e moni, Ou te fai atu ia te outou o ou mata ua i o outou luga. Ua Ou i ai i totonu ia te outou ae ua lē mafai ona outou vaai mai ia te a’u;

8 Ae ua lata ona oo mai o le aso o le a outou vaai mai ai ia te a’u, ma outou iloa ai ua i ai A’u; ona ua lata ona saeluaina o le veli o le pouliuli, ma o ia o lē e lei faamamaina o le a lē gafatiaina le aso.

9 O le mea lea, fusi i o outou sulugatiti ma saunia. Faauta, ua a outou le malo, ma o le a lē manumalo le fili.

10 E moni Ou te fai atu ia te outou, ua outou mama, ae lē o outou uma; ma ua leai ni isi tagata o e ua Ou fiafia tele i ai;

11 Ona ua leaga tagata uma i o’u luma; ma ua sosolo le mana o le pouliuli i luga o le lalolagi, i totonu o le fanauga a tagata, i luma o ’au uma o le lagi—

12 O lea ua mafua ai le nofotupu o le taaligoligoa, ma ua tiga ai le faavavau atoa, ma o loo faatali e agelu le poloaiga tele ia selesele i le lalolagi, e faaputu titania ina ia susunuina; ma, faauta, ua ’au faatasi le fili.

13 Ma o lenei Ou te faailoa atu ia te outou se mealilo, o se mea lea o loo faia i totonu o potu faalilolilo, e aumai ai lo outou faafanoga i le āluga o le taimi, ma sa outou lē iloaina;

14 Ae ua Ou ta’u atu nei ia te outou, ma ua faamanuiaina ai outou, ua lē ona o lo outou amioletonu, po o o outou loto lē talitonu; aua e moni e i ai ni isi o outou ua sala i o’u luma, peitai o le a Ou alofagia lo outou vaivai.

15 O lea, ia outou faamalolosi mai le taimi nei ma le agai i luma; aua le matatau, aua ua a outou le malo.

16 Ma Ou te tuu atu ia te outou se poloaiga mo lo outou olataga, aua ua Ou faalogoina a outou talosaga, ma ua tagi mai e ua matitiva i o’u luma, ma o e ua mauoa na Ou faia, ma o tagata uma lava e a a’u ia, ma e lē o A’u o se faailoga tagata.

17 Ma ua Ou faia le eleele ia oa, ma faauta o lo’u tuuvae lea, o le mea lea, o le a Ou toe tu ai i ona luga.

18 Ma Ou te tuu atu ma avatu ia te outou oa e sili atu, se laueleele lava lea o le folafolaga, o se laueleele ua tafe ai le susu ma le meli, lea o le a lē i ai i luga se mala pe a afio mai le Alii;

19 Ma o le a Ou tuu atu ia te outou e fai ma laueleele o lo outou tofi, pe afai tou te saili i ai ma o outou loto atoa.

20 Ma o la’u feagaiga lenei ma outou, o le a outou mauaina lenei e fai ma laueleele o lo outou tofi, ma mo le tofi o a outou fanau e faavavau, a’o i ai pea le lalolagi, ma o le a outou toe mauaina i le faavavau, e lē toe mavae atu lava.

21 Ae, e moni Ou te fai atu ia te outou, e oo mai le taimi o le a leai ai so outou tupu po o se pule, ona o le a avea A’u ma o outou tupu ma leoleo i luga o outou.

22 O le mea lea, faalogo mai i lo’u leo ma mulimuli mai ia te a’u, ma o le a avea outou ma tagata saoloto, ma o le a leai ni a outou tulafono nao a’u tulafono pe a Ou alu atu, ona o A’u o lo outou faitulafono, ma o se a se mea e mafai ona taofia lo’u lima?

23 Peitai, e moni Ou te fai atu ia te outou, aoao le tasi i le isi e tusa ma le tofi lea na Ou tofia ai outou;

24 Ma ia taitasi le tagata ma manatu taua i lona uso e pei o ia lava ia te ia, ma fai le amiomama ma mea paia i o’u luma.

25 Ma Ou te toe fai atu ia te outou, ia taitasi le tagata ma manatu taua i lona uso e pei o ia lava ia te ia.

26 Aua o ai se tagata e i totonu o outou ua i ai ni atalii e toasefululua, ma ua lē faailoga tagata ia te i latou, ma ua latou auauna ia te ia ma le usiusitai, ae fai atu o ia i le tasi: Ia e ofu i ofu talaloa ma e nofo i i; ae fai atu i le isi: Ia e ofu i ofu masaesae ma e nofo i ’o—ma vaai atu i ona atalii ma fai mai ua ou amiotonu?

27 Faauta, ua Ou tuu atu ia te outou lenei mea o se faataoto, ma ua faapea lava e pei o A’u. Ou te fai atu ia te outou, ia tasi outou; ma afai tou te lē tasi e lē a a’u outou.

28 Ma Ou te toe fai atu ia te outou, ua saili e le fili o loo i potu faalilolilo o outou ola.

29 Tou te faalogo i taua i atunuu mamao, ma outou fai ane ua lata ona i ai o taua tetele i atunuu mamao, ae ua outou lē iloa loto o tagata o loo i lo outou lava laueleele.

30 Ua Ou ta’u atu ia te outou nei mea ona o a outou talosaga; o le mea lea, ia teu le poto i o outou loto, ne’i faaali atu e le amioleaga o tagata nei mea ia te outou e ala i lo latou amioleaga, i se ala o le a tautala atu ai i o outou taliga i se leo e leotele atu nai lo o lena o le a luluina ai le lalolagi; ae afai ua outou saunia o le a outou lē matata’u lava.

31 Ma ina ia mafai ona outou sao mai le mana o le fili, ma faapotopoto mai ia te a’u o se nuu amiotonu, ua aunoa ma se ila ma se pōnā—

32 O le mea lea, o le pogai lenei na Ou tuu atu ai ia te outou se poloaiga ia outou o atu i Ohaio; ma o iina o le a Ou tuu atu ai ia te outou la’u tulafono; ma o iina o le a faaeeina ai outou i le mana mai luga;

33 Ma mai iina, soo se tasi Ou te loto i ai, o le a o atu i totonu o atunuu uma, ma o le a ta’u atu ia te i latou mea latou te faia; ona ua ia te A’u se galuega tele ua teuina, ona o le a laveaia Isaraelu, ma o le a Ou taitaia i latou i soo se mea Ou te loto i ai, ma e leai se mana e taofia lo’u lima.

34 Ma o lenei, Ou te tuu atu i le ekalesia ua i ai i vaega nei se poloaiga, e faapea i ni alii faapitoa o i totonu o i latou o le a tofia, ma o le a tofia i latou i le leo o le ekalesia;

35 Ma o le a latou vaaia e ua matitiva ma e ua lē tagolima, ma auauna atu mo lo latou tausiga ina ia latou lē mafatia; ma auina atu i latou i le nofoaga ua Ou poloaiina ai i latou;

36 Ma o le latou galuega lenei, e pulea mataupu o meatotino a lenei ekalesia.

37 Ma o i latou ua i ai faatoaga ua lē mafai ona faatau atu, ia tuu pea i latou pe faaaoga-totogi e tusa ma le mea e lelei ia te i latou.

38 Vaai ia faasaosaoina mea uma; ma a uma ona faaeeina o tagata i le mana mai luga ma auina atu, o le a faaputuputuina nei mea uma i totonu o le ekalesia.

39 Ma afai tou te saili oa ua i ai i le finagalo o le Tamā e tuu atu ia te outou, o le a sili atu ona outou mauoa i tagata uma, aua o le a outou maua oa o le faavavau; ma ua tatau ai ona a a’u oa o le lalolagi e tuu atu; ae ia faaeteete i le faamaualuga, ne’i avea outou e pei o sa Nifaē anamua.

40 Ma Ou te toe fai atu ia te outou, Ou te tuu atu ia te outou se poloaiga, ia o atu tagata taitoatasi, e aofia ai le toeaina, le ositaulaga, le aoao, ma tagata o le ekalesia, ma lona malosi, ma le galue o ona lima, e sauni ma faataunuu mea ua Ou poloaiina ai.

41 Ma ia tuu atu a outou talaiga e avea ma leo o le lapataiga, o tagata taitoatasi i lona tuaoi, i le mālū ma i le agamalu.

42 Ma ia outou o ese atu mai totonu o e ua amioleaga. Ia outou laveai outou lava. Ia mama outou o e e tauaaoina ipu a le Alii. E faapea lava. Amene.