Vaega 3
Faaaliga na tuuina mai ia Iosefa Samita le Perofeta, i Haramoni, Penisilevania, Iulai 1828, e uiga i itulau tusilima 116 na leiloloa na faaliliu mai le vaega muamua o le Tusi a Mamona, lea sa ta’ua o le tusi a Liae. Sa tuu toa’i atu e le Perofeta ia itulau mai lana tausiga i le tausiga a Matini Harisi, o lē sa auauna mo se vaitaimi itiiti o se tusiupu i le faaliliuga o le Tusi a Mamona. Sa tuuina mai lenei faaaliga e ala mai i le Urima ma le Tumema. (Tagai i le vaega 10.)
1–4, O le ala o le Alii o se taamilosaga faavavau e tasi; 5–15, E ao ia Iosefa Samita ona salamo po ua aveesea le meaalofa e faaliliu ai; 16–20, Ua oo mai le Tusi a Mamona e laveai fanau a Liae.
1 O galuega, ma fuafuaga, ma faamoemoega o le Atua e lē mafai ona taofia, pe mafai foi ona avea i latou ma meanoa.
2 Aua e lē savali le Atua i ala faapiopio, pe liliu foi o ia i le itu taumatau po o le itu tauagavale, pe ese foi o ia mai le mea na ia fetalai mai ai, o lea o ona ala e sao, ma o lona alafua o se taamilosaga faavavau e tasi.
3 Ia manatua, ia manatua, e lē o le galuega a le Atua e taofia, ae o le galuega a tagata;
4 Aua e ui atonu e maua e se tagata faaaliga e tele, ma ia te ia le mana e fai ai galuega maoae, ae afai e mitamitavale o ia i lona lava malosi, ma ia tuu faameanoa fautuaga a le Atua, ma mulmuli i taitaiga a lona lava loto ma manaoga faaletino, o le a pa’ū o ia ma ia aumai i ona luga le tauimasui a le Atua faamasinotonu.
5 Faauta, sa faatuatua atu ia te oe le tausiga o ia mea, ma sa patino lava ou poloaiga; ma ia manatua foi folafolaga na fai atu ia te oe, pe afai e te lē solia i latou.
6 Faauta foi, ua faafia ona e soli o poloaiga ma tulafono a le Atua, ma e alu pea i faatauanauga a tagata.
7 Aua, faauta, sa lē tatau ona sili atu lou fefe i tagata nai lo i le Atua. E ui ina tuu faameanoa e tagata fautuaga a le Atua, ma latou inoino i ana afioga—
8 Peitai sa tatau lava ona e faamaoni; ma semanu e faaloaloa atu e ia lona aao ma lagolago ia te oe e faasaga i u fanafana mu uma a le fili; ma semanu e faatasi atu o ia ma oe i taimi uma o puapuaga.
9 Faauta, o oe o Iosefa, ma sa filifilia oe e faia le galuega a le Alii, ae ona o le solitulafono, afai e te lē faaeteete, o le a e pa’ū.
10 Ae ia manatua, ua alofa mutimutivale le Atua; o lea, salamo i lena mea na e faia ua lē tusa ai ma le poloaiga na Ou tuu atu ia te oe, ma ua filifilia pea oe, ma ua toe valaaulia oe i le galuega;
11 Vagana ai ua e faia lenei mea, o le a tuu atu oe ma avea ai e pei o isi tagata, ma lē toe maua se meaalofa.
12 Ma ina ua e tuu atu lena mea na tuu atu e le Atua ia te oe le vaaiga ma le mana e faaliliu ai, sa e tuu atu lena mea ua paia i lima o se tagata amioleaga,
13 O lē na ia tuu faameanoa fautuaga a le Atua, ma ua ia solia folafolaga sili ona paia sa faia i luma o le Atua, ma faalagolago i lona lava manatu ma mitamitavale i lona lava poto.
14 Ma o le pogai lenei ua aveesea ai mai ia te oe ou faamanuiaga mo se vaitau—
15 Ona sa e tuu le fautuaga a lou faatonu ia solia i lalo mai le amataga.
16 Ae ui i lea, o le a alu pea i luma la’u galuega, ona e tusa ai ma le alu atu i le lalolagi o le malamalama e uiga i se Faaola, e ala atu i le molimau a tagata Iutaia, o le a faapea lava ona alu atu o le malamalama e uiga i se Faaola i lo’u nuu—
17 Ma ia sa Nifaē, ma sa Iakopō, ma sa Iosefā, ma sa Soramā, e ala atu i le molimau a o latou tamā—
18 Ma o lenei molimau o le a oo atu i le malamalama o sa Lamanā, ma sa Lemuelū, ma sa Isamaelī, o e na faaitiitia i le lē talitonu ona o le amioletonu o o latou tamā, o e na tuu e le Alii e faaumatiaina o latou uso o sa Nifaē, ona o a latou amioletonu ma a latou mea inosia.
19 Ma o le faamoemoega tonu lava lenei na faasaoina ai nei papatusi, ia ua i ai nei talafaamaumau—ina ia mafai ona faataunuuina o folafolaga a le Alii, na faia e ia i lona nuu;
20 Ma ina ia mafai ona o mai ai o sa Lamanā i le malamalama o o latou tamā, ma ina ia latou iloa ai folafolaga a le Alii, ma ina ia mafai ai ona latou talitonu i le talalelei ma faalagolago i galuega a Iesu Keriso, ma faamamaluina e ala i le faatuatua i lona suafa, ma ina ia faaolaina i latou e ala i lo latou salamo. Amene.