1 Faalogo mai ia, outou toeaina o la’u ekalesia, ma uai mai o outou taliga i upu o le a Ou tautala atu ai ia te outou.

2 Aua faauta, e moni, e moni, Ou te fai atu ia te outou, ua outou maua se poloaiga mo se tulafono i la’u ekalesia, e ala atu ia te ia o lē na Ou tofi atu ia te outou na te mauaina poloaiga ma faaaliga mai lo’u lima.

3 Ma o le mea lenei ia outou iloa ma le mautinoa—e leai se isi e ese mai ua tofia atu ia te outou na te mauaina poloaiga ma faaaliga seia oo ina aveesea o ia, pe afai e tu mau o ia ia te a’u.

4 Ae e moni, e moni, Ou te fai atu ia te outou, e leai se isi e tofia i lenei meaalofa vagana ai ua ala mai ia te ia; aua afai e aveesea mai ia te ia, o le a leai se mana e ia te ia nao le tofia o se isi tagata i lona tulaga.

5 Ma ia avea lenei mea o se tulafono ia te outou, ia outou lē taliaina aoaoga a soo se tasi e sau i o outou luma, o ni faaaliga po o ni poloaiga;

6 Ma ua Ou tuu atu ia te outou lenei mea ina ia lē faaseseina outou, ina ia outou iloa ua lē mai ia te a’u i latou.

7 Aua e moni Ou te fai atu ia te outou, o ia o lē ua Ou faauuina, e sau i totonu e ala mai i le faitotoa ma faauuina e pei ona Ou ta’u atu muamua ia te outou, e aoao atu faaaliga na ua outou mauaina ma o le a outou mauaina e ala atu ia te ia o lē ua Ou tofia.

8 Ma o lenei, faauta, Ou te tuu atu ia te outou se poloaiga, a outou faapotopoto faatasi, ia outou aoao ma faagaeetia le tasi i le isi, ina ia outou iloa le ala tou te faia ma taitai ai la’u ekalesia, le ala tou te faia ai e faatatau i mataupu o la’u tulafono ma poloaiga, ia ua uma ona Ou tuuina atu.

9 Ma o le a faapea ona aoaoina ai outou i le tulafono o la’u ekalesia, ma faapaiaina ai i mea na ua outou mauaina, ma ia outou fusia faatasi ai outou lava ia outou faia ma le paia atoatoa i o’u luma—

10 Ina ia tusa ai ma lo outou faia o lenei mea, o le a faaopoopo ai le mamalu i le malo ua outou maua. E tusa ai ma lo outou lē faia o lea mea, o le a ’aveesea ai, e oo lava i mea ua outou maua.

11 Ia outou faamama ese le amioletonu ua i ai i totonu o outou; ia outou faapaia outou lava i o’u luma;

12 Ma afai tou te mananao i mamalu o le malo, ia outou tofia la’u auauna o Iosefa Samita, Le Itiiti, ma lagolago o ia i o’u luma e ala i le tatalo o le faatuatua.

13 O lenei foi, Ou te fai atu ia te outou, afai tou te mananao i mealilo o le malo, tuu atu ia te ia meaai ma ofu, ma soo se mea e manaomia e ia e faataunuu ai le galuega ua Ou poloaiina ai o ia;

14 Ma afai tou te lē faia o le a tumau pea o ia ia te i latou o e ua latou taliaina o ia, ina ia mafai ona Ou faasaoina mo a’u lava se nuu mama i o’u luma.

15 Ou te toe fai atu, faalogo mai ia outou toeaina o la’u ekalesia, o e ua Ou tofia: Ua lē auina atu outou ia aoaoina, ae ia aoao atu i le fanauga a tagata mea ua Ou tuu atu i o outou lima e ala i le mana o lo’u Agaga;

16 Ma o le a aoaoina outou mai luga. Ia outou faapaia outou lava ma o le a faaeeina outou i le mana, ina ia mafai ona outou tuuina atu e pei lava ona Ou tautala atu ai.

17 Ia outou faalogo mai, aua, faauta, ua lata mai ona oo mai le aso tele o le Alii.

18 Aua e oo mai le aso o le a tulei mai ai e le Alii lona siufofoga mai le lagi; o le a luluina le lagi ma o le a gatete le lalolagi, ma o le a umi ma leotele le iliga o le pu a le Atua, ma o le a fai atu i atunuu momoe: Outou le au paia e ia tutulai mai ia ma ola; outou e ua agasala ia nonofo ma momoe pea seia Ou toe valaau atu.

19 O le mea lea ia fusi i o outou sulugatiti ne’i maua outou i totonu o e ua amioleaga.

20 Siitia a’e i luga o outou leo ma lē taofia. Valaau atu i atunuu ia salamo, o e matutua ma e talavou, o e pologa ma e saoloto, ia fai atu: Ia outou saunia outou lava mo le aso tele o le Alii;

21 Aua afai e siitia a’e e a’u, o se tagata, lo’u leo i luga ma valaau atu ia te outou ia salamo, ae outou inoino mai ia te a’u, o le a se mea tou te fai mai pe a oo mai le aso o le a taalilili mai ai leo o faititili mai tuluiga o le lalolagi, e tautala mai i taliga o e uma e ola, fai mai—Ia salamo, ma sauni mo le aso tele o le Alii?

22 Ioe, o lenei foi, pe a feemo ane uila mai sasa’e i sisifo, ma lologo atu o latou leo i e uma e ola, ma faia ia ī taliga o e uma e faalogoina, ma fai atu upu nei—Ia outou salamo, ona ua oo mai le aso tele o le Alii?

23 O lenei foi, o le a tulei mai e le Alii lona siufofoga mai le lagi, fai mai: Faalogo mai ia, outou e atunuu o le lalolagi, ma faalogo mai i fetalaiga a le Atua lena o lē na faia outou.

24 E, outou e atunuu o le lalolagi, ua faafia ona po ua Ou faapotopotoina faatasi o outou e pei ona ofaofatai e se matuamoa lana toloai i lalo o ona apaau, ae outou lē mananao i ai!

25 Ua faafia ona Ou valaau atu ia te outou e ala i fofoga o a’u auauna, ma i auaunaga a agelu, ma i lo’u lava leo, ma i le leo o faititili, ma i le leo o uila, ma i le leo o afā, ma i le leo o mafuie, ma uato’a tetele, ma i le leo o oge ma ituaiga o faamai eseese, ma i le leo tele o se pu, ma i le leo o le faamasinoga, ma i le leo o le alofa mutimutivale i le aso atoa, ma i le leo o le viiga ma le mamalu ma oa o le ola e faavavau, ma po ua Ou faaolaina outou i le olataga e faavavau, ae outou lē mananao i ai!

26 Faauta, ua oo mai le aso, ua tumu ai le ipu o le sauā o lo’u ita.

27 Faauta, e moni Ou te fai atu ia te outou, o afioga nei a le Alii lo outou Atua.

28 O le mea lea, ia outou galulue, ia outou galulue i lo’u tovine mo le taimi mulimuli—ona o le taimi mulimuli e valaau atu ai i e o nonofo i le lalolagi.

29 Aua o le a Ou alu atu i lo’u lava taimi e tatau ai i luga o le lalolagi i le faamasinoga, ma o le a togiolaina lo’u nuu ma o le a nonofotupu faatasi ma a’u i luga o le lalolagi.

30 Aua o le a oo mai le Meleniuma tele, lea na Ou fai atu ai e ala i fofoga o a’u auauna.

31 Aua o le a noatia Satani, ma a toe tatalaina o ia, o le a nofotupu o ia mo nao se vaitau itiiti, ona oo mai ai lea o le iuga o le lalolagi.

32 Ma o ia o lē e ola i le amiotonu o le a liua e pei o le emo o se mata, ma o le a mavae atu le lalolagi e peiseai o se afi.

33 Ma o e e amioleaga o le a o ese atu i le afi e lē matineia, ma o lo latou iuga e leai se tasi i luga o le lalolagi ua iloaina, pe na te iloaina lava, seia latou o mai i o’u luma i le faamasinoga.

34 Ia outou faalogo mai i nei upu. Faauta, o A’u o Iesu Keriso, o le Faaola o le lalolagi. Ia teu i o outou loto nei mea, ma ia tuu le tulaga-mamalu o le faavavau ia mau i luga o o outou mafaufau.

35 Ia faamamalu. Tausi i au poloaiga uma. Ia faapea lava. Amene.