Mwakoro 43
Kaotioti ae kaotaki rinanon Iotebwa Timiti te Burabeti, i Kirtland, Ohio, ni Beberuare 1831. N te tai aei ao tabeman kaain te Ekaretia a rootaki irouia aomata ake a karaoi taeka ni kewe bwa ngaia taan kaotioti. Te Burabeti e bubutia te Uea ao e karekea te maroro aei are e kaineti nakoia unimwaanen te Ekaretia. Te moan mwakoro e tabe ma bwain ana tautaeka te Ekaretia; kanoan mwakorona are i mwina bon te kauring bwa unimwaane a na anga nakon aaba n te aonaba.
1–7, Kaotioti ao tua a roko ti rinanon teuare e rineaki; 8–14, Aomata aika Itiaki a katabuaki man aia mwakuri nako aika tabu i matan te Uea; 15–22, A kanakoaki unimwaane bwa a na takaruaea te rairannano ao ni katauraoia aomata ibukin ana bong te Uea ae kakannato; 23–28, Te Uea e weteia aomata n oin bwanaana ao rinanon korakoran te aonaba; 29–35, E na bon roko Tenga n Ririki ao kabaean Tatan.
1 O ongora, ngkami unimwaanen au ekaretia, ao anga taningami nakon taeka are N na taekin nakoimi.
2 Bwa noria, e koaua, e koaua, ae I tuangkami, bwa kam a tia ni karekea te tua bwa te tua nakon au ekaretia, rinanon teuare I a tia n rineia ibukimi bwa e na karekei tua ao kaotioti man baiu.
3 Ao aio kam na ataia ma te koaua raoi—bwa akea temanna riki ae e na rineaki ibukimi bwa e na karekei tua ao kaotioti ni karokoa e anaki, ngkana e kakaonimaki irou.
4 Ma e koaua, e koaua, ae I tuangkami, bwa akea riki temanna ae e na rineaki nakon te bwai n tituaraoi aei ma ti mai irouna; bwa ngkana e anaaki mai irouna e na akea irouna te mwaaka ma tii rinean temanna bwa onean mwina.
5 Ao aio te tua nakoimi, bwa kam na aki butimwaei ana reirei nako ane e roko i matami bwa taian kaotioti ke tua;
6 Ao aio I anganingkami bwa kam aonga n aki mwamwanaki, bwa kam aonga n ataia bwa tiaki mai irou.
7 Bwa e koaua ae I tuangkami, bwa ane e rineaki mai irou e na rin n te mataroa ao ni katabuaki n aron are I a tia n tuangkami mai i mwaaina, n reirei taian kaotioti ake kam a tia ni karekei ao ni karekei rinanon teuare I a tia n rineia.
8 Ao ngkai, nooria, I anganingkami te tua, bwa ngkana kam ikotaki kam na reirei ao ni karikirakeingkami i marenami, bwa kam aonga n ataa aromi ni mwakuri ao ni kaira au ekaretia, ao e na kangaa aromi ni mwakuri ni kaineti ma kanoan au tua, ake I a tia n anga.
9 Ao n te kawai aei kam na reireinaki n tuan au ekaretia, ao ni kaitiakaki man bwaai ake kam a tia ni karekei, ao kam na kabaeingkami nakon mwakuri nako aika tabu imatau—
10 Bwa ngkana kam karaoa aio, e na ikotaki te mimitong nakon te abanuea are kam a tia ni karekea. Ngkana kam aki karaoa aio, e na anaaki, te bwai naba are kam a tia ni karekea.
11 Kaitiakaa nako te buakaka are e mena i buakomi; kaitiakingkami imatau;
12 Ao ngkana kam tangira mimitongin te abanuea, rinea au tia mwakuri ae Iotebwa Timiti te Ataei, ao boutokaia imatau n te tataro n onimaki.
13 Ao I a manga tuangkami, bwa ngkana kam tangira bwain te abanuea aika raba, katauraoi kanana ao kunnikaina, ao bwaai nako ake e kainanoi ni kakoroa bukin te mwakuri are I a tia n tuangnga;
14 Ao ngkana kam aki karaoia e na tiku irouia naake a tia ni butimwaia, bwa I aonga ni kawakinia irou aomata aika itiaki imatau.
15 I a manga tuangkami, ongora ngkami unimwaanen au ekaretia, ake I a tia ni rineia: Kam aki kanakoaki bwa kam na reireinaki, ma kam na reireiniia natiia aomata bwaai ake I a tia ni kaaki i nanon baimi ni mwaakan Tamneiu;
16 Ao kam na reireinaki mai eta. Kaitiakingkami ao kam na anganaki te mwaaka, bwa kam aonga n anga n aron are I a tia n taekinna.
17 Ongora ngkami, bwa, nooria, e a kan roko ana bong ae kakannato te Uea.
18 Bwa e na roko te bong are e na taetae te Uea ni bwanaana mai karawa; e na ioioaki karawa ao e na ruru aonaba, ao e ananau man takarua tangin ana buu te Atua, ao n taekina ae kangai nakoia botanaomata aika matu: Ngkami aika itiaki teirake ao maiu; ngkami taan bure tiiku ao matu ni karokoa I a manga wewete.
19 Mangaia are kabaea nukami bwa mwiina ko na kuneaki i buakoia naake a buakaka.
20 Tabekarake bwanaam ao tai rawa n taetae. Katanoata nakoia botanaomata bwa a na raira nanoia, ake a kaara ao ake ataei, ake a kabaeaki ao ake a inaomata, ni kangai: Katauraoingkami ibukin ana bong ae kakannato te Uea;
21 Bwa ngkana ngai, ae te aomata, I tabekarake bwanaau ao ni katanoata nakoimi bwa kam na raira nanomi, ao kam ribaai, tera ae kam na taekinna ngkana e roko te bong are e na takaruaea bwanaana te aba mai tabotabon aonaba, n taetae nakon taningaia ni kabane ake a maiu, ni kangai—Raira nanomi, ao katauraoi ibukin ana bong ae kakannato te Uea?
22 Eng, ao teuana riki, ngkana e a manga iti te iti mai mainiku nako maeao, ao n takaruaea bwanaana nakoia ni kabane ake a maiu, ao n tong taningaia ni kabane ake a ongo, n taekin taeka aikai—Raira nanomi, bwa e a roko ana bong ae kakannato te Uea?
23 Ao e a manga taetae ni bwanaana te Uea mai karawa, ni kangai: Ongora, O ngkami botanaomata n te aonaba, ao ongo n ana taeka te Atua are e karikingkami.
24 O, ngkami botanaomata n te aonaba, ai iraua au tai ae I ikoikoitingkami ni kabane n aron te moaaine ae ikoikotiia natina i ani baina, ma kam rawa!
25 Ai iraua au tai ae I wetei ngkami ni wiia au taan mwakuri, ao man aia mwakuri ni ibuobuoki anera, ao n oin bwanaau, ao man rebwen te baa, ao man bwanaan te iti, ao man bwanaan te buaka, ao man bwanaan mwaingingin te aonaba, ao te karau ae te aiti aika korakora, ao man bwanaan te rongo ma aoraki n aekana nako, ao man tangin te bu ae korakora, ao man bwanaan te motikitaeka, ao man bwanaan te nanoanga n uaa te bong, ao man bwanaan te mimitong ao te karineaki ao kaubwain te maiu ae akea tokina, ao ni kamaiuingkami ma te kamaiuaki ae akea tokina, ma kam rawa!
26 Nooria, e a roko te bong, are e a onrake iai mwangkon uniu.
27 Nooria, e koaua ae I tuangkami, bwa aikai ana taeka te Uea ae Atuami.
28 Mangaia are, mwakuri ngkami, mwakuri ngkami n au nne ni kurebe ibukin te kabanea n tai—bwa e wewete te kabanea n tai nakoia kaain te aonaba.
29 Bwa n oin au tai N na roko nakon te aonaba ni motikitaeka, ao a na kabooaki au aomata ao n tautaeka ma ngai n te aonaba.
30 Bwa e na roko te Mereniam ae korakora, are I a tia n taekinna man wiia au tia mwakuri.
31 Bwa Tatan e na kabaeaki, ao ngkana e a manga kabwaraaki e na tii tautaeka n te tai ae uarereke, ao i mwina e na roko tokin te aonaba.
32 Ao ane e maiu n te raoiroi e na onikaki n te rube ni mata, ao e na mauna te aonaba kanga man te ai.
33 Ao naake a buakaka a na nako nakon te ai ae e a aki kona ni mate, ao tokiia akea te aomata ae e ataia n te aonaba, ke n ataia, ni karokoa a roko imatau n te motikitaeka.
34 Ongora ngkami nakon taeka aikai. Nooria, Ngai Iesu Kristo, te Tia Kamaiua te aonaba. Kawakin bwaai aikai inanom, ao katikui bwain karawa aika akea tokiia inanom.
35 Taua ma nanom. Kawakini au tua ni kabane. Eng. Amen.