Benneg 51
Paltiing a naited babaen ni Joseph Smith a Propeta, iti Thompson, Ohio, idi Mayo 1831 (History of the Church, 1:173–174). Nangrugi a dimteng iti Ohio iti daytoy a panawen dagiti Santo nga agdappat manipud kadagiti estado iti dumaya, ket nasken ti pannakaaramid ti nalawag a pannakaurnos ti pagtaenganda. Gapu ta agpaay daytoy nga aramid iti saad ti obispo, dimmawat ni Obispo Edward Partridge iti panangiwanwan iti daytoy a banag, ket nagdamag ti Propeta iti Apo.
1–8, Natudingan ni Edward Partridge a mangurnos iti panangaywan ken kadagiti pagsanikuaan; 9–12, Nasken a napudno dagiti Santo iti pannakilangenda ken awan ti maidaddaduma; 13–15, Nasken nga addaanda iti pagidulinan ti obispo ken urnosenda dagiti pagsanikuaan a maibatay iti paglintegan ti Apo; 16–20, Saan nga agnanayon a paguummongan a lugar ti Ohio.
1 Imdengandak, kinuna ti Apo a Diosyo, ket agsaoak iti katulongak a ni Edward Partridge, ket ikkak iti pagiwardas; ta nasken nga umawat iti pagiwardas no kasano nga urnosenna dagitoy a tao.
2 Ta nasken a maummongda a maibatay kadagiti paglintegak; no saan, maisinada.
3 Gapuna, bay-anyo ti katulongak a ni Edward Partridge, ken dagiti pinilina, a nakaay-aywak, a mangituding kadagitoy a tao kadagiti bingayda, patas ti tunggal tao a maibatay iti kaamaanna, a maibatay iti kasasaadda ken dagiti kayat ken kasapulanna.
4 Ket bay-anyo ni katulongak nga Edward Partridge, no itudingna iti tao ti bingayna, ikkanyo iti sinurat a mangipatalged kenkuana iti bingayna, tapno iggamanna, uray pay daytoy a kalintegan ken daytoy a tawid iti simbaan, agingga nga agbasol ket saan a maibilang a maikari babaen ti timek ti simbaan, a maibatay kadagiti paglintegan ken katulagan ti simbaan, a maibilang iti simbaan.
5 Ket no aglabsingto ket saan a maibilang a maikari a kameng ti simbaan, awan ti bilegna a mangtunton iti dayta a bingay nga inikkan-pategna iti obispo a para kadagiti nakurapay ken agkasapulan iti simbaanko; ngarud, dina mataginayon ti sagut, ngem matuntonna laeng dayta a bingay a naikari kenkuana.
6 Ket kasta ti pannakaipanamnama amin a banag, a maibatay kadagiti paglintegan ti daga.
7 Ket bay-anyo a maituding kadagitoy a tao dagiti kukua dagitoy a tao.
8 Ket ti kuarta a mabati kadagitoy a tao—mangtudingkayo iti pannakabagi kadagitoy a tao, a mangala iti kuarta a pagtaudan ti taraon ken aruaten, a maibatay iti kayat dagitoy a tao.
9 Ket bay-anyo a napudno ti tunggal tao iti pannakilangenna, ken saan a maidumduma kadagitoy a tao, ken umawat iti pumadpada, tapno agkaykaysakayo, a kas iti imbilinko kadakayo.
10 Ket diyo ipalubos a maala ken maited iti sabali a simbaan ti kukua dagitoy a tao.
11 Gapuna, no umawat ti sabali a simbaan iti kuarta daytoy a simbaan, pabayadanyo manen iti daytoy a simbaan a maibatay iti pagnumuanda;
12 Ket maaramid daytoy babaen ti obispo wenno ti pannakabagi, a matudingan babaen ti timek ti simbaan.
13 Ket manen, bay-anyo a mangtuding ti obispo iti pagidulinan iti daytoy a simbaan; ket bay-anyo nga amin a banag kuarta man wenno karne, nga ad-adu ngem iti kasapulan iti pagayatan dagitoy a tao, ti obispo ti mangidulin.
14 Ket bay-anyo met nga isu ti mangilatang babaen ti pagayatanna, ken para iti pagayatan ti kaamaanna, ta agtrabaho iti daytoy a pamastrekan.
15 Ket kasta nga ikkak dagitoy a tao iti gundaway a mangummong iti bagbagida a maibatay kadagiti paglintegak.
16 Ket ikkak-pateg kadakuada daytoy a daga iti bassit a panawen, agingga a siak, ti Apo, mangted kadakuada iti sabali, ket bilinek ida a mapan;
17 Ket awan ti oras ken aldaw a naikeddeng kadakuada, gapuna pagtignayenyo ida a kasla agnaedda iti adu a tawen, ket agbanagto daytoy a pagimbaganda.
18 Adtoy, pagariganto daytoy ken ni katulongak nga Edward Partridge, iti sabali a luglugar, iti amin a simbaan.
19 Ket asino man a makita a napudno, ken nalinteg, ken masirib a mangaywan makaparagsakto iti Apona, ket agtawidto iti agnanayon a biag.
20 Pudno, kunak kadakayo, siak ni Jesucristo, nga umay a di agtantan, iti kanito a diyo namnamaen. Pudno a kasta. Amen.