Benneg 53
Paltiing a naited ken ni Algernon Sidney Gilbert babaen ni Joseph Smith a Propeta, iti Kirtland, Ohio, idi Hunio 1831 (History of the Church, 1:179–180). Babaen ti dawat ni Sidney Gilbert, dinamag ti Propeta iti Apo ti maipanggep iti aramid ken naituding ken ni Kabsat a Gilbert iti Simbaan.
1–3, Maordenan nga elder ti pagakeman ken pakapilian ni Sidney Gilbert iti Simbaan; 4–7, Agserbi met a pannakabagi ti obispo.
1 Adtoy, kunak kenka, katulongak a Sidney Gilbert, a nangngegko dagiti kararagmo; ket inawagannak tapno maipakaammo kenka, ti Apo a Diosmo, maipanggep iti pagakeman ken nakapiliam iti simbaan, a siak, nga Apo, napasingkedan kadagitoy maudi nga aldaw.
2 Adtoy, siak, nga Apo, a nailansa iti krus para kadagiti basol ti lubong, bilinenka a mangtallikud iti lubong.
3 Awatem ti panangordenko, kangrunaanna dayta panagbalin nga elder, a mangikasaba iti pammati ken panagbabawi ken pannakaugas dagiti basol, a maibatay iti balikasko, ken ti panangawat iti Nasantuan nga Espiritu babaen ti panangipatay kadagiti dakulap;
4 Ken kasta met iti panagbalin a pannakabagi iti daytoy a simbaan iti lugar nga ituding ti obispo, a maibatay kadagiti bilin a maitedto kalpasan daytoy.
5 Ket manen, pudno kunak kenka, agdaliasatkanto a kaduam dagiti katulongak a da Joseph Smith, Jun., ken Sidney Rigdon.
6 Adtoy, dagitoy ti umuna nga ordinansa nga awatem; ket maitedto iti masungad a panawen dagiti dadduma, a maibatay iti panagtrabahom iti bangkagko.
7 Ket manen, kayatko nga adalem a maisalakan laeng ti agibtur agingga iti panungpalan. Pudno a kasta. Amen.