Benneg 57
Paltiing a naited babaen ni Joseph Smith a Propeta, iti Zion, Jackson County, Missouri, idi 20 ti Hulio, 1831 (History of the Church, 1:189–190). Iti panangtungpal iti bilin ti Apo (benneg 52), nagdaliasat dagiti elder a napan iti Missouri manipud iti Kirtland nga addaan iti nadumaduma a padas ken sumagmamano a tubeng. Iti panangpanunotna iti kasasaad dagiti Lamanite ken ti kinakurang iti sursuro, pannakamuli, ken pammati kadagiti kaaduanna a tattao, impukkaw ti Propeta iti agpakpakaasi a kararag: “Kaanonto nga agbukar ti langalang a kas iti rosas? Kaanonto a maipatakder ti Zion iti dayagna, ken sadinonto ti pagtakderan ti templom, nga umayanto amin dagiti pagilian kadagiti maudi nga aldaw?” (History of the Church, 1:189). Simmaruno ti pannakaawatna iti daytoy a paltiing.
1–3, Iti Independence, Missouri ti lugar a para iti Siudad ti Zion ken ti templo; 4–7, Nasken a gumatang dagiti Santo iti dagdaga ken umawatda kadagiti tawid iti dayta a disso; 8–16, Nasken a mangbangon ni Sidney Gilbert iti pagtagilakuan, agbalin nga agimalmaldit ni W. W. Phelps, ket ni Oliver Cowdery ti mangtarimaan kadagiti sinurat a maipablaak.
1 Imdenganyo, O dakayo nga elder ti simbaanko, kinuna ti Apo a Diosyo, a nangummong iti bagbagiyo a sangsangkamaysa, a maibatay kadagiti bilinko, iti daytoy a daga, nga isu ti daga ti Missouri, nga isu ti daga nga intudingko ken inikkak-pategna a paguummongan dagiti santo.
2 Gapuna, daytoy ti naikari a daga, ken ti lugar a para iti siudad ti Zion.
3 Ket kastoy ti kinuna ti Apo a Diosyo, no kayatyo ti umawat iti pagsiriban adtoy ti pagsiriban. Adtoy, ti lugar a maawagan itan iti Independence ti kangrunaan a lugar; ket nayaplag iti lumaud ti disso a para iti templo, iti solar a saan nga adayo manipud iti pangukoman.
4 Gapuna, nainsiriban a magatang dagiti santo ti daga, ken kasta met ti amin a dinisso ti daga iti lumaud, a kumamang iti nagbedngan ti Hudio ken Gentil;
5 Ken kasta met ti amin a dinisso ti daga a kumamang kadagiti tanap, no la ketdi kabaelan dagiti disipulok ti gumatang iti dagdaga. Adtoy, nainsiriban daytoy, tapno magun-odda a para iti agnanayon a tawid.
6 Ket ipatugawyo ni katulongak a Sidney Gilbert iti takem nga intudingko kenkuana, nga umawat kadagiti kuarta, nga agbalin a pannakabagi ti simbaan, a paggatang iti daga iti amin a lugar iti aglawlaw, no la ketdi aramidenna a sililinteg, ken babaen ti nainsiriban a panangiturong.
7 Ket ipatugawyo ni katulongak nga Edward Partridge iti takem nga intudingko kenkuana, ket bingayenna kadagiti santo ti tawidda, a kas iti imbilinko; ken kasta met dagiti tinudinganna a mangtarabay kenkuana.
8 Ket manen, pudno kunak kadakayo, pagtalinaedenyo ni katulongak a Sidney Gilbert iti daytoy a lugar, ket mangpatakder iti pagtagilakuan, tapno makalako kadagiti tagilako a di agkusit, tapno makapastrek iti kuarta a paggatang kadagiti daga para iti pagimbagan dagiti santo, ken tapno makaala iti ania man a banag a kasapulan dagiti disipulo nga imulada iti tawidda.
9 Ken kasta met a pagun-odenyo ni katulongak a Sidney Gilbert iti pammalubos—adtoy nainsiriban daytoy, ket asino man a makabasa nasken a maawatanna—tapno maipatulodna met dagiti tagilako kadagiti tao, babaen ti talkenna nga eskribiente a bayadanna iti trabahona;
10 Ket kastoy ti itutulong kadagiti santok, tapno maikasaba ti ebangheliok kadagiti adda iti kasipngetan ken iti lugar ken anniniwan ni patay.
11 Ket manen, pudno kunak kadakayo, pagtalinaedenyo ni katulongak a William W. Phelps iti daytoy a lugar, ket maipatugaw a kas agimalmaldit ti simbaan.
12 Ket ngarud, no awaten ti lubong dagiti sinuratna—adtoy nainsiriban daytoy—pagun-odenyo iti ania man a mabalinna a gun-oden a sililinteg, a para iti pagimbagan dagiti santo.
13 Ket patarabayyo ken ni katulongak nga Oliver Cowdery, a kas iti imbilinko, iti ania man a lugar a pangitudingakto kenkuana, a mangsakar, ken mangatur, ken mangpili, tapno agbalin nga umno amin a banag iti imatangko, a kas pinaneknekan ti Espiritu babaen kenkuana.
14 Ket kastoy a pagtalinaedenyo dagiti nasaokon iti daga ti Zion, iti kapardasan a mabalin a maaramid, a kaduada dagiti kaamaanda, a mangaramid kadagiti banag a nasaokon.
15 Ket ita maipanggep iti panagtitipon—pagsaganaenyo ti obispo ken ti mangibagi para kadagiti kaamaan a nabilin nga umay iti daytoy a daga, iti kabiitan a panawen, ket pagtalinaeden ida iti tawidda.
16 Ket maitedto ti ad-adu a panangiwanwan kadagiti nabati nga elder ken kamkameng kalpasan daytoy. Pudno a kasta. Amen.