Vaega 63
Faaaliga na tuuina mai e ala mai ia Iosefa Samita le Perofeta, i Katelani, Ohaio, i le aso 30 o Aukuso, 1831. Sa taunuu ane le Perofeta, Sini Rikitone, ma Oliva Kaotui i Katelani i a Aukuso 27 mai la latou asiasiga i Misuri. I le talafaasolopito a Iosefa Samita o loo faamatalaina ai lenei faaaliga faapea: “I aso nei o le talutalu fou o le Ekalesia, sa i ai le naunau tele ia maua le afioga a le Alii e uiga i mataupu uma e faatatau i soo se ala i lo tatou faaolataga; ma ona ua avea nei le laueleele o Siona ma mea faitino sili atu ona tāua i le vaaiga, o lea na ou ole atu ai i le Alii mo ni isi faamatalaga atili e uiga i le faapotopotoina o le Au Paia, ma le faatauina mai o le laueleele, ma isi mataupu.”
1–6, O le a oo mai se aso o le toasa i luga o e e amioleaga; 7–12, E oo mai faailoga e ala i le faatuatua; 13–19, O e mulilua i le loto o le a faafitia le faatuatuaga ma o le a lafo i le lepa afi; 20, O le a maua e e faamaoni se tofi i luga o le lalolagi liua; 21, E lei faaalia mai se tala atoa o mea na tutupu i luga o le Mauga o Liua; 22–23, E maua e e usiusitai mealilo o le malo; 24–31, E tatau ona faatau mai tofi i Siona; 32–35, Ua folafola e le Alii taua, ma o le a fasioti e e amioleaga e amioleaga; 36–48, Ia potopoto le Au Paia i Siona ma saunia tupe e ati a’e ai Siona; 49–54, Ua faamautinoa mai faamanuiaga i e faamaoni i le Afio Mai Faalua, i le Toetutu, ma i le taimi o le Meleniuma; 55–58, O se aso lenei o le lapataiga; 59–66, Ua ta’u fua le suafa o le Alii e i latou o e e faaaogaina lona suafa e aunoa ma le pule.
1 Faalogo mai ia, outou le nuu e, ma tatala o outou loto ma ua’i mai o outou taliga mai mea mamao; ma faalogo mai, outou ua ta’ua outou lava o tagata o le Alii, ma faalogo mai i le afioga a le Alii ma lona finagalo e faatatau ia te outou.
2 Ioe, e moni, Ou te fai atu, ia faalogo mai i le afioga a ia o lē o lona toasa ua sasao e faasaga i e e amioleaga ma e e fouvale;
3 O lē ua finagalo e ave i latou lava o e ua finagalo o ia e ave, ma faasao i le olaga i latou o e ua finagalo o ia e faasaoina;
4 O lē na te ati a’e e tusa ma lona lava loto ma lana filifiliga; ma faaumatia pe a finagalo i ai, ma mafai ona ia lafo le agaga i lalo i seoli.
5 Faauta, o A’u, o le Alii, Ou te tuu atu lo’u leo, ma ia usiusita’ia.
6 O le mea lea, e moni Ou te fai atu, ia tuu atu i e e amioleaga ia faaeteete, ma tuu atu i e e amioleaga ia matata’u ma gatete; ma tuu atu i e e lē talitonu ia taofi o latou laugutu, ona o le a oo mai i o latou luga le aso o le toasa e pei o se asiosio, ma o le a iloa e tagata uma o A’u o le Atua.
7 Ma o ia o lē e sailia faailoga o le a vaai i faailoga, ae lē mo le olataga.
8 E moni, Ou te fai atu ia te outou, e i ai ni isi o i latou o loo i totonu o outou o e ua saili i faailoga, ma sa i ai lava ni isi faapena mai le amataga;
9 Peitai, faauta, e lē oo mai le faatuatua e ala i faailoga, ae o faailoga e mulimuli ia te i latou o e e talitonu.
10 Ioe, e oo mai faailoga e ala i le faatuatua, ae lē ala mai i le manao o tagata, pe ona ua loto i ai, ae e ala mai i le finagalo o le Atua.
11 Ioe, e oo mai faailoga i le faatuatua, i galuega ofoofogia, aua a aunoa ma le faatuatua, e leai se tagata e fiafia i ai le Atua; ma o lē ua toatamai i ai le Atua ua lē fiafia i ai o ia; o le mea lea, e leai ni faailoga e faaalia e ia i e faapea, na’o le toasa e oo i lo latou ta’usalaga.
12 O le mea lea, o A’u, o le Alii, ua Ou lē fiafia ia i latou o i totonu o outou ua saili i faailoga ma mea ofoofogia mo le faatuatua, a ua lē mo le lelei o tagata ma lo’u mamalu.
13 Ae ui i lea, Ou te tuu atu poloaiga, ma e toatele ua liliuese mai a’u poloaiga ma ua latou lē tausia i latou.
14 Sa i ai i totonu o outou alii mulilulua ma fafine mulilulua; o ni isi o i latou ua liliuese mai ia te outou, ma o isi o loo nonofo pea faatasi ma outou ma o le a faaalia i se taimi mulimuli mai.
15 Ia tuu atu i e faapea ia faaeteete ma salamo vave, ne’i oo mai le faamasinoga i luga o i latou e pei o se mailei, ma o lo latou valea o le a faaalia, ma o a latou galuega o le a mulimuli atu ia te i latou i le vaaiga a tagata.
16 Ma e moni Ou te fai atu ia te outou, e pei ona Ou fai atu muamua, o ia o lē e vaai atu i se fafine ma manao i ai, pe afai e mulilulua ni isi i o latou loto, o le a latou lē maua le Agaga, ae o le a latou faafitia le faatuatuaga ma o le a matata’u.
17 O le mea lea, o A’u, o le Alii, ua faapea atu o e e matata’u, ma e e lē talitonu, ma tagata pepelo uma, ma o soo se tasi e fiafia i le pepelo ma faia se pepelo, ma le faitaaga ma le faataulaitu, o le a i ai lo latou taui i lena lepa ua mu i le afi ma le teiō, o le oti faalua lea.
18 E moni Ou te fai atu, o le a latou le i ai i le uluai toetutu.
19 Ma o lenei faauta, o A’u, o le Alii, e fai atu ia te outou ua lē ta’uamiotonuina outou, ona ua i ai nei mea i totonu o outou.
20 Ae ui i lea, o ia o lē e tumau i le faatuatua ma faia lo’u loto, o ia lava lea o le a manumalo, ma o le a maua e ia se tofi i le lalolagi pe a oo mai le aso o le liua;
21 Pe a liua le lalolagi, e tusa ai ma le mamanu sa faaali atu i a’u aposetolo i luga o le mauga; o le tala o lea mea tou te lei maua le atoatoa.
22 Ma o lenei, e moni Ou te fai atu ia te outou, e pei ona sa Ou fai atu o le a Ou faailoa atu lo’u loto ia te outou, faauta o le a Ou faailoa atu ia te outou, e lē ala atu o se poloaiga, ona o loo i ai le toatele o e ua lē tausisi e tausi i a’u poloaiga.
23 Ae ia te ia o lē ua tausi i a’u poloaiga o le a Ou tuu atu i ai mealilo o lo’u malo, ma o ia lava lea o le a i ai ia te ia se puna o le vai ola, e puna a’e i le ola faavavau-tumau.
24 Ma o lenei, faauta, o le finagalo lenei o le Alii lo outou Atua e faatatau i lana au paia, e tatau ona latou faapotopoto faatasi i latou lava i le laueleele o Siona, e lē faanatinatia, ne’i i ai se fenumiai, e oo mai ai puapuaga.
25 Faauta, o le laueleele o Siona—o A’u, o le Alii, ua Ou umia i o’u lava lima;
26 Ae ui i lea, o A’u, o le Alii, Ou te tuu atu ia Kaisara mea e a Kaisara.
27 O le mea lea, o A’u o le Alii Ou te loto ia outou faatau mai laueleele, ina ia mafai ona outou maua tulaga sili atu i le lalolagi, ina ia mafai ona outou maua āiā i le lalolagi, ina ia lē mafai ona faaoso a’e i latou i le ita.
28 Aua ua tuu e Satani i totonu o o latou loto ia feitai faasaga mai ia te outou, ma i le faamaligiina o le toto.
29 O le mea lea, o le a lē maua le laueleele o Siona vagana ai i le faatau mai po o i le toto, a lē o lea, e leai se tofi mo outou.
30 Ma afai e maua e ala i le faatau mai, faauta ua outou manuia;
31 Ma afai e maua e ala i le toto, talu ai ona ua faasaina outou e faamasaa le toto, faauta, ua i o outou luga o outou fili, ma o le a sauaina outou mai lea aai i lea aai, ma mai lea sunako i lea sunako, ma e toaitiiti o le a tutulai mai e maua se tofi.
32 O A’u, o le Alii, ua Ou ita i e amioleaga; ua Ou taofia lo’u Agaga mai tagata o le lalolagi.
33 Ua Ou tauto i lo’u ita, ma folafola taua i luga o le fogaeleele, ma o e amioleaga o le a fasiotia e amioleaga, ma o le a oo mai le mata’u i luga o tagata uma;
34 Ma o le au paia foi o le a toeitiiti lē sao ai; ae ui i lea, o A’u, o le Alii, o i le lagi, ua faatasi ma i latou, ma o le a Ou alu ifo mai luma o lo’u Tamā i le lagi ma faaumatia e amioleaga i le afi e lē matineia.
35 Ma faauta, e le’i oo mai lenei mea, ae ua lata mai lava.
36 O le mea lea, talu ai ona o A’u, o le Alii, na folafolaina atu nei mea uma i luga o le fogaeleele, Ou te loto ia faapotopoto la’u au paia i luga o le laueleele o Siona;
37 Ma e tatau i tagata uma ona ave le amiotonu i ona lima ma le faamaoni i ona sulugatiti, ma siitia a’e se leo o le lapataiga i tagata o le lalolagi; ma ta’u atu e ala i le upu ma le solaese, o le a oo mai le faafanoga i luga o e amioleaga.
38 O le mea lea, ia tuu atu i o’u soo i Katelani, o e o nonofo i luga o lenei faatoaga, ia faatulaga o latou atugaluga faaletino.
39 Ia tuu i la’u auauna o Tito Billings, o lē ua i ai lona tausiga o le faatoaga, e faatea atu le laueleele, ina ia mafai ona saunia o ia i le tautotogo a sau, e alu a’e lana malaga i le laueleele o Siona, faatasi ma i latou o e o nonofo ai, vagana ai i latou o e o le a Ou faapolopoloina mo a’u lava, o e o le a lē o atu seia Ou poloaiina ai i latou.
40 Ma ia tuu tupe uma e mafai ona faasaoina, e lē afaina ia te a’u pe itiiti pe tele, e auina atu i le laueleele o Siona, ia i latou o e ua Ou tofia e mauaina.
41 Faauta, o A’u, o le Alii, o le a Ou tuu atu i la’u auauna o Iosefa Samita, Le Itiiti, le mana o le a mafai ai e ia ona iloatino e ala i le Agaga, i latou o e e o a’e i le laueleele o Siona, ma i latou o o’u soo o e o le a nonofo pea.
42 Ia tuu atu i la’u auauna o Newel K. Whitney e faatumauina pea lona faleoloa, pe i se isi faaupuga, le faleoloa, mo se vaitau itiiti.
43 Ae ui i lea, ia tuu atu ia te ia e faamatuu atu tupe uma e mafai ona ia faamatuu atu, e auina atu i i le laueleele o Siona.
44 Faauta, o nei mea ua i ai i ona lava lima, ia tuu atu ia te ia e fai e tusa ai ma le faautauta.
45 E moni Ou te fai atu, ia faauuina o ia o se sui mo soo o le a nonofo pea, ma ia faauuina o ia i lenei mana;
46 Ma o lenei, asiasi vave atu i aulotu, faatasi ma la’u auauna o Oliva Kaotui, ma faamalamalama atu nei mea ia te i latou. Faauta, o lo’u loto lea, i le mauaina mai o tupe e pei lava ona sa Ou faatonuina.
47 O ia o lē e faamaoni ma tumau o le a manumalo i le lalolagi.
48 O ia o lē na te auina atu oa i luga i le laueleele o Siona o le a maua e ia se tofi i le lalolagi lenei, ma se taui foi i le lalolagi a sau, ma o le a mulimuli atu ana galuega ia te ia.
49 Ioe, ma amuia lava e e oti o e e oti i le Alii, mai le taimi nei ma le agai i luma, pe a afio mai le Alii, ma o le a mavae atu ai mea tuai, ma faafouina ai mea uma, o le a latou tutulai mai nai le oti ma o le a lē feoti pe a mavae, ma o le a latou maua se tofi i luma o le Alii, i le aai paia.
50 Ma o ia o lē e ola pe a afio mai le Alii, ma sa ia tausia le faatuatuaga, amuia lava o ia; ae ui i lea, ua tofia ia te ia ia oti i tausaga o le tagata.
51 O le mea lea, o le a tutupu a’e fanau seia oo ina latou matutua, o le a feoti toeaiina matutua; ae o le a lē momoe i latou i le efuefu, ae o le a liua i latou i le emo o le mata.
52 O le mea lea, o le pogai lenei na talai atu ai e le au aposetolo i le lalolagi le toetutu mai o e ua oti.
53 O nei mea o mea ia e ao ina outou tulimatai atu i ai; ma, i le tautala atu e tusa ma le ala a le Alii, ua lata mai lava ona oo mai ia mea, ma i se taimi a sau, i le aso lava lea o le afio mai o le Atalii o le Tagata.
54 Ma seia oo i lena itula, o le a i ai taupou valelea i totonu o e popoto; ma i le itula lena e oo mai ai se tuueseesega atoa o e amiotonu ma e amioleaga; ma i le aso lena o le a ’Ou auina atu ai a’u agelu e ’oto ese e amioleaga ma lafo i latou i le afi e lē matineia.
55 Ma o lenei faauta, e moni Ou te fai atu ia te outou, o A’u, o le Alii, ua Ou lē fiafia i la’u auauna o Sini Rikitone; ua faaea e ia o ia lava i lona loto, ma sa lē talia e ia le fautuaga, ae ua faatausuai i le Agaga;
56 O le mea lea ua lē talia ai ana tusitusiga i le Alii, ma ia faia e ia se isi tusitusiga; ma afai e lē taliaina e le Alii, faauta e lē toe tu o ia i le tofiga na Ou tofia i ai o ia.
57 O lenei foi, e moni Ou te fai atu ia te outou, o i latou o e ua mananao i o latou loto, i le agamalu, e lapatai atu i e ua agasala ia salamo, ia tuu atu i latou ia faauuina i lenei mana.
58 Aua o se aso lenei o le lapataiga, ae lē o se aso mo le tele o upu. Aua o A’u, o le Alii, ia lē ulagia i aso gataaga.
59 Faauta, ua Ou sau mai lugā, ma ua taoto i lalo ifo lo’u mana. Ou te pule i mea uma, ma ua i ai i totonu o mea uma, ma e ala atu i mea uma, ma vailiili i mea uma, ma e oo mai le aso o le a i ai mea uma i la’u pule.
60 Faauta, o A’u o le Alefa ma le Omeka, o Iesu Keriso lava.
61 O le mea lea, ia tuu atu i tagata uma ia faaeteete i le ala latou te faaaoga ai lo’u igoa i o latou laugutu—
62 Aua faauta, e moni Ou te fai atu, e toatele e ua i ai i lalo o lenei tausalaga, o e ua latou faaaoga le suafa o le Alii, ma faaaogaina fua, e aunoa ma le pule.
63 O le mea lea, ia tuu atu i le ekalesia ia salamo i a latou agasala, ma o A’u, o le Alii, o le a fai i latou mo A’u; a lē o lea o le a vavae ese i latou.
64 Ia manatua o le mea e sau mai luga ua paia, ma e ao ona tautalagia ma le faaeteete, ma i le taofiofiga a le Agaga; ma ua leai se tausalaga i lenei mea, ma e tou te maua le Agaga e ala i le tatalo; o le mea lea, a aunoa ma lenei, e tumau pea le tausalaga.
65 Ia tuu atu i a’u auauna, o Iosefa Samita, Le Itiiti, ma Sini Rikitone, e saili mo se fale mo i laua, e pei ona aoaoina ai i laua e le Agaga e ala i le tatalo.
66 O nei mea ua tumau pea e faatoilaloina ai e ala i le onosai, ina ia mafai ona maua e e faapena se fuataga matuā tele atu ma faavavau o le mamalu, a lē o lea, o se tausalaga tele atu. Amene.