Vaega 66
Faaaliga na tuuina mai e ala mai ia Iosefa Samita le Perofeta, i Hairama, Ohaio, i le aso 29 o Oketopa, 1831. Na talosaga faalilolilo Viliamu E. McLellin i le Alii ina ia faaali mai, e ala mai i le Perofeta, tali i fesili e lima ia na le iloa e Iosefa Samita. E tusa ai ma le talosaga a McLellin, na ole atu le Perofeta i le Alii ma maua ai le faaaliga lenei.
1–4, O le feagaiga tumau e faavavau o le atoatoa lea o le talalelei; 5–8, E tatau i toeaina ona talai, molimau atu, ma talatala ma tagata; 9–13, O le auauna atu ma le faamaoni faafaifeau e mautinoa ai se tofi o le ola faavavau.
1 Faauta, ua faapea ona fetalai mai o le Alii i la’u auauna o Viliamu E. McLellin—Amuia oe, talu ai ona ua e liliu ese mai au amioletonu, ma ua e talia a’u upumoni, ua fetalai mai ai le Alii lou Togiola, le Faaola o le lalolagi, po o le toatele lea o e e talitonu i lo’u igoa.
2 E moni Ou te fai atu ia te oe, amuia oe i le talia o la’u feagaiga tumau e faavavau, le atoatoa lea o la’u talalelei, ua auina atu i le fanauga a tagata, ina ia mafai ona latou maua o le ola ma avea ma e e mauaina mamalu o le a faaalia i aso e gata ai, e pei ona sa tusia e perofeta ma aposetolo i aso anamua.
3 E moni Ou te fai atu ia te oe, la’u auauna o Viliamu, ua e mamā, ae ua lē mamā atoa; o le mea lea, ia e salamo, i mea na ua lē lelei i la’u vaai, ua fetalai mai ai le Alii, ona o le a faaali atu i latou e le Alii ia te oe.
4 Ma o lenei, e moni, o A’u, o le Alii, o le a Ou faailoa atu ia te oe mea Ou te manao i ai e faatatau ia te oe, po o lo’u loto e faatatau ia te oe.
5 Faauta, e moni Ou te fai atu ia te oe, o lo’u loto lenei, e tatau ona e folafola atu la’u talalelei mai lea laueleele i lea laueleele, ma mai lea aai i lea aai, ioe, i nofoaga o faataamilo ai i mea e lei folafolaina ai.
6 Aua le tele ni aso e te nofo ai i le nofoaga lenei; aua e te alu a’e nei i le laueleele o Siona; ae tusa ai ma lou mafai ona auina atu, auina atu; a lē o lea, aua le mafaufau i au meatotino.
7 Alu i laueleele i sasa’e, molimau atu i nofoaga uma, i tagata uma ma i o latou sunako, ma feutaga’i ma tagata.
8 Tuu atu i la’u auauna o Samuelu H. Samita e o atu faatasi ma oe, ma aua le tuulafoaia o ia, ma tuu atu ia te ia au faatonuga; ma o ia o lē e faamaoni o le a faamalosia i nofoaga uma; ma o A’u, o le Alii, o le a Ou alu faatasi ma oulua.
9 Faaee atu ou lima i luga o e e mama’i, ma o le a toe faamaloloina i latou. Aua le foi mai seia auina atu oe e A’u, le Alii. Onosai i puapuaga. Ole atu, ma o le a e maua ai; tu’itu’i atu, ma o le a tatalaina mai ia te oe.
10 Aua le saili e faalavelavea oe. Lafoa’i i amioletonu uma. Aua le mulilua—o se faaosoosoga lea na faalavelavea ai oe.
11 Tausi i upu nei, ona ua moni ma faamaoni i latou; ma ia e faalauteleina lou tofi, ma uunai atu tagata e toatele i Siona faatasi ma pese o le olioli tumau e faavavau i luga o o latou ulu.
12 Ia tumau pea i nei mea e oo lava i le iuga, ma o le a e maua ai se pale o le ola faavavau i le aao taumatau o lo’u Tamā, o lē ua tumu i le alofa tunoa ma le upumoni.
13 E moni, ua faapea ona fetalai mai o le Alii lou Atua, lou Togiola, o Iesu Keriso lava lea. Amene.