Benneg 73
Paltiing a naited kada Joseph Smith a Propeta ken Sidney Rigdon, iti Hiram, Ohio, idi 10 ti Enero 1832 (History of the Church, 1:241–242). Manipud kadagiti umuna nga aldaw ti napalabas a Disiembre, nakumikomen ti Propeta ken ni Sidney a mangasaba, ket kaipapanan daytoy ti adu a naiwakas iti pannakaksay dagiti saan a nasayaat a rikna a rimsua a maibusor iti Simbaan (kitaen ti paulo ti benneg 71).
1–2, Nasken nga ituloy dagiti elder ti mangasaba; 3–6, Nasken nga ituloy da Joseph Smith ken Sidney Rigdon nga ipatarus ti Biblia agingga a malpas.
1 Ta pudno, kastoy ti kinuna ti Apo, nasken kaniak nga ituloyda ti mangikasaba iti ebanghelio, ken ti panangigunamgunamda kadagiti simbaan kadagiti lugar iti aglawlaw, agingga iti taripnong;
2 Ket kalpasanna, adtoy, maipakaammonto kadakuada, babaen ti timek ti taripnong, dagiti sumagmamano a misionda.
3 Ita pudno kunak kadakayo katulongak, a Joseph Smith, Jun., ken Sidney Rigdon, kinuna ti Apo, nasken ti panagipatarus manen;
4 Ket, no la ketdi mabalin, ti mangasaba kadagiti lugar iti aglawlaw agingga iti taripnong; ken kalpasan dayta masapul ti pannakaituloy ti aramid iti panagipatarus agingga iti malpas.
5 Ket aramiden daytoy a pagtuladan dagiti elder agingga iti ad-adu pay a pannakaammo, a kas iti naisurat.
6 Ita awanen ti itedko pay kadakayo iti daytoy a kanito. Patibkerenyo dagiti lomoyo ken agparbengkayo. Pudno a kasta. Amen.