Mwakoro 7
Kaotioti ae kaotaki nakon Iotebwa Timiti te Burabeti ao Oliver Cowdery, i Harmony, Pennsylvania, n Eberi 1829, ngke a titiraki rinanon te Urim ao Tammim ngkana Ioane, te tia reirei are moan te tatangiraki, e tiku n iriko ke e a tia ni mate. Te kaotioti bon rairan te rongorongo ake a koreaki i aon kunin te man iroun Ioane ao ake a karabaaki naba irouna.
1–3, Ioane te tatangiraki e na bon maiu ni karokoa rokon te Uea; 4–8, A karekea kiingin te euangkerio Betero, Iakobo, ao Ioane.
1 Ao e taku te Uea nakoiu: Ioane, are e tangiraki irou, tera ae ko tangiria? Bwa ngkana ko bubuti te bwai ae ko tangiria, e na bon karekeaki nakoim.
2 Ao I taku nakoina: Te Uea, anganai te mwaaka i aon te mate, bwa I aonga ni maiu ao ni uotia aomata nakoim.
3 Ao e taku te Uea nakoiu: E koaua, e koaua, I tuangko, bukina ngkai ko tangira aei ao ko na tiku ni karokoa I roko ni mimitongiu, ao ko na taetae ni burabeti nakoia aaba, baronga, neewe ao aomata.
4 Ao ibukin aei, te Uea e taku nakon Betero: Ngkana I tangiria bwa e na tiku ni karokoa rokou, tera anne iroum? Bwa e bubutiai bwa e na uotia aomata nakoiu, ma ngkoe ko bubuti bwa ko na waekoa n roko nakoiu n abanueau.
5 I taku nakoim, Betero, aio te kantaninga ae e raoiroi; ma teuae e tatangiraki irou e tangiria bwa e na karaoa ae e mwaiti riki, ke te mwakuri ae e korakora riki nakon are e karaoia mai i mwaaina i buakoia aomata.
6 Eng, e a tia ni kataua te mwakuri ae e korakora riki; mangaia are N na karikia n ai aron te ai ae e ura mwaaka ao te anera ae te tia ibuobuoki; e na buokiia naake ana karekea te kamaiuaki ake a maeka i aon te aba.
7 Ao N na karikiko bwa te tia ibuobuoki nakoina ao nakon tarim ae Iakobo; ao nakoimi teniman N na anganingkami te mwaaka aei ao kiingin te ibuobuoki ni karokoa I roko.
8 E koaua I tuangkami, ngkami uoman kam na bon karekei ni kaineti ma bwaai ake kam tangirii, bwa ngkami uoman kam na kimwareirei n te bwai are kam tangiria.