Jekjōn 83
Revelesōn letok kōn Josep Smith Rikanaan eo, ilo Independence, Missouri, Eprōļ 30, 1832. Revelesōn in kar bōke ke Rikanaan eo eaar jijet ilo ko̧o̧njeļ ippān em̧m̧an ro rej tōl kabun̄.
1–4, Kōrā ro im ajri ro ewōr aer ioon ļōm̧aro pālele im ro jemān n̄an oņaake eo aer; 5–6, Kōrā ro emej pāleer ak ajri ro ejjeļo̧k jemāer im jineer ewōr aer ioon Kabun̄ eo n̄an oņaake eo aer.
1 Em̧ool, āindein Irooj ej ba, kobaļo̧k n̄an kien ko an kabun̄ in kōn kōrā ro im ajri ro, ro rej an kabun̄ in, ro em̧ōj an jako ļōm̧aro pāleer im ro jemāer:
2 Kōrā ro ewōr aer ioon ļōm̧aro pāleer n̄an kōjparok eo aer, m̧ae em̧ōj bōk ļōm̧aro pāleer; im eļan̄n̄e jab lo er rijero̧wiwi renaaj wōr aer maron̄ jemdoon ilo kabun̄ in.
3 Im eļan̄n̄e rej jab tiljek renaaj ban jemdoon ilo kabun̄ in; ijoke remaron̄ pād wōt ioon jikin jolōt ko aer ekkar n̄an kien ko an āneo.
4 Aolep ajri ro ewōr aer ioon ro jemāer im jineer n̄an oņaake eo aer m̧ae aer tōpar dettan eo.
5 Im ālikin men in, ewōr aer ioon kabun̄ in, ak ilo bar jet naan ioon im̧ōn ko̧koņ eo an Irooj, eļan̄n̄e ro jemāer im jineer ejjeļo̧k aer n̄an leļo̧k n̄an er aer jolōt.
6 Im im̧ōn ko̧koņ eo naaj kōjparok e n̄an wūjlepļo̧k ko an kabun̄ in; im kōrā ro emej pāleer im ajri ro ejjeļo̧k jemāer im jineer naaj kakke aer aikuj, āinwōt ro rijeram̧ōl barāinwōt. Amen.