1 E moni, ua faapea ona fetalai mai o le Alii ia te outou o a’u auauna, e uiga i le faataoto i saito ma titania:

2 Faauta, e moni Ou te fai atu, o le fanua o le lalolagi lea, ma o aposetolo o i latou ia o e na luluina fatu;

3 Ma ina ua uma ona latou momoe, o lē ua faasauā tele i le ekalesia, o lē ua liliuese, o lē o le fafine talitane, o Papelonia lava lea, o lē ua faia atunuu uma ia feinu i lana ipu, o e o o latou loto, ua nofo ai le fili, o Satani lava, e pule ai—faauta, ua lulu e ia titania; o le mea lea, ua tineia ai e le titania le saito ma tuli le ekalesia i le vao.

4 Ae faauta, i aso e gata ai, i le taimi nei lava a’o amata ona aumai e le Alii le upu, ma ua totogo a’e le lau saito ma o loo mu’amu’a lava—

5 Faauta, e moni Ou te fai atu ia te outou, o loo fetagisi atu agelu i le Alii i le ao ma le po, o e ua sauni ma faatalitali e auina atu e selesele i lalo fanua;

6 Peitai ua fetalai atu le Alii ia te i latou, aua le lia’iina i luga titania a’o mu’amu’a le lau (aua e moni o loo vaivai lo outou faatuatua), ne’i outou faaumatia ai foi le saito.

7 O lea, ia tuu pea le saito ma le titania e tutupu faatasi seia matua atoa le seleselega; ona outou faaputu ese muamua lea o le saito mai totonu o titania, ma a uma ona faaputuina o le saito, faauta ma tagai, ia fusifusi titania i fusi, ma tuu ai le fanua e susunuina.

8 O lea, ua faapea ona fetalai mai o le Alii ia te outou, o e ua faaauau ai pea le perisitua e ala i le gafa o o outou tamā—

9 Aua o outou o suli faaletulafono, e tusa ma la le tino, ma na natia mai le lalolagi faatasi ma Keriso i le Atua—

10 O lea ua tumau ai pea lo outou ola ma le perisitua, ma e tatau lava ona tumau pea e ala atu ia te outou ma lo outou gafa seia oo i le toefuataiga o mea uma na fetalaia mai e fofoga o perofeta paia uma talu mai le amataga o le lalolagi.

11 O lea, amuia lava outou pe afai tou te tumau pea i lo’u agalelei, o se malamalama i Nuuese, ma o se faaola i lo’u nuu o Isaraelu, e ala atu i lenei perisitua. Na fetalai mai ai le Alii. Amene.