Jekjōn 87
Revelesōn im kanaan kōn tariņae, letok kōn Josep Smith Rikanaan eo, ilo ak iturin Kirtland, Ohio, Tijem̧ba 25, 1832. Ilo tōrre in aitwerōk ko ilo United States kōn kōm̧akoko an South Carolina kajjej tokjān ewōj an kien eo ioļap rekar kanuij ajeeded. Bwebwenato eo an Josep Smith ej ba bwe “jejādede ko kōn epelo̧n̄lo̧n̄ ko ilubwiljin laļ ko” ekar “lapļo̧k aer toojlo̧k” n̄an Rikanaan eo “jān ke rekar m̧oktaļo̧k jān wōt iien eo Kabun̄ in ekar jino em̧m̧akit eo an jān āne jem̧aden.”
1–4, Tariņae ej rikanij kake ikōtaan Bukwōn ko Ituiōn̄ im Bukwōn ko Iturōk; 5–8, Jorrāān ko reļļap renaaj wōtlo̧k ioon aolep ro rej pād ilaļ in.
1 Em̧ool, āindein Irooj ej ba kōn tariņae ko ej jab to aer naaj waļo̧k, ijjino ilo jum̧ae an South Carolina, eo enaaj āliktata bōjrakļo̧k ilo mej im būrom̧ōj an elōn̄ armej;
2 Im iien eo enaaj itok n̄e tariņae eo enaaj lutōkleplepļo̧k ioon aolep laļ ko, ijjino ilo jikin in.
3 Bwe lo, Bukwōn ko Iturōk renaaj ajej ņae Bukwōn ko Ituiōn̄, im Bukwōn ko Iturōk renaaj kūr ioon laļ ko jet, em̧ool laļ eo eļap an Great Britain, āinwōt jeļā kake etan, im renaaj barāinwōt kūr ioon laļ ko jet, n̄an aer maron̄ jojomar n̄an er make ņae laļ ko jet; innām tariņae eo enaaj lutōkleplep ļo̧k ioon aolep laļ ko.
4 Im naaj ālikin men kein, ālikin elōn̄ raan ko, rikōm̧akoko ro renaaj wanlōn̄tak ņae karo ro aer, ro renaaj kōpopo im kōmālmel n̄an tariņae.
5 Im enaaj waļo̧k barāinwōt bwe bwein ro rej pād wōt ioon āneo renaaj kōpopoik er make, im naaj kanooj illu otem illu, im naaj kajorrāān ro riAelōn̄ ko kōn juon kajorrāān eo ekanooj kōmetak.
6 Im āindein, kōn jāje eo im jān kōto̧o̧rļo̧k bōtōktōk ro rej pād ilaļ renaaj būrom̧ōj; im kōn n̄ūta, im kaen̄taan, im m̧akūtkūt in laļ, im jourur in lan̄, im jarom ellu im toojlo̧k barāinwōt, naaj kōm̧m̧an bwe ro rej pād ilaļ n̄an en̄jake illu eo, im libabne eo, im pein kauwe an Anij Ekajoor Bōtata, m̧ae ko̧kkure kean̄ kake eaar kalikiioik jem̧ļo̧kin aolep laļ ko;
7 Bwe kūr an ro rekwōjarjar, im an bōtōktōkin ro rekwōjarjar, renaaj jem̧ļo̧k n̄an wanlōn̄tak n̄an lo̧jiln̄in Irooj in Sabaot, jān laļ, n̄an idenoņeik rikōjdat ro aer.
8 Kōn menin, kom̧in jutak ilo jikin ko rekwōjarjar, im jab em̧m̧akūt, m̧ae raan in Irooj ej itok; bwe lo, e m̧ōkaj an itok, Irooj ej ba. Amen.