1 Ua faapea ona fetalai mai o le Alii, e moni, e moni Ou te fai atu ia te oe lo’u atalii, ua faamagaloina oe i au agasala, e tusa ma lau olega, ona ua oo mai i o’u luma au tatalo ma tatalo a ou uso.

2 O lea, ua faamanuiaina oe mai le taimi nei ma le agai i luma o lē ua umia ki o le malo ua tuu atu ia te oe; o le malo lea ua oo mai mo le taimi mulimuli.

3 E moni Ou te fai atu ia te oe, o ki o lenei malo o le a lē aveesea lava mai ia te oe, a’o e i ai i le lalolagi, pe i le lalolagi a sau;

4 Ae ui i lea, o le a ala atu ia te oe ona tuuina atu o faaaliga i se tasi, ioe, i le ekalesia lava.

5 Ma o i latou uma o e e mauaina faaaliga a le Atua, ia tuu atu ia te i latou ia faaeteete i le ala latou te umia ai i latou, ne’i o latou manatu i ai e pei o se mea māmā, ma faapea ona aumai ai i latou i lalo o le ta’usalaga, ma tautevateva ma pa’u’ū ai pe a oo mai afā, ma agi mai matagi, ma to mai uaga, ma taia i luga o o latou fale.

6 O lenei foi, e moni Ou te fai atu i ou uso, o Sini Rikitone ma Frederick G. Williams, ua faamagaloina foi a la’ua agasala mai ia te i la’ua, ma ua faitau tutusa i la’ua ma oe i le umiaina o ki o le malo mulimuli lenei;

7 Ma e ala atu foi i lau taitaiga ki o le a’oga a perofeta, lea na Ou poloaiina ia faatulagaina;

8 Ina ia faapea ona mafai ai ona faaatoatoaina o i la’ua i la la’ua auaunaga mo le faaolataga o Siona, ma atunuu o Isaraelu, ma Nuuese, e tusa ma le toatele e talitonu;

9 Ina ia mafai, e ala atu i lau taitaiga, ona la’ua maua le afioga, ma ina ia mafai, e ala i la la’ua taitaiga, ona alu atu o le afioga i tuluiga o le lalolagi, e muamua i Nuuese, ma, faauta ma tagai, ona la’ua liliu atu ai lea i tagata Iutaia.

10 Ma ona oo mai lea o le aso o le a faaali mai ai le aao o le Alii i le mana, i le faatalitonuina o atunuu, o atunuu faapaupau, o le aiga o Iosefa, e uiga i le talalelei o lo latou faaolataga.

11 Auā o le a oo mai, i lena aso, o le a faalogo ai tagata taitoatasi i le atoatoaga o le talalelei i lana lava tautala, ma i lana lava gagana, e ala mai ia te i latou ua faauuina i lenei mana, e ala i le taitaiga a le Fesoasoani, e liligi ifo i luga o i latou mo le faaaliga o Iesu Keriso.

12 Ma o lenei, e moni Ou te fai atu ia te oe, Ou te tuu atu ia te outou se poloaiga, ia outou faaauau pea i le auaunaga faapea ma le au peresitene.

13 Ma a uma ona e faamae’aina o le faaliliuga o tusi a perofeta, ona e pulefaamalumalu lea mai le taimi lena i luga o mataupu o le ekalesia ma le a’oga;

14 Ma e maua mai lea taimi i lea taimi, e pei ona o le a faaali atu e le Fesoasoani, faaaliga e tatala atu ai mealilo o le malo;

15 Ma faatulaga tatau aulotu, ma suesue ma a’oa’o, ma faamasani i tusi lelei uma, ma gagana, tautala, ma tagata.

16 Ma ia avea lea ma o outou valaauga ma misiona i o outou olaga atoa, e pulefaamalumalu i fono, ma faatulaga tatau mataupu uma o lenei ekalesia ma le malo.

17 Aua le maasiasi, pe matamuli; ae ia tima’ia outou i lo outou faasausili ma le faamaualuga, auā e aumai ai se mailei i luga o o outou agaga.

18 Faatulaga tatau o outou fale; tuu mamao ese atu mai ia te outou le faapaiē ma le lē tu mamā.

19 O lenei, e moni Ou te fai atu ia te oe, ia i ai se nofoaga e saunia, i le vave e mafai ai, mo le aiga o lou fesoasoani ma lau tusiupu, o Frederick G. Williams lea.

20 Ma ia tuu i la’u auauna matua, o Iosefa Samita, Matua, e nonofo pea ma lona aiga i le nofoaga o loo nofo ai nei o ia; ma ia lē tuuina atu e faatau atu se’i ta’u atu e le fofoga o le Alii.

21 Ma ia tuu i lo’u fesoasoani, o Sini Rikitone lea, e nofo pea i le nofoaga o loo alaala ai nei o ia, sei ta’u atu e le fofoga o le Alii.

22 Ma ia tuu atu i le epikopo e saili ma le filiga ia maua se sui, ma ’ia fai o ia o se tagata o sē ua i ai ni ’oa ua teuina—o se tagata o le Atua, ma le faatuatua malosi—

23 Ina ia mafai ai ona ia totogiina o aitalafu uma; ina ia lē mafai ona aumai o le faleteuoloa o le Alii ia ta’uleagaina i luma o mata o tagata.

24 Saili ma le filiga, tatalo e lē aunoa, ma ia talitonu, ma o le a galulue faatasi mea uma mo lo outou lelei, pe afai tou te savavali sa’o ma manatua le feagaiga na outou osifeagaiga ai o le tasi ma le isi.

25 Ia faatoaitiitia o outou aiga, aemaise lava la’u auauna matua o Iosefa Samita, Matua, e faatatau ia te i latou o e e lē o ni o outou aiga;

26 Ina ia lē aveesea mai ia te outou, mea na ua saunia mo outou, e faataunuu ai la’u galuega, ma tuu atu ia te i latou o e ua lē agavaa—

27 Ma faapea ona ponatia ai o outou mai le faataunuuina o mea na ua Ou poloaiina ai outou.

28 O lenei foi, e moni Ou te fai atu ia te outou, o lo’u loto e tatau i la’u auauna-fafine o Vienna Jaques ona maua tupe e totogi ai ana mea e faatau, ma alu a’e i luga i le laueleele o Siona;

29 Ma o tupe e totoe ia faapaia mai ia te a’u, ma o le a tauia o ia i lo’u lava taimi e tatau ai.

30 E moni Ou te fai atu ia te outou, ua talafeagai i la’u vaai le tatau ai ona alu atu o ia i luga i le laueleele o Siona, ma maua se tofi mai le lima o le epikopo;

31 Ina ia mafai ona nofo lelei o ia i le filemu e tusa ai ma lona faamaoni, ma lē faapaiē i ona aso mai le taimi nei ma le agai i luma.

32 Ma faauta, e moni Ou te fai atu ia te outou, ia outou tusia lenei poloaiga, ma fai atu i o outou uso i Siona, i le faafeiloa’i atu i le alofa, ua Ou valaaulia foi outou e pulefaamalumalu i luga o Siona i lo’u lava taimi e tatau ai.

33 O lea, ia tuu atu ia te i latou ia tuu le faalavelave mai ia te a’u e faatatau i lenei mataupu.

34 Faauta, Ou te fai atu ia te outou ua amata ona salamo o outou uso i Siona, ma ua olioli agelu i luga o i latou.

35 Ae ui i lea, e tele mea ua Ou lē fiafia i ai; ma ua Ou lē fiafia i la’u auauna o William E. McLellin, pe i la’u auauna o Sini Gilbert; ma ua i ai foi i le epikopo, ma isi, le tele o mea ia salamo ai.

36 Peitai e moni Ou te fai atu ia te outou, o A’u, o le Alii, o le a Ou finau ma Siona, ma aioi atu i ona tagata malolosi, ma a’oa’i o ia seia manumalo ma faamamāina i o’u luma.

37 Ona o le a lē aveesea o ia mai lona nofoaga. O A’u, o le Alii, ua tautala atu ai. Amene.