Vaega 95
Faaaliga na tuuina mai e ala mai ia Iosefa Samita le Perofeta, i Katelani, Ohaio, i le aso 1 o Iuni, 1833. O lenei faaaliga o se faaauauga o faatonuga paia ia fausia se fale mo tapuaiga ma a’oa’oga, le maota o le Alii (tagai i le vaega 88:119–136).
1–6, Ua a’oa’iina le Au Paia i lo latou lē fausia o le maota o le Alii; 7–10, Ua finagalo le Alii e faaaoga Lona maota e faaee ai i Lona nuu le mana mai luga; 11–17, Ua faamoemoeina le fale ia faapaiaina o se maota o tapuaiga ma mo le a’oga a Aposetolo.
1 E moni, ua faapea ona fetalai mai o le Alii ia te outou o e ua Ou alofa i ai, ma o e Ou te alofa i ai Ou te a’oa’iina foi ina ia mafai ona faamagaloina a latou agasala, auā Ou te saunia, faatasi ma le a’oa’iga, se ala mo le laveaiina o i latou mai le faaosoosoga, i mea uma, ma sa Ou alofa ia te outou—
2 O le mea lea, e ao ai ina a’oa’iina outou ma tutulai ua a’oa’iina i o’u luma;
3 Ona ua outou faia mai ia te a’u se agasala mamafa tele, i lo outou lē manatu i le poloaiga sili i mea uma, lea na Ou tuuina atu ia te outou e faatatau i le fausiga o lo’u fale;
4 Mo le sauniuniga lea ua Ou fuafuaina e saunia ai a’u aposetolo e teu lo’u tovine mo le taimi mulimuli, ina ia mafai ona Ou faataunuu o la’u galuega uiga ese, ina ia mafai ona Ou liligi atu lo’u Agaga i luga o tagata uma—
5 Ae faauta, e moni Ou te fai atu ia te outou, o loo i ai se toatele o e ua uma ona faauuina i totonu o outou, o e na Ou valaaulia ae toaitiiti i latou ua filifilia.
6 O i latou o e ua lē filifilia ua latou faia se agasala mamafa, lea ua latou savavali ai i le pouliuli i le aoauli.
7 Ma o le pogai lenei na Ou tuu atu ai ia te outou se poloaiga e tatau ona talo sa outou faapotopotoga paia, ina ia mafai ona oo a’e a outou anapogi ma a outou faanoanoaga i fofoga o le Alii o Sapaota, o lona uiga pe a faaliliuina, o le foafoa lea o le uluai aso, o le amataga ma le gataaga.
8 Ioe, e moni Ou te fai atu ia te outou, na Ou tuu atu ia te outou se poloaiga e tatau ona outou fausia se fale, o se fale lea ua Ou fuafuaina e faaeeina ai i latou o e ua Ou filifilia, i le mana mai lugā;
9 Ona o le folafolaga lenei a le Tamā ia te outou; o lea Ou te poloai atu ai ia te outou ia nonofo pea, e pei lava o a’u aposetolo i Ierusalema.
10 Ae ui i lea, na faia e a’u auauna se agasala mamafa; ma sa tutupu mai ni finauga i le a’oga a perofeta; o se mea na mamafa ia te a’u, ua fetalai mai ai lo outou Alii; o lea na ’Ou auina atu ai i latou ia a’oa’iina.
11 E moni Ou te fai atu ia te outou, o lo’u manao ia outou fausia se fale. Afai tou te tausia a’u poloaiga o le a outou maua le mana e fausia ai.
12 Afai tou te lē tausia a’u poloaiga, o le a lē tumau pea le alofa o le Tamā e faatasi ma outou, o lea o le a outou savavali ai i le pouliuli.
13 O lenei o le poto lenei, ma le mafaufau o le Alii—ia fausia le fale, e lē tusa ma le ala a le lalolagi, aua Ou te lē tuu atu ia te outou ia outou ola e tusa ma le ala a le lalolagi;
14 O lea, ia fausia e tusa ma le ala lea o le a Ou faaali atu i se toatolu o outou, o e ia outou tofia ma faauu i lenei mana.
15 Ma o lona telē ia limasefulu ma le lima futu le lautele, ma ia onosefulu-lima futu le umi, i lona lotoifale i totonu.
16 Ma ia tuu le vaega alalo o le lotoifale i totonu ia faapaia mo a’u mo a outou taulaga faamanatuga, ma mo a outou talaiga, ma a outou anapogi, ma a outou talosaga, ma le tuuina mai ia te a’u o o outou manaoga silisili ona paia, ua fetalai mai ai lo outou Alii.
17 Ma ia tuu le vaega aluga o le lotoifale i totonu e faapaia mo a’u mo le a’oga a a’u aposetolo, ua fetalai mai ai Atalii o Amani; pe, faapea, o Alefasa; pe, faapea foi, o Omekasi; o Iesu Keriso lava lo outou Alii. Amene.